សិល្បៈអន្តរជាតិ៖ ក្រោយប្រឡូកក្នុងរង្វង់សិល្បៈជិត ២០ឆ្នាំ តារាសម្ដែងស្រី Mai Davika ធ្លាក់ឆ្លងកាត់ព្យុះភ្លៀងនៅក្នុងជីវិតតាំងពីថ្ងៃដំបូងរហូតមានឈ្មោះបោះសំឡេង និងមានការទទួលស្គាល់ពីសំណាក់អ្នកគាំទ្រ។ ក្រៅពីមានជោគជ័យក្នុងជីវិតការងារហើយនោះ ជីវិតឯកជនពិសេសស្នេហាជាមួយនឹងកំលោះ Ter Chantavit ក៏កំពុងរីកស្រស់បំព្រងដូចផ្កាត្រូវទឹកសន្សើម រហូតស្រីស្អាតរូបនេះព្រមទទួលស្គាល់ថាខ្លួនចង់មានគ្រួសារ ហើយកំពុងតែរៀបចំគម្រោងរឿងរៀបការហើយ។ នេះបើយោងតាមការបញ្ជាក់ពីសមីខ្លួននៅក្នុងកម្មវិធី WOODY FM។
ចូលរួមជជែកនិងឆ្លើយសំនួរក្នុងកម្មវិធីរបស់ពិធីករសំបូរវោហារ Woody តារាសម្ដែងនិយមលេងឆ្អឹងកញ្ញា Mai Davika បានបើកទ្រូងនិយាយពីរឿងរ៉ាវជីវិតនិងឧបសគ្គដែលបានជួបប្រទះ នាពេលកន្លងថាមានច្រើន តែក៏ជួយឱ្យបានស្គាល់ខ្លួនឯង ហើយក៏ចេះប្រើពេលវេលាមកគិតថាត្រូវនិយាយអ្វី និយាយទៅត្រូវឬអត់ ព្រោះនៅក្នុងការគិតមហាជន រូបកញ្ញាមានរូបភាពជាតួឯកស្រីជាប់ខ្លួន ដូច្នេះគ្រប់យ៉ាងត្រូវគិតហើយគិតទៀត។ ប៉ុន្តែត្រូវអរគុណដល់សម័យបច្ចុប្បន្នដែលធ្វើឱ្យគ្រប់យ៉ាងមានការផ្លាស់ប្ដូរ គ្រប់គ្នាអាចប្រើប្រាស់ជីវិតបែបបើកចំហរបាន មិនចាំបាច់ត្រូវលាក់បាំង ហើយក៏មិនចាំបាច់ត្រូវរស់នៅជារបៀបសំពត់ក្នុងផ្នត់ដូចពីមុន។
ចំពោះព័ត៌មានអាស្រូវមួយចំនួនដែលធ្លាប់ជួប តារារូបនេះបានចែករំលែកឱ្យដឹងថាខ្លួនអាចឆ្លងកាត់ទៅបានអាស្រ័យដោយការលើកទឹកចិត្ត និងផ្ដល់កម្លាំងចិត្តពីមិត្តភក្ដិ និងមនុស្សជុំវិញខ្លួន។ ដូច្នេះនៅពេលឃើញព័ត៌មាន មិនថារឿងនោះយ៉ាងណានោះទេ មិនថាជារឿងខុសឬត្រូវ សម្រាប់កញ្ញាគឺតែងតែលើកទឹកចិត្តអ្នកសិល្បៈដូចគ្នា ជួនកាលថែមទាំងផ្ញើសារទៅដោយផ្ទាល់ថែមទៀត។ កញ្ញាក៏បានប្រាប់ដែរថា កម្លាំងចិត្តជាកត្តាសំខាន់បំផុត គ្រប់យ៉ាងលើលោកនេះគ្មានអ្វីដែលស្រួលនោះទេ មិនថាធ្លាប់ជួបប៉ុន្មានដង ១០ដង-៣០ដង។ សម្រាប់កញ្ញា ទោះជាធ្លាប់ជួបបញ្ហាប៉ុន្មានដងក៏នៅតែមិនអាចទម្លាប់បានដដែល ។ ជួបភ្លាមៗជួបដំបូងៗ អ្នកណាៗ ក៏វិលវល់គិតមិនចេញដែរ»
សម្រាប់ Mai រឿង Challenge បំផុតក្នុងជីវិតគឺការងារ ដោយសារតែឪពុកម្ដាយចែកផ្លូវគ្នាតាំងពីអាយុ១០ឆ្នាំ ហេតុនេះកញ្ញាធំធាត់ឡើងជាមួយនឹងការគិតថាការងារសំខាន់បំផុតព្រោះវាជួយចិញ្ចឹមកញ្ញា ចិញ្ចឹមគ្រួសារ ដរាបណាមានការងារធ្វើឱ្យ កញ្ញាមានលុយ ដូច្នេះកញ្ញាចង់មានការងារមួយដែលមានលំនឹង ប៉ុន្តែដោយសារកញ្ញាមានអាជីពជាតារា ដូច្នេះរឿងអាស្រូវ គឺជារឿងមួយដែលធ្វើឱ្យកង្វល់ព្រោះបារម្ភខ្លាចធ្វើឱ្យប៉ះពាល់ដល់ការងារ ហើយធ្វើឱ្យបាត់បង់លុយ ព្រោះកញ្ញាមិនត្រឹមចិញ្ចឹមខ្លួនឯងតែម្នាក់ប៉ុណ្ណោះទេ តែមានគ្រួសារទាំងមូលត្រូវមើលថែ។
បច្ចុប្បន្នក្នុងវ័យ ៣២ឆ្នាំ Mai Davika ទទួលស្គាល់ថាកញ្ញាតែងតែគិតពីរឿងអនាគតរហូតមក គិតថាតើគួររៀបការនៅកន្លែងណា ស្លៀកឈុតបែបណា តែកញ្ញាក៏ទទួលស្គាល់ដែរថាអនាគតកញ្ញាផ្លាស់ប្ដូរជាប់ជានិច្ច ឧទាហរណ៍ដូចជា មានកូនក៏បាន អត់កូនក៏បាន កញ្ញាគិតអស់ហើយ កញ្ញាចង់មានគ្រួសារខ្លាំងណាស់។
សម្រាប់គូស្នេហ៍របស់ខ្លួនអ្នកកំលោះពូកែកំប្លែង Ter Chantavit កញ្ញាទទួលស្គាល់ថាពេលនៅក្បែរមានអារម្មណ៍ថាស្រណុកចិត្ត មានអារម្មណ៍ថាចុះសម្រុងគ្នា ជាគូស្នេហ៍ដ៏សំបូរបែប ប៉ុន្តែរឿងមួយដែលសង្សារកញ្ញាមានតែកញ្ញាមិនមាននោះគឺ រឿងយឺត ចំណែកកញ្ញាលឿន ដូច្នេះធ្វើឱ្យពេលនៅជាមួយគ្នាក្លាយជាមានលំនឹង ព្រមទាំងទទួលអារម្មណ៍ថាមានមនុស្សម្នាក់នេះក្នុងជីវិត គឺដូចជាជួយជីវិត ហើយក៏ជាមនុស្សម្នាក់ដែលជួយឱ្យថ្ងៃណាមួយដែលមានអារម្មណ៍ថាគ្រប់យ៉ាងក្នុងជីវិតញាប់ពេករហូតដល់វង្វេងវង្វាន់ គ្មានអ្នកជួយគិត ជួយប្រឹក្សាយោបល់ ជួយស្ដាប់ ប៉ុន្តែមានមនុស្សម្នាក់នេះចូលមកក្នុងជីវិត ចូលមកស្ដាប់គ្រប់យ៉ាង កញ្ញាចាត់ទុកថាគូស្នេហ៍ខ្លួន គឺជាអ្នកស្ដាប់ដ៏ល្អម្នាក់។
ក្រោយចូលរួមជាភ្ញៀវកិត្តិយសក្នុងកម្មវិធីនេះរួច ធ្វើឱ្យគាំទ្រ Mai-Ter មានសង្ឃឹមក្នុងចិត្តថាតារាទាំងពីរដួងនេះអាចនឹងមានដំណឹងល្អឆាប់ៗ ពិសេសរូបភាព Ter លត់ជង្គង់សុំ Mai រៀបការ ដូចជាគូស្នេហ៍ប្រចាំ Channel 3 ដូចជាគូ MK និង NY ដែលបានលត់ជង្គង់សុំខាងស្រីរៀបការនាពេលកន្លងមក៕
ប្រភព៖ mcot.net
