ក្រុមបាល់ទះជម្រើសជាតិនារីថៃ គ្រងជើងឯកព្រឹត្តិការណ៍បាល់ទះជើងឯកផ្នែកនារីប្រចាំទ្វីបអាស៊ី 2023 Asian Women’s Volleyball Championship ជាលើកទី៣ នៅលើកដីខ្លួន បន្ទាប់ពីយកឈ្នះម្ចាស់ជើងឯក១៣ សម័យកាល ក្រុមជម្រើសជាតិនារីចិន នៅវគ្គផ្ដាច់ព្រ័ត្រ ក្នុងលទ្ធផល ៣សិតទល់និង២ (២៥–២១, ២៥–២៧, ២៥–១៩, ២០–២៥, ១៦–១៤)។
មុនឡើងដល់វគ្គផ្ដាច់ព្រ័ត្រ ប្រកួតក្នុងពូលក្រុមនារីថៃ យកឈ្នះកូរ៉េខាងត្បូង ៣សិតទល់និង០ និងឈ្នះវៀតណាម ៣សិតទល់និង១ ឡើងវគ្គពាក់កណ្ដាលផ្ដាច់ព្រ័ត្រ ជួនជប៉ុន ឈ្នះ ៣សិតទល់និង២ មុនឡើងវគ្គផ្ដាច់ព្រ័ត្រឈ្នះក្រុមនារីចិន។
រំលឹកដែរថា រំលង់បាន៤ខែ កាលព្រឹត្តិការណ៍ស៊ីហ្គេម លើកទី៣២ ដែលកម្ពុជាធ្វើជាម្ចាស់ផ្ទះ កាលពីខែឧសភា កន្លងទៅ ក្រុមបាល់ទះនារី បានឈ្នះមេដាយមាស បន្ទាប់ពីយកឈ្នះ ក្រុមនារីវៀតណាម វគ្គផ្ដាច់ព្រ័ត្រ ក្នុងលទ្ធផល ៣សិតទល់និង១។
ព្រឹត្តិការណ៍បាល់ទះជើងឯកផ្នែកនារីប្រចាំទ្វីបអាស៊ី 2023 Asian Women’s Volleyball Championship ដែលថៃធ្វើជាម្ចាស់ផ្ទះ មាន១៤ប្រទេសចូលរួម មាន៖ ថៃ, អូស្ត្រាលី, ម៉ូហ្គោលី, ជប៉ុន, អ៊ីរ៉ង់, ឥណ្ឌា, កូរ៉េខាងត្បូង, ចិនតៃប៉ិ, វៀតណាម, អ៊ូសបេគីស្ថាន, ចិន, កាហ្សាក់ស្ថាន, ហុងកុង និងហ្វីលីពីន។ ការប្រកួតបានចាប់ផ្ដើមពីថ្ងៃទី៣០ ខែសីហា រហូតដល់ថ្ងៃទី០៦ ខែកញ្ញា ឆ្នាំ២០២៣។
ចំណាត់ថ្នាក់ក្រុមទាំង១៤ មានដូចខាងក្រោម៖
ក្រុមជើងឯក៖ ថៃ
ជើងឯករង៖ ចិន
លេខ៣៖ ជប៉ុន
លេខ៤៖ វៀតណាម
លេខ៥៖ កាហ្សាក់ស្ថាន
លេខ៦៖ កូរ៉េខាងត្បូង
លេខ៧៖ ឥណ្ឌា
លេខ៨៖ អូស្ត្រាលី
លេខ៩៖ ចិនតៃប៉ិ
លេខ១០៖ អ៊ីរ៉ង់
លេខ១១៖ ហុងកុង
លេខ១២៖ ម៉ូហ្គោលី
លេខ១៣៖ ហ្វីលីពីន
លេខ១៤៖ អ៊ូសបេគីស្ថាន
ខាងក្រោមនេះជាបញ្ជីឈ្មោះកីឡាការិនីដែលឈ្នះពានរួមមាន៖
កីឡាការិនី Chatchu-on Moksri (THA) ឈ្នះពាន Most valuable player
កីឡាការិនី Pornpun Guedpard (THA) ឈ្នះពាន Best setter
កីឡាការិនី Yuki Nishikawa (JPN) និងកីឡាការិនី Wu Mengjie (CHN) ឈ្នះពាន Best outside spikers
កីឡាការិនី Thatdao Nuekjang (THA) និងកីឡាការិនី Yang Hanyu (CHN) ឈ្នះពាន Best middle blockers
កីឡាការិនី Zhou Yetong (CHN) ឈ្នះពាន Best opposite spiker
កីឡាការិនី Manami Kojima (JPN) ឈ្នះពាន Best libero
សម្រាប់ការប្រកួតបាល់ទះជើងឯកប្រចាំទ្វីបអាស៊ីនេះដែរ ២ក្រុមដែលឡើងដល់វគ្គផ្ដាច់ព្រ័ត្រពានរង្វាន់នេះ និងលេខ៣ នឹងមានឈ្មោះទៅប្រកួតក្នុងព្រឹត្តិការណ៍ប្រកួតបាល់ទះផ្នែកនារីពានរង្វាន់ជើងឯកពិភពលោក 2025 FIVB Volleyball Women’s World Championship ។
គួរបញ្ជាក់ថា ពានរង្វាន់បាល់ទះជើងឯកប្រចាំទ្វីបសម្រាប់នារី នេះរៀបចំរាល់៤ឆ្នាំម្តង ដោយធ្វើឡើងចាប់ពីឆ្នាំ១៩៧៥ ដល់ឆ្នាំ១៩៨៧ ទើបចាប់ផ្ដើមរៀបចំ ២ឆ្នាំម្ដង ដោយក្រុមមានក្រុមចូលរួមទាំងតំបន់អាស៊ីនិងដែនកោះមួយចំនួនក្នុងមហាសមុទ្រប៉ាស៊ីហ្វិក ហើយចិន ឈ្នះជើងឯកបានច្រើនជាងគេគឺរហូតដល់១៣លើក (១៩៧៩, ១៩៨៧, ១៩៨៩, ១៩៩១, ១៩៩៣, ១៩៩៥, ១៩៩៧, ១៩៩៩, ២០០១, ២០០៣, ២០០៥, ២០១១, ២០១៥) ជប៉ុន ចំនួន ៥លើក (១៩៧៥, ១៩៨៣, ២០០៧, ២០១៧, ២០១៩) និងថៃ ចំនួន ២លើក (២០០៩, ២០១៣)៕