មួយរយៈចុងក្រោយនេះ តារាសម្ដែងរូបសង្ហាលោក ខាត់ វៃហាំង ហាក់ព្យាយាមបង្ហាញរូបភាពស្អាតៗនិង ផ្អែមល្ហែម គួរជាទីច្រណែនជាមួយនឹងដៃគូបណ្ដូលចិត្តកញ្ញា ស៊ិន យូប៊ីន រហូតធ្វើឱ្យហ្វេនដែលជួយចូកជួយ ចែវចង់ឃើញស្រីស្រស់បុរសសង្ហាមួយគូនេះ វិលមកចាប់គូសម្ដែងជាមួយនឹងគ្នាសារជាថ្មីក្នុងពេលឆាប់ៗនេះ។ យ៉ាងណាមិញអ្នកគាំទ្រតារាទាំងពីរដួងអាចនឹងទទួលបានដំណឹងល្អឆាប់ៗព្រោះមានដំណឹងថាទូរទស្សន៍ ភីអិនអិនត្រៀមចាប់គូតារាទាំងពីរជាថ្មីម្ដងទៀត។
មួយរយៈចុងក្រោយនេះលោក ខាត់ វ៉ៃហាំង និង កញ្ញា ស៊ិន យូប៊ីន មិនបានសម្ដែងរួមគ្នានោះទេ ព្រោះតែអ្នក ទាំងពីរត្រូវបំបែកឱ្យទៅសម្ដែង និង ចាប់ដៃគូ ផ្សេងៗគ្នាដោយ លោក ខាត់ វ៉ៃ ហាំង ចាប់ដៃគូសម្ដែងជាមួយ នឹងអ្នកនាង សិទ្ធី នីកា កញ្ញា សំណាង អេលីណា ខណៈកញ្ញា ស៊ិន យូប៊ីន ចាប់ដៃគូសម្ដែងជាមួយនឹង លោក ណា ខុន និង លោក សុខ សាន់នី។
ការផ្លាស់ប្ដូរដៃគូសម្ដែងរបស់ អ្នកទាំងពីរធ្វើ ឱ្យ ហ្វេនដែលស្ថិតលើ នាវា យូប៊ីន វៃហាំង ហើយខំប្រឹងជួយចូកជួយចែវកាន់តែអន្ទះសា និង ទន្ទឹងចាំមើលថាតើនឹងមានឱកាសបានឃើញតារាសម្លាញ់ចិត្តទាំងពីរវិលមកជួប គ្នាក្នុងរឿងណាមួយរបស់ស្ថានីយទូរទស្សន៍ CTN ដែរឬទេ?
ត្រយងអាចនិយាយបានថាក្ដីទន្ទឹងនិងការរង់ចាំរបស់ហ្វេនអាចនឹងមកដល់ក្នុងពេលដ៏ខ្លីនេះ ព្រោះបើតាម ការបង្ហោះ របស់កញ្ញា ទូច បុប្ផា ប្រធានគ្រប់គ្រងកម្មវិធីផ្សាយទូរទស្សន៍ភីអិនអិន ដែលបានចូលមក ស៊ែរ (Share) រូបភាពល្អូកល្អើនរបស់តួឯកប្រុសស្រីទាំងពីរខាងលើបាននិយាយថា៖ «ឃើញមួយគូនេះផ្អែមល្ហែមចឹង ចង់បានរឿងថ្មីដែលសម្ដែងដោយពួកគាត់ទាំងពីរអត់?»
តាមរយៈប្រយោគខាងលើបានធ្វើឱ្យហ្វេនជាច្រើនបានចូលមកខមមិនខាងក្រោមផុស គាំទ្រនិងសំណូមពរបន្ថែមចង់ឃើញសំណព្វចិត្តទាំងពីរវិលមកជួបគ្នាឆាប់ៗ។
សរុបសេចក្ដីមកវិញ តាមរយៈជំនន់ខមមិនដ៏ច្រើនដែលលើកឡើងនិងបង្ហាញការគាំទ្រដល់ការចាប់គូតារាសម្ដែងលោក ខាត់ វ៉ៃហាំង និងកញ្ញា ស៊ិន យូប៊ីន ជឿជាក់ថាឆាប់ៗនេះ ហ្វេនប្រាកដជាបានទទួលដំណឹងល្អជាក់ជាមិនខាន គ្រាន់តែនៅតែចាំអ៊ុតបន្តិចថារឿងភាគថ្មីដែលអ្នកទាំងពីរនឹងសម្ដែងរួមគ្នាជារឿងប្រភេទណាតែប៉ុណ្ណោះ។
