បុរសម្នាក់បានត្អូញត្អែររៀបរាប់តាមរយៈ YouTube ក្រោយលោកត្រូវញ៉ាំមាន់ណាត់ហ្គេតរាប់សប្ដាហ៍ព្រោះភរិយារបស់លោកគឺជាអ្នកគាំទ្រម្នាក់របស់ក្រុមចម្រៀង BTS ដែលបានក្លាយជា Presenter ឱ្យផលិតផលមាន់បំពងឱ្យយីហោល្បីមួយ។
ការបញ្ចេញអារម្មណ៍បែបកំប្លុកកំប្លែងរបស់បុរសខាងលើត្រូវបានរកឃើញនៅលើ YouTube កាលពីពេលថ្មីៗនេះ តាមរយៈដំណឹងរួមការងារគ្នារវាង BTS និង McDonald’s ដោយក្រុម BTS បានចេញមកផ្សព្វផ្សាយមាន់ណាត់ហ្គេតដ៏ពិសេសមួយ ជាមួយនឹងទឹកជ្រលក់ដែលផ្សំឡើងយ៉ាងពិសេសមាន Sweet Chili និង Cajun ដើម្បីញ៉ាំជាមួយនឹង McNuggets (មាន់ណាត់ហ្គេត) ដែលជាផផលិតផលថ្មីមានលក់នៅគ្រប់សាខាក្នុងហាង McDonald’s ទូទាំងប្រទេសកូរ៉េ។
យ៉ាងណាមិញបុរសជាស្វាមីបានធ្វើការបញ្ចេញយោបល់ដូច្នេះថា ៖ «BTS ខ្ញុំសូមអង្វរដោយក្ដីគោរពយ៉ាងសុភាពជាទីបំផុត សូមមេត្តាជួយឃោសនាផ្សព្វផ្សាយឧបករណ៍ស្ទូចត្រីឬតាំងតង់ជំនួសវិញបានទេ? ខ្ញុំញ៉ាំមាន់ណាត់ហ្គេតជាអាហារពេញមួយសប្ដាហ៍ហើយ ភរិយារបស់ខ្ញុំទិញមាន់ណាត់ហ្គេតនេះតាមផ្លូវត្រលប់មកផ្ទះវិញ ខ្ញុំញ៉ាំលាយជាមួយនឹងទឹកជ្រលក់ Cajun លាយបាយ ហើយក៏លាយមាន់ណាត់ហ្គេតជាមួយសាឡាត់ ខ្ញុំព្យាយាមយ៉ាងខ្លាំងដើម្បីញ៉ាំមាន់ណាត់ហ្គេត ដូច្នេះខ្ញុំកើតគំនិតមួយបើសិនជាពួកលោកផ្សព្វផ្សាយតង់គុណភាពល្អ ភរិយាខ្ញុំច្បាស់ជាទិញមកប្រើ សូមមេត្តាជួយផង។ ពីបុរសម្នាក់ដែលមានភរិយាជា ARMY»
ពាក្យតម្អូញតម្អែររបស់លោកហាក់បានផល ព្រើកាលពីថ្ងៃតី១៩ ខែកក្កដា ឆ្នាំ២០២១ កន្លងទៅមានព័ត៌មានថា BTS បានចាប់ដៃគូជាមួយ Helinox ឧបករណ៍បោះតង់ដ៏ល្បីមួយ ដោយ BTS បានបង្ហាញតង់ពណ៌ស្វាយព្រមជាមួយនឹង Logo BTS នៅលើនោះផងដែរ។
ខណៈដែលហ្វេនៗដែលជា ARMY វ័យក្មេងនៅកំពុងសង្ស័យថាតើពួកគេទិញតង់មកអាចធ្វើអ្វីបានខ្លះ បុរសដែលមានភរិយាជា ARMY ម្នាក់នេះកំពុងតែរីករាយនិងមានក្ដីសុខណាស់ព្រោះបំណងប្រាថ្នាបានសម្រេច។
P.S សង្ឃឹមថាភរិយារបស់ខ្ញុំព្រមទិញតង់ឱ្យ