សំណេរខ្លីរបស់ អ្នកម្ដាយដ៏ស្រស់ស្អាតបានធ្វើមជ្ឈដ្ឋានមហាជន មានការចាប់អារម្មណ៍ និង ព្រួយបារម្ភពីសម្ព័ន្ធភាពប្ដីប្រពន្ធរបស់អ្នកនាង សូដា នីតា ក្រោយឃើញអ្នកនាងប្រកាស្វែងរកប្រពន្ធចុងឲ្យស្វាមី។
កាលពីព្រឹកថ្ងៃទី២៤ ខែកក្កដា ឆ្នាំ២០២១ អ្នកនាង សូដា នីតា បានចេញមកបង្ហោះសំណេរមួយតាមរយៈបណ្ដាញសង្គមដែលសំណេរនេះបង្ហាញពីទឹកចិត្តដ៏មហិមារបស់អ្នកនាង ព្រោះម្ចាស់សំណេរប្រកាសរកប្រពន្ធចុងឲ្យស្វាមី ឬស្រីឱ្យស្វាមី ដូច្នេះអាចនិយាយបានថា ទឹកចិត្តធំមហិមា បើមិនហៅដូច្នេះមិនដឹងថាត្រូវហៅថាម៉េចទើបសមនោះទេ។
អ្នកនាង បានធ្វើការបង្ហោះរៀបរាប់យ៉ាងដូច្នេះលើបណ្ដាញសង្គមយ៉ាងដូច្នេះ «ដំណឹងប្រកាស រកស្រី រឺ ប្រពន្ធចុងអោយប្តីខ្ញុំ មនុស្សថ្មីអាចឆាតជាមួយគាត់បានរឺ អ្នកមិត្តសិល្បះខ្លះដែលធ្លាប់ជាសង្សាចាស់គាត់ពីមុន បែរជាត្រូវគ្នាវិញក៏បាន»។
បន្ទាប់ពីបានឃើញសំណេរប្លែកខាងលើមិត្តភក្ដិនិងមិត្តសិល្បករបានចូលរួមបញ្ចេញមតិនៅខាងក្រោមផុសរបស់អ្នកនាង ដោយភាគច្រើនបានសរសើរពីទឹកចិត្តរបស់អ្នកនាង ហើយអ្នកនាង សូដា នីតា ក៏បានចូលមកឆ្លើយតបចាក់បណ្ដោយថែមទៀតផង។
យ៉ាងណាមិញសំណេររបស់អ្នកនាងបានធ្វើឱ្យមហាជនមានការសង្ស័យថា អ្នកនាងអាចកំពុងមានបញ្ហាជាមួយនឹងស្វាមី ឬអាចនឹងមានអ្នកទីបីចង់ចូលមកជ្រៀតជ្រែកជីវិតគូរបស់អ្នកនាង ទើបបណ្ដាលឱ្យស្ត្រីដែលចូលចិត្តបុណ្យរូបនេះដល់ថ្នាក់បង្ហោះបើកចំហរជាសាធារណៈបែបនេះ បើតាមការឆ្លើយតបក្នុងខមមិនដែលអ្នកនាងប្រាប់ទៅមិត្តភក្ដិ ការដែលអ្នកនាងផុសសំណេរខាងលើនេះគឺ ឆ្លើយតបទៅស្វាមីអ្នកនាងដែលបានផុសសំណេរអាណិតដល់អ្នកមានប្រពន្ធចុង កាលពីថ្ងៃទី២៣ ខែកក្កដា កន្លងមក៕