ក្លិបបាល់ទាត់ភ្នំពេញក្រោន នឹងត្រូវប្រកួតបើកឆាកទល់នឹង Dynamic Herb Cebu របស់ហ្វីលីពីន នៅថ្ងៃទី២១ ខែកញ្ញា វេលាម៉ោង ៧:០០នាទីយប់ នៅកីឡដ្ឋាន Rizal Memorial នៅប្រទេសហ្វីលីពីន វគ្គជម្រុះពូល F នៃពានរង្វាន់ AFC Cup 2023/24។
ក្លិបបាល់ទាត់ Dynamic Herb Cebu ក្លិបដែលមានមូលដ្ឋាននៅប្រទេសហ្វីលីពីន មួយនេះមានឈ្មោះពេញថា Dynamic Herb Cebu Football Club ទើបតែបង្តើតឡើងនៅឆ្នាំ២០២១ និងជាសមាជិកនៃពានរង្វាន់លីគកំពូល Philippines Football League គ្រូបង្វឹកបច្ចុប្បន្ន គឺលោក Joshua Schirmer សញ្ជាតិអាមេរិក ប្រើប្រាស់ទីលាន Dynamic Herb Sports Complex ។
បច្ចុប្បន្នមានលោក Joshua Schirmer ជនជាតិសហរដ្ឋអាមេរិក ជាគ្រូបង្វឹក មានកីឡាករសរុប ២១នាក់ ខណ:កីឡាករបរទេស៦នាក់ ដូចជា៖
- Ryo Togashi ជនជាតិជប៉ុន
- Ken Murayama ជនជាតិជប៉ុន
- Rintaro Hama ជនជាតិជប៉ុន
- Göktuğ Demiroğlu ជនជាតិទួរគី
- Marius Kore ជនជាតិកូតឌីវ័រ
- Arda Çınkır ជនជាតិទួរគី។
ខណ:តម្លៃសំបុត្រសម្រាប់ជំនួបរវាង Herb Cebu ប៉ះ ភ្នំពេញក្រោន៖
- VIP Section៖ PHP 400 ស្មើ ២ម៉ឺន៨ពាន់រៀល
- Catagory 1៖ PHP 300 ស្មើ ២ម៉ឺន១ពាន់រៀល
- Catagory 2៖ PHP 200 ស្មើ ១ម៉ឺន៤ពាន់រៀល។
គួរដឹងថា ក្លិបបាល់ទាត់ភ្នំពេញក្រោន របស់កម្ពុជា ស្ថិតពូលជា F ជាមួយក្រុម Macarthur FC របស់អូស្ត្រាលី Dynamic Herb Cebu របស់ហ្វីលីពីន និង Shan United របស់មីយ៉ាន់ម៉ា វគ្គចែកពូល AFC Cup 2023/24 តំបន់អាស៊ាន។
វគ្គជម្រុះពូល F នឹងត្រូវធ្វើឡើងចាប់ពីថ្ងៃទី២១ ខែកញ្ញា ឆ្នាំ២០២៣ រហូតដល់ថ្ងៃទី១៤ ខែធ្នូ ឆ្នាំ២០២៣ ស្របពេលក្លិបបាល់ទាត់ភ្នំពេញក្រោន នឹងយកពហុកីឡដ្ឋានជាតិ ធ្វើជាទឹកដីម្ចាស់ផ្ទះ ក្នុងពានរង្វាន់ AFC Cup 2023/24។
ចំពោះលក្ខន្តិកៈនៃការប្រកួតគឺលេងក្នុងដីក្រៅដី (Home-Away) សរុប៦ប្រកួត ខណ:ក្រុមលេខ១ តាមពូលនីមួយៗនឹងឡើងទៅកាន់វគ្គពាក់កណ្ដាលផ្ដាច់ព្រ័ត្រ ASEAN ZONE និងក្រុមលេខ២ល្អ។
ពានរង្វាន់នេះបែងចែកជាតំបន់ចំនួន៥ មានអាស៊ីខាងលិច អាស៊ីខាងកើត អាស៊ីកណ្តាល អាស៊ីខាងត្បូង និងអាស៊ីអាគេ្នយ៍ ខណ:តំបន់អាស៊ាន ASEAN ZONE (ពូល F,G,H) ការប្រកួតទី១ គ្រោងនឹងធ្វើឡើងចន្លោះថ្ងៃទី១៨ រហូតដល់ថ្ងៃទី២១ ខែកញ្ញ ឆ្នាំ២០២៣៕
