ថ្មីៗនេះ Wu Yifan (Kris Wu) មានពាក់ព័ន្ធច្រើនទៅនឹងរឿងអាស្រូវតាមរយៈការចោទប្រកាន់ជាសាធារណៈពីអតីតមិត្តស្រីរបស់លោកគឺ Du Meizu នៅលើបណ្ដាញសង្គម។ បន្ថែមលើនោះថែមទាំងបានបោកប្រាស់ទៅលើមនុស្សស្រីជាច្រើននាក់ និងត្រូវបានចោទប្រកាន់ថារំលោភក្មេងស្រីមិនទាន់គ្រប់អាយុថែមទៀតផង។
ជាពិសេសទៀតនោះក្រោយពី Du Meidu បានធ្វើការចោទប្រកាន់លើតារាចម្រៀងរូបសង្ហានេះថាមានសម្ព័ន្ធភាពផ្លូវភេទជាមួយនឹងនាង ព្រមទាំងចែករំលែករឿងរ៉ាវស្រដៀងគ្នានេះពីជនរងគ្រោះចំនួន៧នាក់ផ្សេងទៀត។ ដោយមានការអះអាងតាមរយៈ Weibo ថា «Wu Yifan បានស្នើសុំជួបជាមួយនារីរងគ្រោះតាមរយៈការផ្ដល់ការសម្ភាសន៍ការងារឬតាមរយៈការជួបជាមួយនឹងអ្នកគាំទ្រ បន្ទាប់មកតារារូបនោះបានប្រើកម្លាំងចាប់បង្ខំទៅលើជនរងគ្រោះទាំងអស់នោះ»
ស្ត្រីម្នាក់ដែលបានហៅខ្លួនឯងថា (A) បានអះអាងថា Kris បានរំលោភលើក្មេងស្រីអនីតិជន បន្ទាប់ពីឱ្យពួកគេផឹកគ្រឿងស្រវឹង រួចហើយគេបានចាយប្រាក់ចំនួន ៥សែនយន់ (៥០០០០០យន់) ឱ្យទៅជនរងគ្រោះ។ បន្ថែមលើនោះ A បានផ្ដល់សម្ភាសន៍ជាមួយនឹងកាសែតបរទេសដោយនិយាយទៀតថា «ជនរងគ្រោះម្នាក់បានរលូតកូនព្រោះតែឆ្លងរងពី Wu Yifan ក្នុងពេលរួមភេទ ព្រោះតែWu Yifan មិនបានប្រើប្រាស់ឧបករណ៍ការពារពេលរួមភេទ»
ក្រោយពីរងការចោទប្រកាន់និងរឿងអាស្រូវផ្លូវភេទ Kris Wu បានប្រកាសប្ដឹងនិងបង្ហាញពីចំណាប់អារម្មណ៍របស់ខ្លួនត្រង់ៗចំពោះរឿងនេះថា «ចំពោះនារី A ខ្ញុំបានជួបនាងម្ដងគត់នៅក្នុងពេលជួបជាមួយនឹងមិត្តភក្ដិខ្ញុំកាលពីថ្ងៃទី៥ខែធ្នូឆ្នាំមុន ហើយក្នុងពេលជួបគ្នានោះ ពួកខ្ញុំអត់មានបានផឹកស្រាជាមួយគ្នានោះ ម្យ៉ាងទៀតលោកក៏មិនមានលេខទូរស័ព្ទរបស់នាងដូចគ្នាដែរ»
ខណៈដែលរឿងអាស្រូវកាន់តែរីកសាយធំឡើងនោះកាលពីថ្ងៃទី ១៩ ខែកក្កដា Kris Wu បានចេញមកផុសពីគណនី Weibo របស់លោកពាក់ព័ន្ធនឹងរឿងនេះថា «ខ្ញុំមិនបានតបតអ្វីទាំងអស់ព្រោះខ្ញុំមិនចង់ជ្រៀតជ្រែកការធ្វើការងាររបស់តុលាការ។ ខ្ញុំមិនដឹងសោះថាការនៅស្ងៀមស្ងាត់របស់ខ្ញុំបែរជាធ្វើឱ្យពាក្យចចាមអារ៉ាមកាន់តែរីកធំ។ ខ្ញុំមិនអាចទ្រាំបានទៀតទេ»។
មនុស្សជាច្រើនជឿជាក់ថាប្រសិនបើការចោទប្រកាន់ទាំងអស់គឺជាការពិតមែននោះ Kris Wu នឹងត្រូវប្រឈមមុខនឹងជាប់ពន្ធនាគារអស់មួយជីវិតចំពោះអំពើបាបរបស់គេ។ មិនតែប៉ុណ្ណោះក៏មានអ្នកលើកឡើងដែរថា តារារូបនេះអាចនឹងត្រូវកាត់ទោសប្រហារជីវិតចំពោះបទល្មើសរំលោភក្មេងស្រីអនីតិជនដោយតុលាការកំពូល។ ចំពោះករណីនេះបានធ្វើឱ្យមនុស្សជាច្រើនកាន់តែចាប់អារម្មណ៍លើរឿងក្ដីរបស់ Kris Wu កាន់តែខ្លាំង។
គួរដឹងដែរថាតារាចម្រៀងរូបសង្ហាអតីតសមាជិកក្រុមចម្រៀងល្បីកូរ៉េ EXO រូបនេះក៏ធ្លាប់ចេញមកប្រកាសដែរថាប្រសិនបើលោកពិតជាប្រព្រឹត្តិអំពើដូចការចោទប្រកាន់មែននោះ លោកសុខចិត្តដើរចូលគុកដោយខ្លួនឯង។ រឿងរ៉ាវនឹងទៅជាយ៉ាងណាទៀត អ្នកណាខុសអ្នកត្រូវនៅមិនទាន់ដឹងនៅឡើយទេ Kris Wu ស្អាតស្អំ ឬខុសដូចការចោទប្រកាន់មានតែរង់ចាំតាមដានជាបន្តទៀត៕
