តារាចម្រៀងនិយមលេងស្តាលយ៍ទំនើបនិងទាន់សម័យ អ្នកនាង ទេព បូព្រឹក្ស បានចេញមកប្រកាសសន្យានឹងធ្វើឱ្យបានល្អជាទីបំផុតប្រសិនបើទទួលបានការអនុញ្ញាតឱ្យថត MV នៅប្រាសាទអង្គរវត្ត ខណៈដែលកំដៅនៃបញ្ហាចម្រូងចម្រាសរឿង វត្តភូម៉ានហ្វាឬប្រាសាទ សីហនគរ កំពុងក្លាយជាប្រធានបទក្ដៅដែលអ្នកលេងបណ្ដាញសង្គមកំពុងតែជជែកវែកញែកគ្នា។
នៅថ្ងៃទី២៦ ខែកញ្ញា ឆ្នាំ២០២៣នេះ ម្ចាស់បទ «Top of The Lady» និង «ទេវរាជ» អ្នកនាង ទេព បូព្រឹក្ស បានបញ្ចេញសារខ្លី ប៉ុន្តែពិតជាមានអត្ថន័យចាក់ដោតចិត្តជាទីបំផុតសម្រាប់អ្នកដែលស្រលាញ់ ចង់លើកស្ទួយ និងចង់ផ្សព្វផ្សាយពីប្រាសាទអង្គរវត្ត ដែលជាស្នូលនៃដួងព្រលឹងជាតិ និងអត្តសញ្ញាណជាតិខ្មែរ។ តារាចម្រៀងនេះបានសន្យាថា ៖ «បើសិនជាផ្តល់ឱកាសឱ្យខ្ញុំបានថត MV បទទេវរាជ នឹង មហានគរនៅប្រាសាទអង្គវត្តបាន ពួកខ្ញុំនឹងមិនធ្វើឱ្យអ្នកទាំងអស់គ្នា ខកបំណងឡើយ»។
គ្រាន់តែបញ្ចេញសារខ្លីប៉ុណ្ណេះ គេឃើញមានអ្នកគាំទ្រពីគ្រប់ទិសទី បានចូលមកគាំទ្រចំពោះគំនិតរបស់អ្នកនាងគ្រប់គ្នា។ ដោយត្រយងសូមសង្ខេបពីការលើកឡើងខ្លះៗរបស់អ្នកលេងបណ្ដាញសង្គមដូចតទៅ៖ «គាំទ្រ កូនខ្មែរត្រូវតែតស៊ូ ប្រាសាទអង្គរវត្តជារបស់កូនខ្មែរ ជាដួងព្រលឹងកូនខ្មែរ ជាអត្តសញ្ញាណខ្មែរ គេស្គាល់ខ្មែរដោយសារទង់ជាតិខ្មែរ មានរូបប្រាសាទអង្គរវត្តដ៏អស្ចារ្យនេះ សូមប្រជាជនខ្មែរ ផុសរូបជារបស់យើង ដើម្បីលុបបំបាត់រូបរបស់គេ បើយើងយករបស់គេមកផុស ហើយស៊ែរ នោះដូចយើងបានជួយផ្សព្វផ្សាយឱ្យគេកាន់តែល្បីថែមទៀត។ យើងជាខ្មែរស៊ែរតែរបស់យើងឱ្យពិភពលោកបានឃើញថាជារបស់យើងពិតប្រាកដ» «ល្អខ្លាំងណាស់ តាំងពីចេញបទហ្នឹងមកមានបរទេសជាច្រើនបានយកទៅធ្វើ Reaction ហើយបើចេញជា MV ហើយបរទេសគេយកទៅ Reaction ទៀតនឹងបង្ហាញឱ្យឃើញពីគោលដៅទេសចរណ៍កាន់តែច្បាស់ ពិសេសភាពអស្ចារ្យនៃអង្គរ។»
សូមជម្រាបជូនថាតារាចម្រៀងយ៉េយ៉េ ចូលចិត្តលេងស្តាលយ៍ប្លែកៗទំនើបទាន់សម័យរូបនេះ តែងតែបញ្ចូលនូវវប្បធម៌ខ្មែរ មិនថាជារបាំ ឧបករណ៍តន្ត្រី ឬទម្រង់សិល្បៈបុរាណទៅក្នុងបទចម្រៀងរបស់ខ្លួនជានិច្ច ដូចជាបទចម្រៀងដ៏ល្បីល្បាញ Top Of The Lady ដែលបទនេះបានបញ្ចូលនូវទម្រង់សិល្បៈល្ខោនខោលទៅក្នុងឈុតឆាកនៃបទចម្រៀងជាដើម៕