សិល្បៈជាតិ៖ អតីតបវរកញ្ញាពិភពលោកឆ្នាំ២០២១ (Miss World Cambodia 2021) កញ្ញា ភុំ សោភ័ណ្ឌ ប្រហែលជាទប់លែងជាប់ហើយ ទើបដាច់ចិត្តចេញមកទម្លាយការឈឺចាប់រឿងត្រូវបានគេកេងចំណេញកម្លាំងញើសឈាមរបស់ខ្លួន។
កាលពីពេលថ្មីៗនេះ យោងតាមរយៈការបង្ហោះមួយនៅលើបណ្ដាញសង្គម ស្រីស្រស់សម្រស់បាន ភុំ សោភ័ណ្ឌ បានចេញមកបង្ហោះសារចែករំលែករឿងរ៉ាវឈឺចាប់របស់ខ្លួន ជាសាធារណៈ៖ «ហ៎ គ្រាន់តែដើរចេញ ដើម្បីរកកន្លែងមួយដែលអាចជួយខ្លួនឯង និងក្រុមគ្រួសារ ឱ្យអាចរស់នៅក្នុងពិភពលោកមួយនេះ ឱ្យបានសុខប៉ុណ្ណោះ បែរជាត្រូវក្លាយជាមនុស្សអាក្រក់ភ្លាម កុំភ្លេចថា គុណទៅវិញទៅមកទេ ខ្ញុំយកចំណេះ ជំនាញ សមត្ថភាពទៅដូរយកលុយ មិនមែនលុយឱ្យខ្ញុំទាំងប៉ុន្មាន ខ្ញុំទទួលទទេរ នោះទេ។ ឮគេនិយាយ៣០ពាន់ដង ក៏មិនស្មើជួបផ្ទាល់ខ្លួនឯងដែរ ជឿហើយ»
បន្ទាប់ពីការបង្ហោះសារសារសព្ទរឿងរ៉ាវក្នុងចិត្តរួចគេឃើញមានអ្នកគាំទ្រ ក៏ដូចជាអ្នកមានមុខមាត់ក្នុងវិស័យសិល្បៈជាច្រើនបានចូលមកសាកសួរចង់ដឹងថាការបង្ហោះរបស់កញ្ញានេះចង់សំដៅដល់រឿងអ្វី? ក្នុងនោះលោក កៅសីហា ដែលជាអ្នកដឹកនាំមួយរូបរបស់ផលិតកម្មហង្សមាស-រស្មីហង្សមាស បានសួរថា៖ «មានរឿងអីអូន?» ដោយកញ្ញាយើងបានឆ្លើយតបយ៉ាងខ្លីវិញថា៖ «ចាសបង រឿងកេងចំណេញកម្លាំងពលកម្ម»។ ក្រៅពីនោះអ្នកគាំទ្រកញ្ញា ក៏ដូចជាមិត្តភក្ដិជាច្រើនរបស់កញ្ញា បានចូលមកលើកទឹកចិត្តនិងផ្ដល់កម្លាំងចិត្តរបស់កញ្ញាផ្សេងៗពីគ្នា «ដើរចេញហួសហើយ កុំងាកក្រោយទៀត ព្រោះផ្លូវខាងមុខនៅមានរឿងល្អជាច្រើនទៀតនៅរង់ចាំអូន» «សេដម៉ងហ្មង» «Be Strong Idol» «មាត់មនុស្សឯងអើយកុំយកចិត្តទុកដាក់អី សំខាន់លើខ្លួនយើងមិនមែនពួកគាត់មករកស៊ីចិញ្ចឹមយើងនឹងគ្រួសារឯណា» «ស៊ូៗឯង»។
សូមរំលឹកឡើងវិញថា កញ្ញា ភុំ សោភ័ណ្ឌ ត្រូវបានអ្នកគាំទ្រ ឬអ្នកដែលតាមដានវិស័យប្រកួតសម្រស់ស្គាល់យ៉ាងច្បាស់ ព្រោះកញ្ញាគឺជាម្ចាស់មកុដ Miss World Cambodia ឆ្នាំ២០២១ ដែលបានតំណាងឱ្យប្រទេសកម្ពុជាចេញទៅប្រកួតនៅ ក្នុងទីក្រុង San Juan ប្រទេសព័រតូរីកូ ដែលមានបេក្ខភាពបវរកញ្ញាមានសម្រស់ស្រស់ស្អាតមកពីបណ្ដាប្រទេសទាំង ៨៣ ប្រទេសចូលរួមប្រកួត ដោយការប្រកួតបានប្រព្រឹត្តទៅ នៅ ថ្ងៃទី ១៦ ខែធ្នូ ឆ្នាំ ២០២១ កន្លងទៅ។ ថ្វីត្បិតមិនទទួលបានលទ្ធផលជាប់ក្នុងលំដាប់ Top តែវត្តមានរបស់កញ្ញា ក៏បានបង្ហាញឱ្យអន្តរជាតិបានចាប់អារម្មណ៍មកលើប្រទេសកម្ពុជាផងដែរ៕
ទស្សនាវីដេអូព័ត៌មានទាំងស្រុងខាងក្រោមនេះ៖
