សិល្បៈជាតិ៖ នេះគឺជាលើកទីមួយហើយដែល ស៊ូ លីផេង បានចាប់ដៃគូច្រៀងជាមួយនឹង ពេជ្រ សូលីកា ដែលមានចំណងជើងថា «សិប្បនិម្មិត» ដោយបទចម្រៀងថ្មីនេះទទួលបានការគាំទ្រយ៉ាងខ្លាំង ជាពិសេសបទចម្រៀងនេះកំពុងវាយប្រហារបេះដូងអ្នកកំពុងខូចចិត្ត។
ទើបតែចេញបានរយៈពេល១០ថ្ងៃប៉ុណ្ណោះ (២៣ កញ្ញា ២០២៣) សម្រាប់បទចម្រៀងនិពន្ធថ្មី ខាងលើ ប៉ុន្តែសន្ទុះនៃការគាំទ្រវិញគឺទទួលបានយ៉ាងច្រើនលើសលប់ព្រោះគិតត្រឹមថ្ងៃទី៣ ខែតុលា នេះ ទទួលបានចំនួនទស្សនារហូតដល់ទៅ 1,520,077 views ព្រមទាំងជាប់លំដាប់លេខ១ ជា Trending For Music ផងដែរ។ តារាចម្រៀងម្ចាស់រហស្សនាម សំណព្វចិត្តអ្នកខូចចិត្ត ស៊ូ លីផេង រមែងបញ្ចេញបទចម្រៀងបែបសេដៗ បែបទោលដូច្នេះការចាប់ដៃគូជាមួយនឹងអ្នកនាងពេជ្រ សូលីកា អាចនិយាយបានថាគឺជារសជាតិថ្មីប្លែកមួយទៀត សម្រាប់ជាចំណីអារម្មណ៍អ្នកគាំទ្រខ្លួន។ បទចម្រៀងថ្មីនេះមានការចាប់អារម្មណ៍ជាពិសេសរហូតមានផេករបស់ថៃមួយបានយកទៅផុសប្រូម៉ូតផ្សព្វផ្សាយថែមទៀតផង
សិប្បនិម្មិត គឺជាបទចម្រៀងដែលរៀបរាប់ពីក្ដីស្នេហារវាងយុវវ័យមួយគូដែលមិនអាចចាប់ដៃគ្នាជាគូអនាគត ព្រោះខាងស្រីត្រូវបង្ខំចិត្តរៀបការ តាមក្រុមគ្រួសារ ប៉ុន្តែទោះជាយ៉ាងណាក្ដី បុរសដែលស្មោះស្នេហារូបនោះ នៅតែព្រួយបារម្ភ និងរង់ចាំរំលែកទុក្ខ នារីដែលខ្លួនស្រលាញ់ជានិច្ច៕
