ក្រុមបាល់ទាត់ក្នុងសាលរបស់កម្ពុជា នៅរាត្រីថ្ងៃពុធ ទី៥ ខែតុលា ឆ្នាំ២០២៣ បានបន្តចេញដំណើរពីរាជធានីបាងកក ឆ្ពោះទៅកាន់ទីក្រុង Fergana ដែលជាទីកន្លែងធ្វើម្ចាស់ផ្ទះពូល G ក្នុងវគ្គជម្រុះជើងឯកហ្វូតសាលប្រចាំទ្វីបអាស៊ី 2024 AFC Futsal Asian Cup ដោយប្រើប្រាស់ថិរវេលាប្រមាណ១៧ម៉ោង។
ក្រុមកម្ពុជា បានចាកចេញពីមាតុប្រទេសតាំងពីថ្ងៃទី២៨ ខែកញ្ញា ឆ្នាំ២០២៣ ដោយទៅហ្វឹកហាត់នៅរាជធានីបាងកក ប្រទេសថៃ ប្រមាណ១សប្ដាហ៍មុនបន្តដំណើរទៅកាន់ប្រទេសអ៊ូបេគីស្ថាន។ មុនចំណេញដំណើរក្រុមទាំងមូលបានចូលជួបនិងស្តាប់មតិសំណេះសំណាលផ្ដាំផ្ញើរពីសំណាក់លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា ផងដែរ។
សហព័ន្ធកីឡាបាល់ទាត់កម្ពុជា បានកោះហៅកីឡាករចំនួន១៤រូប ដើម្បីចូលប្រមូលផ្ដុំក្នុងឈុតហ្វូតសាលបុរសលើកនេះ រួមមានកីឡាករ ង៉ែត សីហា, កែវ ជាគូ, ហ៊ីង សុខពៅ, ព្រំ ឌីយ៉ាម៉ង់, គន្ធ លន់ដារ៉ូត, រស់ ស៊ីចំរើន, តុង ច័ន្ទមុនី, ឡាក់ ភីរុណ, កែវ សុចិត្រា, ញឹក ថាលីដា, ជាប រីឈី, ប្រាក់ សុវណ្ណារិទ្ធ ខណៈ គឹម ស៊ីម៉េង និង ខែក ច័ន្ទសម្បត្តិ ជាអ្នកចាំទី។
គ្រូបង្វឹករបស់ក្រុមជម្រើសជាតិហ្វូតសាលរបស់កម្ពុជា មាន លោក នៃ ប៊ុនសុភ័ត្រា ជាគ្រូបង្គោល ហើយលោក ជាត ច័ន្ទរចនា ជាគ្រូជំនួយ និងលោក ឡុង ណាស៊ី ជាគ្រូចាំទី។
វគ្គជម្រុះ 2024 AFC Futsal Asian Cup រៀបចំពីថ្ងៃទី៧-១១ តុលា ឆ្នាំ២០២៣ ដោយមាន៣១ក្រុមចូលរួម ខណៈ១៦ប្រទេសផ្សេងទៀតមិនបានបញ្ជូនក្រុមទៅចូលរួមប្រកួតឡើយ។ បើតាមការចាប់ឆ្នោតនៅស្នាក់ការកណ្ដាលរបស់សហព័ន្ធបាល់ទាត់អាស៊ី ក្នុងទីក្រុងកូឡាឡាំពួរ ពីថ្ងៃទី២២ មិថុនា កន្លងទៅក្រុមទាំង៣១ បានជ្រើសរើសបែងចែកជា៨ពូលផ្សេងគ្នា ដោយប្រកួតជម្រុះយកជើងខ្លាំងចំនួន១៥ក្រុមឡើងទៅជុំចុងក្រោយ ដែលធ្វើឡើងនៅខែមេសា ឆ្នាំ២០២៤ ក្នុងប្រទេសថៃ។
កម្ពុជា ស្ថិតក្នុងពូល G ជាមួយម្ចាស់ផ្ទះអ៊ូប៊ែគីស្ថាន, អ៊ីរ៉ាក់ និងម៉ាឡេស៊ី ដោយកម្មវិធីប្រកួតមាន៖
៧ តុលា អ៊ូបេគីស្ថាន ប៉ះ កម្ពុជា
៧ តុលា អ៊ីរ៉ាក់ ប៉ះ ម៉ាឡេស៊ី
៩ តុលា កម្ពុជា ប៉ះ អ៊ីរ៉ាក់
៩ តុលា ម៉ាឡេស៊ី ប៉ះ អ៊ូបេគីស្ថាន
១១ តុលា អ៊ូបេគីស្ថាន ប៉ះ អ៊ីរ៉ាក់
១១ តុលា ម៉ាឡេស៊ី ប៉ះ កម្ពុជា
ពានរង្វាន់ហ្វូតសាលប្រចាំទ្វីបអាស៊ី AFC Futsal Asian Cup បង្កើតឡើងដំបូងពីឆ្នាំ១៩៩៩ ដោយរៀបចំរាល់១ឆ្នាំម្តង រហូតដល់ឆ្នាំ២០០៨ ទើបប្តូររៀបចំរាល់២ឆ្នាំ ស្របពេលដែលក្រុមជម្រើសជាតិអ៊ីរ៉ង់ ឈ្នះជើងឯក១២សម័យកាលម្នាក់ឯង ហើយជប៉ុនឈ្នះបាន៤សម័យកាល ក្រៅពីនោះគ្មានអ្នកធ្លាប់ឈ្នះពាននេះឡើយ។
ក្រុមដែលឡើងដល់វគ្គពាក់កណ្ដាលផ្ដាច់ព្រ័ត្រ 2024 AFC Futsal Asian Cup ទាំង៤ក្រុមឈ្មោះតំណាងអោយទ្វីបអាស៊ី ទៅចូលរួមប្រកួតជើងឯកពិភពលោក 2024 FIFA Futsal World Cup ដែលប្រទេសអ៊ូប៊ែគីស្ថាន ធ្វើជាម្ចាស់ផ្ទះក្នុងខែកញ្ញ-តុលា ឆ្នាំ២០២៤ ខាងមុខ៕
