កូរ៉េ៖ តារាសម្ដែងល្បីកូរ៉េ Ji Chang Wook ហៅ ដុងហេ តេស្ដវិជ្ជមានកូវីដ-១៩ ធ្វើឱ្យលោកក្លាយជាតារាល្បីដំបូងមួយរូបក្នុងរង្វង់សិល្បៈប្រចាំប្រទេសកូរ៉េដែលឆ្លងជំងឺកូវីដ-១៩ ធ្វើឱ្យរឿងដែលលោកសម្ដែងសម្រាប់ Netflix ផ្អាកការថត។
តារាសម្ដែងសំណព្វចិត្តនារីដែលកំពុងតែត្រៀមថតភាពយន្តជាស៊េរីរបស់ Netflix ដែលមានចំណងជើងថា Annarasumanar (The Sound of Magic) កំពុងតែស្ថិតក្នុងដំណាក់កាលធ្វើចត្តាឡីស័កនិងព្យាបាល នេះបើតាមការបង្ហោះពីផលិតកម្ម Glorious Entertainment បានប្រកាសកាលពីថ្ងៃទី២៦ ខែកក្កដា ឆ្នាំ២០២១ ម្សិលមិញនេះ។
យោងតាមការផ្សព្វផ្សាយពីបណ្ដាញសារព័ត៌មានកូរ៉េតារាល្បីវ័យ៣៤ឆ្នាំរូបនេះបានទៅធ្វើតេស្តកាលពីចុងសប្ដាហ៍ហើយទើបបានទទួលលទ្ធផលវិជ្ជមាននៅថ្ងៃច័ន្ទ។
តារាសម្ដែងរួមជាមួយគ្នាជាមួយលោកគឺ Hwang In Youp និង តារាសម្ដែងស្រី Choi Sung Eun បានធ្វើតេស្តរួចហើយតែមិនមានវិជ្ជមាននោះទេ។ ការឆ្លងជំងឺកូវីដ-១៩ របស់តារាល្បីខាងលើបានធ្វើឱ្យរឿងភាគជាស៊េរីរបស់ Netflix ដែលមាន Chi Chang Wook សម្ដែងជាតួឯក ត្រូវបានផ្អាកជាបណ្ដោះអាសន្ន។
Chi Chang Wook គឺជាតារាសម្ដែងល្បីនៅក្នុងព្រះរាជាណាចក្រកម្ពុជាដែលមានទស្សនិកជនស្គាល់លោកតាមរយៈតួអង្គឈ្មោះ ដុងហេ ដែលលោកសម្ដែងនៅក្នុងរឿង ញញឹមជាថ្មី (Smile Again) និង រឿង Empress Ki (២០១៣-២០១៤)។ លោកគឺជាតារាចុងក្រោយរបស់សាធារណរដ្ឋកូរ៉េខាងត្បូងដែលបានតេស្ដវិជ្ជមានកូវីដ-១៩ ដែលបង្កឱ្យមានកើតមានភ័យខ្លាចការឆ្លងរីករាលដាលនៅក្នុងរង្វង់សិល្បៈរបស់ប្រទេសនេះ។
ខាងក្រោមនេះ គឺជាឈ្មោះតារាសម្ដែងល្បីរបស់កូរ៉េដែលបានឆ្លងជំងឺកូវីដ-១៩ មានដូចជា Kim Sung Kyu ប្រធានក្រុមចម្រៀង K-Pop កូរ៉េ Infinite , Lee Min Hyuk សមាជិកក្រុម BtoB, Doyoung និងJunghwan សមាជិកក្រុម Treasure ខណៈតារាសម្ដែងល្បីៗផ្សេងទៀតដែលបានឆ្លងកូវីដ-១៩ មានដូចជាតារាម៉ូដែល Han Hye Jin តារាចម្រៀងស្រីល្បី Hani ក្រុមចម្រៀង Exid តារាចម្រៀង Seo In Young អតីតសមាជិកក្រុមចម្រៀង Jewelry (ជូអ៊ូលរី) និងតារាចម្រៀង San ពីក្រុមចម្រៀងបុរស Ateez ៕
