មុនពិធីបិទព្រឹត្តិការណ៍ប្រកួត កីឡាកម្រិតទ្វីបអាស៊ី Asian Games 2022 នៅថ្ងៃទី៨ ខែតុលា នេះប្រទេសចិន ដណ្ដើមបានមេដាយមាសលើស ២០០គ្រឿងមុនគេ និងមេដាយសរុបមានចំនួន ៣៨២គ្រឿង លើកទឹកដីខ្លួនឯង។
មេដាយដែលអត្តពលិករបស់ប្រទេសចិនដណ្ដើមបាន គិតត្រឹមព្រឹកថ្ងៃទី០៨ តុលានេះ រួមមាន៖
- មេដាយមាស មានចំនួន ២០០គ្រឿង
- មេដាយប្រាក់ ១១គ្រឿង
- មេដាយសំរឹទ្ធ ៧១គ្រឿង
ដោយឡែកសម្រាប់ក្រុមកីឡាការិនីការ៉ាតេកម្ពុជា ដែលមានកីឡាការិនី ថាត់ ឆេងហ័ង, អូន ស្រីដា និង ពុទ្ធា ស្រីណុច ដណ្ដើមបានមេដាយសំរឹទ្ធ ១គ្រឿង លើកដំបូងលើវិញ្ញាសាសម្ដែងមេគុននារីជាក្រុម ក្នុងព្រឹត្តិការណ៍ Asian Games លើកទី១៩ នៅទីក្រុង Hangzhou ប្រទេសចិន កាលពីរសៀលថ្ងៃទី៦ ខែតុលានេះ។
នេះគឺជាមេដាយដំបូង ដែលអត្តពលិកកម្ពុជា ដណ្ដើមបានក្នុងព្រឹត្តិការណ៍កីឡាអាស៊ីឆ្នាំនេះ ក្រោយរង់ចាំតាំងពីថ្ងៃទី២៣ ខែកញ្ញា មកម្ល៉េះ ស្របពេលពិធីបិទនឹងធ្វើឡើងនៅថ្ងៃទី៨ ខែតុលា ឆ្នាំ២០២៣ ខាងមុខនេះ។
ព្រឹត្តិការណ៍កីឡា Asian Games 2022 នៅទីក្រុង Hangzhou ប្រទេសចិន បានប្រារព្ធពិធីបើកជាផ្លូវ កាលពីរាត្រីថ្ងៃទី២៣ កញ្ញា ដោយមានវត្តមាន ៤៥ប្រទេស ក្នុងទ្វីបអាស៊ីចូលរួមក្នុងព្រឹត្តិការណ៍មួយនេះ។ សម្រាប់កម្ពុជាបានបញ្ជូនប្រតិភូកីឡាសរុប ១៨៩នាក់ ក្នុងនោះអត្ដពលិកចំនួន ១១៤នាក់ មាន ១៧ប្រភេទកីឡា៕
