លោកតា អ៊ុំ សួន ព្រឹទ្ធាចារ្យកីឡាដែលមានមុខទស្សនាស្ទើរតែគ្រប់ការប្រកួតបាល់ទាត់ជាតិនៅគ្រប់កន្លែង ពេលនេះបានជាសះស្បើយពីជំងឺកូវីដ-១៩ ហើយ តែត្រូវធ្វើចត្តាឡីស័កនៅផ្ទះសិន តាមការកំណត់របស់ក្រសួងសុខាភិបាល។
កូនប្រុសរបស់តាសួន លោក អ៊ុំ ច័ន្ទតារ៉ា អតីតកីឡាករជម្រើសជាតិកម្ពុជា ផងដែរនោះបានប្រាប់ក្រុមការងារ«សារព័ត៌មានត្រយង» នៅព្រឹកថ្ងៃអង្គារ ទី២៧ ខែកក្កដា ឆ្នាំ២០២១ នេះថា៖«គាត់បានអញ្ជើញមកដល់ផ្ទះប្រហែល៣ ឬ៤ ថ្ងៃហើយ សុខភាពគាត់ល្អ ហើយត្រូវបន្តសម្រាកនៅផ្ទះសិន»។
លោកតា អ៊ុំ សួន បានវិជ្ជមានជំងឺកូវីដ-១៩ កាលពីពេលកន្លងទៅ ហើយបានសម្រាកព្យាបាលនៅពហុកីឡដ្ឋានជាតិ។ លោកតាធ្លាប់ទទួលបានពានរង្វាន់អ្នកគាំទ្រកីឡាបាល់ទាត់សកម្មជាងគេ ពីគណៈកម្មការប្រកួតបាល់ទាត់ជាតិកម្ពុជា នៅអំឡុងឆ្នាំ២០១៨។ លោកតាធ្លាប់ប្រាប់សារព័ត៌មានក្នុងស្រុកថា ចង់ទស្សនាព្រឹត្តិការណ៍កីឡាស៊ីហ្គេមឆ្នាំ២០២៣ ដែលកម្ពុជា ធ្វើជាម្ចាស់ផ្ទះនាពេលខាង ទើបលោកអស់ចិត្ត៕
