សិល្បៈអន្តរជាតិ៖ ប្រហែលជាអ្នកគ្រប់គ្នានៅមិនទាន់ភ្លេចនូវឡើយចំពោះ Project កុនខ្នាតធំបែបប្រវត្តិសាស្ត្រ«First They Kill My Father» របស់កំពូលសម្ដែងហូលីវូដ Angelina Jolie ប៉ុន្តែតើអ្នកមានដឹងទេថា Maddox កាលណោះគឺត្រឹមតែជាសិស្សវិទ្យាល័យម្នាក់ប៉ុណ្ណោះ ហើយត្រូវបានម្ដាយទុកចិត្តប្រគល់តួនាទីជាផលិតករប្រតិបត្តិឱ្យកូនច្បងរូបនេះទទួលខុសត្រូវ។
យោងតាមការបង្ហោះដោយ The Hollywood Reporter ភាពយន្តខ្នាតធំដែលជា Project សម្រាប់ Netflix មួយនេះត្រូវបានលោកស្រីប្រគល់ឱ្យកូនប្រុសដែលមានវ័យត្រឹម១៥ឆ្នាំទទួលខុសត្រូវការងារធំជួយដល់ខ្លួន ដោយលោកស្រីយល់ថាកូនប្រុសបណ្ដូលចិត្តមានទំនាក់ទំនងយ៉ាងស៊ីជម្រៅជាមួយនឹងសាច់រឿងនេះ។
រំលឹកឡើងវិញ «មុនដំបូងខ្មែរក្រហមសម្លាប់ឪពុកខ្ញុំ» ជាខ្សែភាពយន្តដែលបរិយាយរំលេចពីគ្រួសាររបស់ Loung Ung ដែលបាននិយាយពីការរស់រានមានជីវិតរបស់លោកស្រីក្នុងរបបកុំមុយនីស្តខ្មែរក្រហម ដែលបានសម្លាប់ជីវិតប្រជាពលរដ្ឋខ្មែរជាង២លាននាក់ចន្លោះឆ្នាំ ១៩៧៥-១៩៧៩។
Maddox កូនប្រុសច្បងនិងជាកូនចិញ្ចឹមរបស់ Jolie មានស្រុកកំណើតនៅកម្ពុជា ដូច្នេះហើយលោកស្រីតែងតែធ្វើដំណើរទៅមកអាមេរិកកម្ពុជា ដែលធ្វើឱ្យលោកស្រីមានអនុស្សាវរីយ៍ជាច្រើនជាមួយនឹងកម្ពុជាហើយចាត់ទុកថាជាផ្ទះទីពីររបស់ខ្លួន។
ក្នុងកំឡុងផលិតភាពយន្តនោះដែរ កូនៗរបស់លោកស្រី Jolie បានមកស្នាក់នៅកម្ពុជាហើយទាំងលោកស្រី និង Director សុទ្ធតែលើកឡើងដូចគ្នាថាក្មេងៗស្និទ្ធស្នាលនឹងកុមារនៅកម្ពុជា។ អ្វីដែលមិនអាចប្រកែកបាននោះគឺ Maddox ទទួលបានកិត្តិយសនិងតួនាទីជាផលិតករប្រតិបត្តិនៅក្នុងភាពយន្តនេះគឺដោយសារតែការផ្ដល់ឱកាសពីម្ដាយរបស់គេ ប៉ុន្តែបើតាមការលើកឡើងពីលោកស្រី កូនប្រុសច្បងរបស់ខ្លួនបានលះបង់យ៉ាងសម្បើមដើម្បីធ្វើឱ្យ Project នេះដំណើរការទៅដោយរលូន។ «គេគឺជាអ្នកដែលចង់ធ្វើហើយគេនិយាយថាគេបានត្រៀមខ្លួនជាស្រេច ហើយគេពិតជាចង់ធ្វើលើកិច្ចការងារនេះខ្លាំងណាស់ ហើយគេក៏បានធ្វើ។ គេបានអានសេណារីយ៉ូ ហើយបានកត់ចំណាំចំណុចផ្សេងៗ ក៏ដូចជាចូលរួមក្នុងការប្រជុំនៃដំណើរការផលិតផងដែរ»។
ថ្វីត្បិតតែ Maddox បានចូលរួមជួយម្ដាយក្នុងការផលិតភាពយន្ត ប៉ុន្តែនៅពេលចូលសិក្សាមហាវិទ្យាល័យគេបែរជាមិនជ្រើសរើសនូវជំនាញផលិតកុននោះឡើយ តែគេបានជ្រើសរើសសិក្សាផ្នែកជីវគីមី នៅសកលវិទ្យាល័យរបស់កូរ៉េ Yonsei ក្នុងទីក្រុងសេអ៊ូល៕
ប្រភព៖ zululion.com