បន្ទាប់ពីក្រុមជម្រើសជាតិបាល់ទាត់ក្នុងសាលកម្ពុជា បានចាញ់ក្រុមបាល់ទាត់ហ្វូតសាលជម្រើសជាតិអ៊ីរ៉ាក់ ក្នុងលទ្ធផល ៧-០ នៃការប្រកួតពានរង្វាន់ AFC Futsal Asian 2024 វគ្គជម្រុះ កាលពីថ្ងៃទី៩ ខែតុលា ឆ្នាំ២០២៣ នៅទីលាន SAMO SPORTS COMPLEX ក្នុងទីក្រុង Fergana នៅប្រទេសអ៊ូសបេគីស្ថាន ដូច្នេះកម្ពុជា អស់ឱកាសឡើងទៅវគ្គបន្ត ក្រោយចាញ់២ប្រកួតជាប់គ្នា។
លទ្ធផលរបស់ក្រុមបាល់ទាត់ហ្វូតសាលជម្រើសជាតិកម្ពុជា៖
- កម្ពុជា ១-៦ អ៊ូសបេគីស្ថាន
- កម្ពុជា ០-៧ អ៊ីរ៉ាក់
- ថ្ងៃទី១១ តុលា៖ ម៉ាឡេស៊ី ប៉ះ កម្ពុជា ម៉ោង៥ល្ងាច។
គួរដឹងថាក្រុមបាល់ទាត់ហ្វូតសាលជម្រើសជាតិកម្ពុជា ស្ថិតនៅក្នុងពូល G ជាមួយម្ចាស់ផ្ទះអ៊ូបេគីស្ថាន, អ៊ីរ៉ាក់ និងម៉ាឡេស៊ី ក្នុងការប្រកួតជើងឯកប្រចាំទ្វីបអាស៊ី AFC Futsal Asian Cup 2024 ដែលចាប់ផ្ដើមចាប់ពីថ្ងៃទី៧ ដល់ថ្ងៃទី១១ ខែតុលា ឆ្នាំ២០២៣។
ព្រឹត្តិការណ៍ ប្រកួតជើងឯកប្រចាំទ្វីបអាស៊ី AFC Futsal Asian Cup 2024 ឆ្នាំនេះដោយក្រុមចូលរួមចំនួន ៣១ ត្រូវចាប់ចូលតាមពូលនីមួយៗ ដើម្បីប្រកួតជម្រុះ ស្វែងរកក្រុមខ្លាំងចំនួន ១៦ឡើងទៅជុំបន្តស្វែងរកជើងឯក។
ពានរង្វាន់នេះធ្វើឡើងរាល់២ឆ្នាំម្តងគិតចាប់តាំងពីឆ្នាំ១៩៩៩ មកម៉្លេះ ដោយក្រុមជប៉ុន ជាម្ចាស់ជើងឯកឆ្នាំចាស់ក្នុងឆ្នាំ២០២២ ដែលប្រទេសគុយវ៉ែត ជាម្ចាស់ផ្ទះ ស្របពេលដែលក្រុមអ៊ីរ៉ង់ ក្រុមឈ្នះជើងឯកច្រើនជាងគេរហូតដល់ទៅ១២សម័យកាល៕