ភ្នំពេញ៖ ស្ពានខ្សែរកាបកោះពេជ្រ ឆ្លងទៅកោះនរា ឆ្ពោះទៅផ្លូវជាតិលេខ១ និងបើកឱ្យបងប្អូនជិះឆ្លងកាត់រយៈពេល៣ថ្ងៃ គឺចាប់ពីថ្ងៃទី១៣ ដល់១៥ ខែតុលា ឆ្នាំ២០២៣ ដើម្បីជួយសម្រួលចរាចរណ៍ ដល់ពលរដ្ឋដែរចង់ទៅលេងស្រុកកំណើត នាឪកាសបុណ្យភ្ជុំបិណ្ឌ។
ដោយមើលឃើញពីការលំបាករបស់បងប្អូនប្រជាពលរដ្ឋពេលធ្វើដំណើរនៅថ្ងៃភ្ជុំបិណ្ឌ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី នៃព្រះរាជាណាចក្រកម្ពុជាបានសម្រេចអនុញ្ញាតឱ្យប្រើប្រាស់បណ្ដោះអាសន្ន ស្ពានកោះពេជ្រ កោះនរា ក្នុងរយៈពេល៣ថ្ងៃ នៃពិធីបុណ្យភ្ជុំបិណ្ឌ។
ការសម្រេចនេះ គឺដើម្បីកាត់បន្ថយការកកស្ទះចរាចរណ៍ និងបង្កលក្ខណៈងាយស្រួលក្នុងការធ្វើដំណើររបស់ប្រជាពលរដ្ឋ ពីថ្ងៃទី១៣ ដល់ថ្ងៃទី១៥ ខែតុលា ឆ្នាំ២០២៣។
ក្រោយផុតរយៈពេល៣ថ្ងៃនេះ ការធ្វើចរាចរណ៍នឹងត្រូវផ្អាកវិញ ដោយរង់ចាំរហូតដល់ការដ្ឋានសាងសង់បញ្ចប់ទាំងស្រុង នៅអំឡុងថ្ងៃទី២០ ឬថ្ងៃទី២៣ ខែតុលា ឆ្នាំ២០២៣ខាងមុខ។ ក្រោយបញ្ចប់ការស្ថាបនាទាំងស្រុង អាជ្ញាធរនឹងដាក់ឲ្យប្រើប្រាស់តែម្ដង។ នេះបើតាមឯកឧត្តម ឃួង ស្រេង អភិបាលរាជធានីភ្នំពេញ បញ្ជាក់ប្រាប់បណ្តាញសារព៏ត៌មានកាលពីពេលថ្មីៗនេះ។
ការសាងសង់ស្ពានខ្សែកាប តភ្ជាប់ចរាចរណ៍រវាងតំបន់អភិវឌ្ឍកោះនរា និងតំបន់អភិវឌ្ឍកោះពេជ្រ បាននិងកំពុងដំណើរសាងសង់ដោយ ក្រុមហ៊ុន O.C.I.C ដែលត្រូវបានបើកការដ្ឋានសាងសង់ កាលពីថ្ងៃទី២៦ ខែតុលា ឆ្នាំ២០២០ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នីតិកាលទី៦ នៃរដ្ឋសភា។ មកទល់បច្ចុប្បន្ន ក្រុមហ៊ុនសម្រេចការសាងសង់បានប្រមាណ ៩៥% ហើយ។
កន្លងមកដើម្បីដោះស្រាយបញ្ហាកកស្ទះចរាចរណ៍ នៅចំណុចស្ពានព្រះមុនីវង្ស បើទោះបីរដ្ឋបាលរាជធានីភ្នំពេញ បានដាក់ឲ្យដំណើរការសាឡាងដឹកអ្នកដំណើរ រវាងតំបន់ខណ្ឌច្បារអំពៅ និងតំបន់ខណ្ឌចំការមនក្តី ក៏នៅមិនទាន់ឆ្លើយតបនឹងតម្រូវការ និងកំណើនមធ្យោបាយដឹកជញ្ជូននៅឡើយ គ្រាន់តែធ្វើឱ្យស្ថានភាពចរាចរណ៍មានភាពធូរស្រាលបន្តិច។
គួរបញ្ជាក់ដែរថា សម្រាប់ការបើកឱ្យប្រើប្រាស់ជាបណ្ដោះអាសន្ននូវស្ពានកោះពេជ្រ-កោះនរានេះ សម្តេចធិបតី បានអនុញ្ញាតឱ្យធ្វើចរាចរណ៍ ផ្លូវស្ពានមួយចំហៀង សម្រាប់ការធ្វើដំណើរទាំងទ្វេទិស និងកំណត់ទម្ងន់មធ្យោបាយដឹកជញ្ជូនឆ្លងកាត់ ត្រឹមទម្ងន់៥តោន ចុះក្រោមតែប៉ុណ្ណោះ៕
អត្ថបទ៖ សង្គម
