ព្រឹត្តិការណ៍ប្រកួត កីឡាកម្រិតទ្វីបអាស៊ី Asian Games 2022 នៅទីក្រុង Hangzhou ប្រទេសចិន បានបិទបញ្ចប់កាលពីល្ងាចថ្ងៃទិ៨ ខែតុលា ឆ្នាំ២០២៣ ដោយម្ចាស់ផ្ទះចិន ដណ្ដើមបានមេដាយច្រើនជាងគេសរុបចំនួន ៣៨៣គ្រឿង ក្នុងនោះប្រទេសអាស៊ានចំនួន ១០ដណ្ដើមបានមេដាយ ក្នុងចំណោម ៤៥ប្រទេសចូលរួម។
ឯកឧត្តមវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានមានប្រសាសន៍ថា៖ «មិត្តចិនបានបន្តជួយជ្រោមជ្រែងឧបត្ថម្ភគាំទ្រដល់កម្ពុជាលើផ្នែកហ្វឹកហាត់រយៈពេលវែង និងសម្ភារ ឧបករណ៍កីឡា សម្រាប់ដំណើររបស់កម្ពុជាដែលកំពុងត្រៀមខ្លួនឆ្ពោះទៅទទួលធ្វើម្ចាស់ផ្ទះ ព្រឹត្តិការណ៍កីឡាយុវជនអាស៊ី លើកទី៤ នាឆ្នាំ២០២៩ ខាងមុខ នៅរាជធានីភ្នំពេញ»។
កម្ពុជា ណ្ដើមបានមេដាយសំរឹទ្ធ ១គ្រឿង ដោយក្រុមកីឡាការិនីការ៉ាតេកម្ពុជា ដែលមានកីឡាការិនី ថាត់ ឆេងហ័ង, អូន ស្រីដា និង ពុទ្ធា ស្រីណុច លើវិញ្ញាសាសម្ដែងមេគុននារីជាក្រុម ក្នុងព្រឹត្តិការណ៍ Asian Games លើកទី១៩ នៅទីក្រុង Hangzhou ប្រទេសចិន។ នេះគឺជាមេដាយតែមួយ ដែលអត្តពលិកកម្ពុជា ដណ្ដើមបានក្នុងព្រឹត្តិការណ៍កីឡាអាស៊ីឆ្នាំនេះ។
ក្រោយបញ្ចប់ព្រឹត្តិការណ៍ប្រកួត កីឡាកម្រិតទ្វីបអាស៊ី ឯកឧត្តមវ៉ាត់ ចំរើន បានមើលឃើញពីសត្ថភាពអត្តពលិកកម្ពុជាថា៖ «បើនិយាយពីកម្រិតបច្ចេកទេសពីស៊ីហ្គេម ទៅកីឡាអាស៊ី យើងបានហក់ដល់កម្រិតបច្ចេកទេស នៃការប្រកួតប្រជែងជាមួយគេ ដូចជាកីឡាអត្តពលកម្ម និងហែលទឹក ពួកគាត់បានបំបែកកំណត់ត្រាជាតិពីមុនៗខ្លាំង ហើយគាត់មានទេពកោសល្យ ដែលយើងអាចជំរុញគាត់បន្ថែម ដើម្បីឈានដល់មេដាយនាពេលឆាប់ៗខាងមុខ។ នេះគឺជាចំណុចល្អរបស់យើង ដែលគាត់រីកចម្រើនផ្នែកបច្ចេកទេស និងមានការប្រកួតប្រជែងស្វិតស្វាញល្អមើលជាងមុនៗ»។
សរុបមេដាយ ប្រទេសតំបន់អាស៊ានក្នុងព្រឹត្តិការណ៍ Asian Games លើកទី១៩ នៅទីក្រុង Hangzhou ប្រទេសចិន៖
គួរបញ្ជាក់ថា ព្រឹត្តិការណ៍កីឡា Asian Games 2022 នៅទីក្រុង Hangzhou ប្រទេសចិន បានប្រារព្ធពិធីបើកជាផ្លូវ កាលពីរាត្រីថ្ងៃទី២៣ កញ្ញា ដោយមានវត្តមាន ៤៥ប្រទេស ក្នុងទ្វីបអាស៊ីចូលរួមក្នុងព្រឹត្តិការណ៍មួយនេះ។ សម្រាប់កម្ពុជាបានបញ្ជូនប្រតិភូកីឡាសរុប ១៨៩នាក់ ក្នុងនោះអត្ដពលិកចំនួន ១១៤នាក់ មាន ១៧ប្រភេទកីឡា៕
ប្រភព៖ NOCC