សិល្បៈអន្តរជាតិ៖ កំពូលហូលីវីដ Angelina Jolie សម្ដែងភាពយន្តខ្នាតធំថ្មី ដោយរឿងនេះលោកស្រីនឹងសម្ដែងជាតួអង្គជាតារាចម្រៀងអូបេរ៉ា Miria Callas តារាចម្រៀង Soprano ដ៏ល្បីល្បាញជនជាតិដើមក្រិចសញ្ជាតិអាមេរិក។
ភាពយន្តដែលនឹងឆ្លុះបញ្ចាំងពីជីវប្រវត្តិក៏ដូចជាខ្សែជីវិតរបស់តារាចម្រៀង Maria Callas មុននឹងគាំងបេះដូងស្លាប់ក្នុងវ័យ៥៣ឆ្នាំ នាគេហដ្ឋាន ក្នុងទីក្រុងប៉ារីសប្រទេសបារាំងកាលពីថ្ងៃទី១៦ កញ្ញា ឆ្នាំ១៩៧៧។
អ្នកម្ដាយកូន៦រូបនេះបានប្រាប់កាសែត Dailymail ថា «ខ្ញុំទទួលសម្ដែងរឿងនេះដោយយកចិត្តទុកដាក់ ហើយខ្ញុំព្យាយាមយ៉ាងខ្លាំងដើម្បីប្រឈមនឹងបញ្ហាផ្សេងៗនៅក្នុងការសម្ដែង។ អ្នកដឹកនា Pablo Larrain គឺជាបុគ្គលមួយរូបដែលខ្ញុំគោរព។ ដូច្នេះមានឱកាសបានដើរតួអង្គដែលបរិយាយពីខ្សែជីវិតរបស់ Maria តាមរយៈការដឹកនាំរបស់លោក Pablo ថែមទាំងសរសេរសេណារីយ៉ូរឿងដោយលោក Steven Knight គឺជាអ្វីដែលខ្ញុំសុបិន»
ចំណែកលោក Pablo Larrain បានប្រាប់សារព័ត៌មាន Deadline ដែរថា៖ «ខ្ញុំពិតជារំភើបឥតឧបមាដែលបានចាប់ផ្ដើមផលិតរឿង Maria ខ្ញុំសង្ឃឹមថានឹងអាចឆ្លុះបញ្ចាំងពីជីវិតនិងអាជីពសិល្បៈរបស់ Maria Callas ឱ្យអ្នកទស្សនាទូទាំងពិភពលោកបានជ្រាប។ អរគុណចំពោះការនិពន្ធសេណារីយ៉ូដ៏អស្ចារ្យរបស់ steven Knight ការខិតខំប្រឹងប្រែងរបស់ក្រុមការងារទាំងអស់ ទាំងតារាសម្ដែងនិងក្រុមផលិត»
ភាពយន្តខ្នាតធំដែលនឹងលាតត្រដាងពីប្រវត្តិជីវិតរបស់បុគ្គលល្បីមួយរូបកាលពីជិត៥០ឆ្នាំមុននេះបានចំណាយពេលថតជាង៨សប្ដាហ៍នៅក្នុងក្រុងប៉ារីស ប្រទសក្រិក ប៊ុយដាប៉ែស (ប្រទេសហុងគ្រី) និង មីឡាន (ប្រទេសអ៊ីតាលី)។
គួរដឹងថាភាពយន្តខ្នាតធំបែបជីវប្រវត្តិជាប្រវត្តិសាស្ត្រនេះក្រៅពីលោកស្រី Angelina Jolie ដែលជាតួអង្គឯកហើយក៏មានតារាសម្ដែងល្បីៗជាច្រើនទៀតដូចជា៖ Pierfrancesco Favino, Alba Rohrwacher, Haluk Bilginer, Kodi Smit-McPhee និង Valeria Golino៕
ប្រភព៖ telegraph.co.uk
