ក្រុមជម្រើសជាតិកម្ពុជា បានត្រឹមស្មើក្រុមភ្ញៀវប៉ាគីស្ថាន ក្នុងលទ្ធផល ០-០ នៃវគ្គជម្រុះជុំទី១ បាល់ទាត់ពិភពលោក FIFA World Cup 2026 ជើងទី១ នៅពហុកីឡដ្ឋានជាតិ (ស្តាតអូឡាំពិក) រាជធានីភ្នំពេញ។
ជុំវិញលទញធផលនេះ Yudai Ogawa សំដែងការខក ចិត្តដែលស្មើរការ ប្រកួតជាមួយប៉ាគីស្ថានបើទោះបីជាគេក្លាយជាកីឡាករល្អប្រចាំការប្រកួតក៏ដោយ៖«វាគឺជាអារម្មណ៍ដ៏ពិសេសណាស់ ជាមួយនិងបរិយាកាសដ៏ល្អសម្រាប់ការប្រកួតក្នុងដី អរគុណអ្នកគាំទ្រទាំងអស់គ្នា»។
Yudai បន្ថែមថា៖«វាជារឿងល្អដែលខ្ញុំជាកីឡាករល្អប្រចាំការប្រកួត ប៉ុន្តែអ្វីដែលសំខាន់គឺឈ្នះការប្រកួត ខ្ញុំខកចិត្តជាមួយនឹងលទ្ធផល។ យើងត្រូវតែបង្ហាញឲ្យខ្លាំងជាងនេះ និងត្រូវបង្ហាញការលេងឲ្យល្អជាក្រុម ក៏ដូចជាម្នាក់ៗផងដែរ»។
កីឡាករបាល់ទាត់ដែលកំពុងប្រកបអាជីពនៅក្លិបភ្នំពេញក្រោន Yudai Ogawa មានដើមកំណើរជប៉ុន ទទួលបានសញ្ជាតិខ្មែរ ជាផ្លូវការ កាលពីថ្ងៃទី៦ តុលា និងបានចូលរួមជាមួយក្រុមបាល់ទាត់ជម្រើសជាតិកម្ពុជាប្រកួតជាមួយប៉ាគីស្ថាន។
ខ្សែការពារកណ្ដាល Yudai Ogawa ចាប់ផ្តើមលេងបាល់ទាត់អាជីពក្នុងឆ្នាំ២០១៥ ជាមួយក្រុម Gifu FC នៅលីគទី២ នៃប្រទេសជប៉ុន បង្ហាញខ្លួនបាន ៤លើក។ នៅឆ្នាំ២០១៧ រូបគេបានលេងនៅលីគទី ៤ប្រទេសប៉ូឡូញជាមួយក្រុម Widzew Łódź បង្ហាញខ្លួនបាន ៣លើក។
ដល់ឆ្នាំ២០១៨ Yudai បានមកចូលរួមជាមួយក្រុមក្រសួងការពារជាតិ (បច្ចុប្បន្នកងយោធពលខេមរភូមិន្ទ) នៃលីគកំពូលកម្ពុជា បង្ហាញខ្លួនបាន ១៨លើក រកបាន ១០គ្រាប់។
ខណ:ឆ្នាំ២០១៩/២០ ខ្សែបម្រើកណ្តាលរូបនេះបានចូលរួមជាមួយក្លិបអង្គរថាយហ្គឺរដែលមានមូលដ្ឋាននៅទឹកដីខេត្តសៀមរាប បង្ហាញខ្លួនបាន ១៤លើក រកបាន ២គ្រាប់។ ក្នុងឆ្នាំ២០២១ បានផ្ទេរមកកាន់ភ្នំពេញក្រោន បង្ហាញខ្លួនបាន ៤០លើក រកបាន ១០គ្រាប់ ព្រមទាំងជួយឲ្យក្លិបឈ្នះជើងឯក លីគកំពូលកម្ពុជា ២ឆ្នាំជាប់គ្នា។
សមាជិកភ្នំពេញក្រោន និងក្រុមជម្រើសជាតិកម្ពុជា រូបនេះ កើតនៅថ្ងៃទី៤ ខែតុលា ឆ្នាំ១៩៩៦ បច្ចុប្បន្នមានវ័យ ២៧ឆ្នាំ មានកម្ពស់ ១,៧៤ម៉ែត្រ រូបគេកើតនៅក្នុងខេត្ត Kanagawa គឺជាខេត្តមួយរបស់ប្រទេសជប៉ុន ដែលមានទីតាំងនៅតំបន់ Kantō នៃទីក្រុង Honshu ប្រទេសជប៉ុន។
សម្រាប់ជើងទី២ ក្រុមជម្រើសជាតិកម្ពុជា បានហោះទៅទឹកដីនៃប្រទេសប៉ាគីស្ថានហើយនៅព្រឹកថ្ងៃទី១៤ តុលានេះ ការប្រកួតនឹងធ្វើឡើងនៅក្នុងកីឡដ្ឋាន Islamabad Cricket Stadium ស្ថិតក្នុងទីក្រុង Islamabad ថ្ងៃទី១៧ ខែតុលា ឆ្នាំ២០២៣៕