កីឡាករ Privat Mbarga គ្មានឈ្មោះជួយក្រុមជម្រើសជាតិកម្ពុជា ប្រកួតជើងទី២ ក៏ពិតមែន ប៉ុន្តែក្រោយបានចូលរួមហ្វឹកហាត់ជាមួយក្រុមជម្រើសជាតិកម្ពុជា ខ្សែប្រយុទ្ធ Privatបាននិយាយថា៖ «ខ្ញុំពិតជាសប្បាយចិត្តដែលបានក្លាយជាពលរដ្ឋកម្ពុជា ហើយក៏សប្បាយចិត្តពេលដែលបានចូលរួមជាមួយជម្រើសជាតិកម្ពុជា ព្រោះវាជាលើកទីមួយ ដែលខ្ញុំបានមានឈ្មោះជាមួយក្រុមជម្រើសជាតិ»។
Privatបានលើកឡើងថា៖ «សម្រាប់ខ្ញុំគឺនឹងព្យាយាមបង្ហាញនូវរាល់សម្ថភាពដែលខ្ញុំមានទាំងអស់ ហើយទាំងអស់គ្នាដើម្បីកម្ពុជា នឹងរួមគ្នាយើងអាចធ្វើបាន។ សម្រាប់គ្រួសាររបស់ខ្ញុំ គឺគាំទ្រសម្រាប់ការលេងឲ្យកម្ពុជា ពួកគាត់យល់ព្រមជាមួយខ្ញុំដោយក្ដីរីករាយ ហើយខ្ញុំក៏សប្បាយចិត្តដែរ»។
ខ្សែប្រយុទ្ធ បានបន្ថែមថា៖ «ក្នុងចិត្តរបស់ខ្ញុំគឺខ្ញុំស្រលាញ់បាល់ទាត់ ខ្ញុំចង់លេងបាល់ទាត់ ហើយខ្ញុំរស់នៅកម្ពុជាច្រើនឆ្នាំរួចមកហើយ ខ្ញុំសង្ឃឹមថា នឹងរកគ្រាប់បាល់ឲ្យកម្ពុជាបានច្រើន និងជួយក្រុមឲ្យកាន់តែល្អប្រសើរ»។
ខ្សែប្រយុទ្ធដើមកំណើតម៉េរូន បានមកដល់កម្ពុជាដំបូងនៅឆ្នាំ២០១៣ ដោយចូលរួមជាមួយបឹងកេត មុននឹងផ្ទេរទៅកាន់ វេស្ទើន នៅឆ្នាំ២០១៤ ដល់ឆ្នាំ២០១៥ ហើយជើងទី២ បានផ្ទេរទៅអង្គរថាយហ្គឺរ ដោយបានបង្ហាញខ្លួនចំនួន ២២លើក រកបាន ១៩គ្រាប់។
នៅចុងឆ្នាំ២០១៦ បានផ្ទេរទៅចូលរួមជាមួយណាហ្គាវើលដ៍ មុននឹងទៅលេងនៅលីគកំពូលថៃ ជាមួយក្លិបSamut Prakan ដោយត្រលប់មក កម្ពុជា វិញនៅឆ្នាំ ២០១៨ ដល់ឆ្នាំ២០១៩ ជាមួយអាស៊ីអឺរ៉ុប (AEU) បង្ហាញខ្លួនបាន ២២លើក រកបាន ២៧គ្រាប់។
ខណ:នៅចុងឆ្នាំ២០១៩ បានចូលរួមជាមួយព្រះខ័នរាជស្វាយរៀង បង្ហាញខ្លួននៅលើទីលានបានចំនួន ៦២លើក រកបាន ៧៣គ្រាប់។ ចំណាយពេលជាមួយព្រះខ័នរាជស្វាយរៀង អស់រយ:ពេលជិត ៣ឆ្នាំ និងបានជួយឲ្យក្លិបឈ្នះជើងឯកក្របខណ្ឌកំពូលកម្ពុជា នៅឆ្នាំ២០១៩ ផងដែរ។
មុនបង្ហាញវត្តមានជាសមាជិកក្រុមជម្រើសជាតិកម្ពុជា ខ្សែប្រយុទ្ធ Privat បច្ចុប្បន្នកំពុងប្រកបអជីពក្នុងក្លិបបាល់ទាត់ Bali United Fc សមាជិកលីគកំពូលឥណ្ឌូនេស៊ី ដោយបានបង្ហាញខ្លួនចំនួន ៦៦លើក រកបាន ២២គ្រាប់។
ខ្សែប្រយុទ្ធដើមកំណើតកាមេរូន និងជាកីឡាករចូលសញ្ជាតិទី២ របស់កម្ពុជារូបនេះ មានឈ្មោះពេញ Jean Marie Privat Befolo Mbarga មានកម្ពស់ ១,៦៨ម៉ែត្រ កើតនៅថ្ងៃទី៧ ខែមករា ឆ្នាំ១៩៩២ នៅក្នុងទីក្រុង Douala ប្រទេសកាមេរ៉ូន បច្ចុប្បន្នមាវ័យ ៣១ឆ្នាំ។
ខ្សែប្រយុទ្ធ Privat កឺជាកីឡាករទី២ បន្ទាប់ពី Yudai Ogawa សម្រាប់ជួយក្រុមជម្រើសជាតិកម្ពុជា ក្នុងការប្រកួតផ្សេងៗ ក៏ដូចជាត្រៀមសម្រាប់ប្រកួតជម្រុះ ពានរង្វាន់បាល់ទាត់ពិភពលោក FIFA World Cup 2026 ក្រោមការដឹកនាំរបស់គ្រូបង្វឹកលោក Félix Dalmás សញ្ជាតិអាហ្សង់ទីន៕
