ប្រទេសនៅក្នុងតំបន់អាស៊ានមិនទាន់បានត្រៀមខ្លួនរួចរាល់ដើម្បីរួមគ្នាដេញថ្លៃធ្វើជាម្ចាស់ផ្ទះ ព្រឹត្តិការណ៍បាល់ទាត់ពិភពលោក FIFA World Cup 2034 នៅឡើយទេ។ នេះបើយោងតាមការលើកឡើងរបស់ឯកឧត្តម ខៀវ សាម៉េត ប្រធានសហព័ន្ធកីឡាបាល់ទាត់អាស៊ាន។
ឯកឧត្តម ខៀវ សាម៉េត បានប្រាប់សារព័ត៌មានត្រយង តាមរយ:សារអេឡិចត្រូនិក នៅព្រឹកថ្ងៃទី១៦ ខែតុលា ឆ្នាំ២០២៣នេះថា៖ «ចំពោះរឿងហ្នឹង (ដេញថ្លៃធ្វើម្ចាស់ផ្ទះ) គឺមានខាងសហព័ន្ធបាល់ទាត់ឥណ្ឌូណេស៊ី គាត់បានដើរប្រមូលប្រទេសក្នុងតំបន់មួយចំនួនមានម៉ាឡេស៊ី សិង្ហបុរី អូស្រ្តាលី… ធ្វើជាសហម្ចាស់ផ្ទះព្រឹត្តិការណ៍បាល់ទាត់ពិភពលោក FIFA World Cup 2034»។
ឯកឧត្តម ខៀវ សាម៉េត បានបន្តថា៖«ប៉ុន្តែរហូតមកដល់ពេលនេះ ខាងម៉ាឡេស៊ី ក៏បានបញ្ជាក់រួចរាល់ មិនមានបំណងចូលរួមទេ ដូចនេះនៅសល់តែ សិង្ហបុរី នៅមិនទាន់មានជំហរច្បាស់លាស់ ដូចនេះនៅសល់តែឥណ្ឌូណេស៊ី និងអូស្ត្រាលី ខណ:អូស្ត្រាលី ក៏បានចេញសេចក្ដីថ្លែងការណ៍កាលពីខែមុន ចង់ធ្វើជាម្ចាស់ផ្ទះ តែមិនបានបញ្ជាក់ចូលរួមធ្វើជាមួយប្រទេសឥណ្ឌូណេស៊ីឡើយ»។
ប្រធានសហព័ន្ធកីឡាបាល់ទាត់អាស៊ាន បានបញ្ជាក់ថា៖ «ចំពោះខ្ញុំយល់ថា យើង(អាស៊ាន) មិនទាន់ត្រៀមខ្លួនរួចរាល់សម្រាប់ ឆ្នាំ២០៣៤។ ដោយសារមានកត្តាជាច្រើនក្នុងការធ្វើជាម្ចាស់ផ្ទះ ទី១ គឺរឿងនយោបាយ ទី២ ហិរញ្ញវត្ថុ និងទី៣ បច្ចេកទេស។ អីចឹងខ្ញុំគិតថា យើងមិនទាន់ត្រៀមខ្លួនរួចរាល់ ដើម្បីធ្វើជាម្ចាស់ផ្ទះព្រឹត្តិការណ៍បាល់ទាត់ពិភពលោក FIFA World Cup 2034 ឡើយ»។
ឯកឧត្តម ខៀវ សាម៉េត បានបន្ថែមថា នៅថ្ងៃទី១៧ ខែតុលា នេះ នឹងមានការប្រជុំមួយរបស់អគ្គលេខាដ្ឋានអាស៊ាន អាចនិងការជជែកអំពីរឿងហ្នឹង ប៉ុន្តែរហូតមកដល់ម៉ោងនេះមានប្រទេសចំនួន ៨ទៅ៩ នៅអាស៊ាន បានគាំទ្រប្រទេសអារ៉ាប៊ីសាអូឌីត ដើម្បីធ្វើជាម្ចាស់ផ្ទះព្រឹត្តិការណ៍បាល់ទាត់ពិភពលោក FIFA World Cup 2034។
ប្រទេសអារ៉ាប៊ីសាអូឌីត ក៏ចាប់ផ្តើមដេញថ្លៃធ្វើជាម្ចាស់ផ្ទះ World Cup 2034 ក្រោយប្រធាន FIFA លោក Gianni Infantino បានប្រកាស ព្រឹត្តិការណ៍បាល់ទាត់ដ៏ធំមួយនេះ នឹងផ្តល់អទិភាពខ្ពស់ដល់ប្រទេសដែលមានមូលដ្ឋាននៅទ្វីបអាស៊ី។ ស្របពេលប្រទេសអាស៊ានដូចជា ម៉ាឡេស៊ី ទីម័រខាងកើត ឬឡាវ កំពុងគាំទ្រ ក៏ដូចជាបណ្តាប្រទេសជុំវិញពិភពលោក ផងដែរ។
សម្រាប់ព្រឹត្តិការណ៍ FIFA World Cup ក្នុងឆ្នាំ ២០២៦ គឺមានប្រទេសចំនួន៣ រួមគ្នាធ្វើជាសហម្ចាស់ផ្ទះក្នុងនោះ មានដូចជាប្រទេសកាណាដា ម៉ិកស៊ិក និងសហរដ្ឋអាមេរិក (ស្ថិតនៅទ្វីបអាមេរិកខាងជើង)។
សម្រាប់ឆ្នាំ២០៣០ ឃើញថាប្រទេសម៉ារ៉ុក ព័រទុយហ្គាល់ និងអេស្ប៉ាញ បានរួមគ្នាដេញថ្លៃធ្វើជាម្ចាស់ផ្ទះ (ទ្វីបអឺរ៉ុប) ប៉ុន្តែត្រូវមានលក្ខខណ្ឌមួយ គឺ៣ប្រកួតដំបូងនៅ FIFA World Cup 2030 គឺតម្រូវឱ្យប្រទេសអ៊ុយរូហ្គាយ អាហ្សង់ទីន និងប៉ារ៉ាហ្គាយ (ទ្វីបអាមេរិកខាងជើង) ធ្វើជាម្ចាស់ផ្ទះសិន ដើម្បីប្រារព្ធខួប ១០០ ឆ្នាំនៃព្រឹត្តិការណ៍ World Cup៕