ក្លិបបាល់ទាត់ភ្នំពេញក្រោន បានយកឈ្នះក្រុមខ្លាំងអូស្រ្តាលី Macarthur FC ក្នុងលទ្ធផល ៣-០ នៅកីឡដ្ឋានជាតិ (ស្តាតអូឡាំពិក) ប្រកួតទី៣ នៅយប់ថ្ងៃទី២៦ ខែតុលា វគ្គជម្រុះ ឡើងឈរកំពូលតារាងពូល F នៃពានរង្វាន់ AFC Cup 2023/24។
ជុំវិញលទ្ធផលនេះលោក Oleg Starynskyi ក្នុងការបង្កើតប្រវត្តិសាស្រ្តថ្មីយកឈ្នះក្លិបមកពីអូស្ត្រាលី Macarthur FC៖ «វាគឺជាការឈានទៅមុខដ៏សំខាន់សម្រាប់បាល់ទាត់កម្ពុជា ដែលឲ្យយើងយល់ថាយើងអាចប្រជែង នឹងលេងបានជាមួយពួកគេ។ ខ្ញុំសង្ឃឹមថាជ័យជម្នះនេះនឹងធ្វើឲ្យយើងមានភាពជឿជាក់ដើម្បីទទួលបានសមិទ្ធផលបន្ថែមទៀតនាពេលខាងមុខ។ យើងលេងបាល់ទាត់តាមរបៀបរបស់យើង ជាមួយនឹងជំនឿចិត្ត»។
គ្រូបង្វឹករូបនេះបន្តថា៖ «ការការពារ និងការវាយបកមិនមែនជាអ្វីដែលយើងចូលចិត្តនោះទេ ដូច្នេះខ្ញុំពិតជាសសើរកីឡាករទាំងអស់ ដែលខំប្រឹងក្នុងការធ្វើការងារដ៏អស្ចារ្យនេះ។ យើងបានលេងដោយភាពជឿជាក់ ខ្ញុំបានប្រាប់កីឡាករថាត្រូវបន្តដាក់សម្ពាធទៅកាន់ Macarthur ព្រោះនេះគឺជាការប្រកួតក្នុងដីរបស់យើង ពួកគេក៏មានសម្ពាធ ហើយយើងក៏កំពុងតែគ្រប់គ្រងការប្រកួតផងដែរ។ ការប្រកួតជាមួយ Macarthur នៅអូស្រ្តាលីវានឹងជាការប្រកួតដែលពិបាកខ្លាំងសម្រាប់យើង ហើយនេះគឺជាការសាកល្បងដ៏ពិតប្រាកដមួយ។ យើងនឹងបន្តលេងដោយភាពជឿជាក់គ្រប់ការប្រកួតប្រជែងទាំងអស់»។
ដោយឡេកសម្រាប់លោក Mile Sterjovski ក្លិបបាល់ទាត់ Macarthur FC បាននិយាយថា៖ «យើងដឹងហើយថានេះគឺជាការប្រកួតដ៏ពិបាក់សម្រាប់យើង ហើយពួកគេគឺជាក្រុមមួយដ៏ល្អ និងពិតជាស័ក្តិសមទទួលបានជ័យជម្នះនេះ។ ពួកគេធ្វើបានល្អជុំការបោះបាល់ពីក្រោយខ្នងខ្សែការពារ រួមជាមួយចលនានៃការលេងនៅលើទីលាននេះគឺជាភាពខ្លាំងរបស់បួកគេ»។
គ្រូ Macarthur បានបន្ថែមថា៖ «ជាការពិតណាស់យើងពិតជារីករាយជាមួយនិងការទទួលរបស់ម្ចាស់ផ្ទះ យើងមកទីនេះដើម្បីលេងបាល់ទាត់ ប៉ុន្តែខ្ញុំមានអារម្មណ៍ថាខកចិត្តនិងទម្រងលេងរបស់ក្រុមខ្ញុំផងដែរ ព្រោះថាយើងធ្វើដំណើរមកវែងឆ្ងាយ អាកាសធាតុក៏អាចមានផលប៉ះពាល់បន្តិបន្តួចដែរ។ ជុំវិញទីលាន និងអ្នកគាំទ្រពួកយើងមិនអាចនិយាយបាន ដោយយើងបានត្រៀមខ្លួនប្រកួតជាមួយមនុស្សដ៏ច្រើននៅលើទីលាន អ្វីដែលខកចិត្តទម្រង់លេងរបស់ក្រុម និងត្រៀមខ្លួនសម្រាប់ការប្រកួតបន្ទាប់»។
តារាងចំណាត់ថ្នាក់ពូល F៖
- ភ្នំពេញក្រោន ៣ប្រកួត ឈ្នះ៣ ៩ពិន្ទុ
- Macarthur FC ៣ប្រកួត ឈ្នះ២ និងចាញ់១ មាន៦ពិន្ទុ
- Cebu ៣ប្រកួត ឈ្នះ១ និងចាញ់២ មាន៣ពិន្ទុ
- Shan United ៣ប្រកួត ចាញ់ទាំង៣ មានសូន្យពិន្ទុ៕