សហព័ន្ធខ្មែរកីឡាហែលកម្ពុជា កំពុងរៀបចំការប្រកួតកីឡាហែលទឹក និងកីឡាហែលទឹកពាក់ជើងទា ជ្រើសរើសជើងឯកថ្នាក់ជាតិ ប្រចាំឆ្នាំ២០២៣ ដោយការប្រកួតបានចាប់ផ្ដើមពីថ្ងៃទី២៦ និងបញ្ជប់នៅថ្ងៃទី២៨ តុលា ឆ្នាំ២០២៣ ។
ក្នុងការប្រកួតឆ្នាំនេះ សហព័ន្ធខ្មែរកីឡាហែលទឹក បានសម្រេចបន្ថែមការប្រកួតហែលទឹកពាក់ជើងទា (FIN Swimming) ទៅក្នុងការប្រកួតជ្រើសរើសជើងឯកថ្នាក់ជាតិប្រចាំឆ្នាំ ២០២៣ របស់ខ្លួន ដើម្បីស្វែងរកអត្តពលិកមានសមត្ថភាពឆ្នើមៗ ចូលទៅក្នុងក្រុមជម្រើសជាតិ
ការបញ្ចូលនេះដែរ បន្ទាប់ពីប្រភេទវិញ្ញាសាថ្មីមួយនេះ បានបំបែកកំណត់ត្រាឈ្នះមេដាយមាស ជាប្រវត្តិសាស្រ្តលើកដំបូង ក្នុងការប្រកួតស៊ីហ្គេមលើកទី៣២ ឆ្នាំ ២០២៣ កាលពីខែឧសភា ក្រោយពេលក្រុមហែលទឹកកម្ពុជា បានរង់ចាំអស់រយៈពេល ៥០ ឆ្នាំ។
ការប្រកួតត្រូវបានធ្វើឡើងនៅអាងហែលទឹក នៃពហុកីឡដ្ឋានជាតិ ចាប់ពីថ្ងៃទី២៦ ដល់ថ្ងៃទី ២៨ ខែតុលា ឆ្នាំ២០២៣។ សម្រាប់វិញ្ញាសាប្រកួត និងកម្រិតអាយុ ដែលអាចចូលរួមការប្រកួតកីឡាហែលទឹក និងកីឡាហែលទឹកពាក់ជើងទា ជ្រើសរើសជើងឯកថ្នាក់ជាតិ ប្រចាំឆ្នាំ២០២៣ មានដូចខាងក្រោម៖
I. សម្រាប់ប្រភេទកីឡាហែលទឹកកម្រិតអាយុ ដែលអាចចូលរួមប្រកួតបានគឺមាន
១. ផ្នែកបុរស កីឡាករ ត្រូវមានអាយុចាប់ពី ១២ឆ្នាំឡើងទៅ
២. ផ្នែកនារី កីឡាការិនី ត្រូវមានអាយុចាប់ពី ១២ឆ្នាំឡើងទៅ
II. សម្រាប់ប្រភេទកីឡា FIN Swimming កម្រិតអាយុ ដែលអាចចូលរួមប្រកួតបានគឺមាន
១. ផ្នែកបុរស កីឡាករ ត្រូវមានអាយុចាប់ពី ១៤ឆ្នាំឡើងទៅ
២. ផ្នែកនារី កីឡាការិនី ត្រូវមានអាយុចាប់ពី ១៤ឆ្នាំឡើងទៅ
តារាងចំណាត់ថ្នាក់ ថ្ងៃទី១ នៃការប្រកួតកីឡាហែលទឹក និងកីឡាហែលទឹកពាក់ជើងទា ជ្រើសរើសជើងឯកថ្នាក់ជាតិ ឆ្នាំ២០២៣ ត្រូវនឹងថ្ងៃព្រហស្បតិ័ ទី២៦ ខែតុលា ឆ្នាំ២០២៣ នៅអាងហែលទឹកនៃពហុកីឡដ្ឋានជាតិ រាជធានីភ្នំពេញ ។
សូមបញ្ជាក់ថា ការប្រកួតកីឡាហែលទឹកជ្រើសរើសជើងឯកថ្នាក់ជាតិ គឺជាការប្រកួតកម្រិតបច្ចេកទេសខ្ពស់បំផុតរបស់ថ្នាក់ជាតិ ដើម្បីផ្តល់ឱកាសដល់កីឡាករ កីឡាការិនីនានាបានបញ្ចេញសមត្ថភាព និងសម្រិតសម្រាំងម្ចាស់ជ័យលាភីប្រចាំឆ្នាំផងដែរ៕