ពានរង្វាន់ជើងឯកប្រចាំទ្វីបអាមេរិកខាងជើង 2021 CONCACAF Gold Cup បានរកឃើញក្រុមខ្លាំងឡើងដល់វគ្គផ្ដាច់ព្រ័ត្រហើយ ក្នុងនោះមានសហរដ្ឋអាមេរិក និងក្រុមម៉ិចស៊ីកូ គិតត្រឹមព្រឹកថ្ងៃសុក្រ ទី៣០ ខែកក្កដា ឆ្នាំ២០២១ ក្រោយយកឈ្នះគូប្រកួតទាំងវេទនារៀងៗខ្លួននៅវគ្គពាក់កណ្ដាលផ្ដាច់ព្រ័ត្ត។
ម្ចាស់ផ្ទះអាមេរិក ឡើងដល់វគ្គផ្ដាច់ព្រ័ត្រ ក្រោយយកឈ្នះលើក្រុមអាស៊ី គឺកាតារ ដោយលទ្ធផល១ទល់០ លើទីលានកីឡដ្ឋាន Q2 Stadium ក្នុងទីក្រុង Austin រដ្ឋ Texas។ គ្រាប់បាល់ជ័យជម្នះនេះរកបានដោយថ្វីជើងកីឡាករ Gyasi A. Zardes នៅនាទី៨៦ ពោលគឺមុនការប្រកួតបញ្ចប់៤នាទី។
ចំណែកក្រុមម៉ិចស៊ីកូ ដែលធ្លាប់ឈ្នះជើងឯកពានរង្វាន់នេះច្រើនជាងគេគឺរហូតដល់១១សម័យកាល បានយកឈ្នះលើក្រុមកាណាដា ដោយលទ្ធផល២ទល់១ លើទីលានកីឡដ្ឋាន NRG Stadium នៅ Houston រដ្ឋ Texas។ ដំបូងឡើយក្រុមម៉ិចស៊ីកូ បានរកគ្រាប់បាល់នាំមុខមុននៅនាទី៤៥+២ ដោយថ្វីជើងកីឡាករ Pineda តែកីឡាករ Buchanan របស់កាណាដា បានរកគ្រាប់បាល់តាមស្មើវិញ នៅនាទី៥៧។ ការប្រកួតបន្តរហូតដល់ម៉ោង៩០+៩ ទើបកីឡាករ Herrera រកគ្រាប់បាល់ចុងក្រោយនិងគ្រាប់បាល់ជ័យជម្នះឱ្យម៉ិចស៊ីកូ តែម្តង។
ពានរង្វាន់ 2021 CONCACAF Gold Cup រៀបចំឡើងពីថ្ងៃទី១០ ខែកក្កដា ដល់ថ្ងៃទី១ ខែសីហា ឆ្នាំ២០២១ នៅ១០កីឡដ្ឋាន ក្នុងចំណោម៩ទីក្រុងរបស់សហរដ្ឋអាមេរិក ដោយមានក្រុមចំនួន១៦ចូលរួម បែងចែកជា៤ពូល។ ក្រុមចំណាត់ថ្នាក់លេខ១និងលេខ២ក្នុងពូលមានឈ្មោះឡើងទៅប្រកួតវគ្គ៨ក្រុមចុងក្រោយ និងបន្តជម្រុះរហូតដល់វគ្គផ្ដាច់ព្រ័ត្រ។
ពានរង្វាន់ CONCACAF Gold Cup ជាការប្រកួតជើងឯកដែលមានក្រុមជម្រើសជាតិនៅទ្វីបអាមេរិកខាងជើង (បន្ថែមតំបន់អាមេរិកកណ្ដាល និងតំបន់ការ៉ាប៊ីន) ហើយរៀបចំនៅរាល់២ឆ្នាំម្តង ខណៈក្រុមជម្រើសជាតិម៉ិចស៊ីកូ ជាអ្នកឈ្នះជើងឯកបានច្រើនជាងគេគឺរហូតដល់១១លើកឯណោះ៕