កាលពីថ្ងៃទី២៩ ខែកក្កដា ឆ្នាំ២០២១ តារាសម្ដែង ឌី សូនីត្តា ឬ អ្នកលេងបណ្ដាញសង្គម និយមហៅថា ចែកាដុង បានផុសវីដេអូទាក់ទាញទឹកភ្នែកពីអ្នកទស្សនាព្រមទាំងរៀបរាប់ពីបុរសម្នាក់ដែលជាកម្លាំងបណ្ដាលនិងជំរុញទឹកភ្នែក ជួយឱ្យកញ្ញាសម្ដែងឈុតយំបានយ៉ាងល្អ។
នៅក្នុងវីដេអូមួយដែលកញ្ញា ឌី សូនីត្តា Selfie ដើម្បីទទួលពរជ័យពីអ្នកម្ដាយក្នុងឱកាសគំរប់ខួបអាយុ៣០ឆ្នាំរបស់ខ្លួននោះ គឺពោរពេញទៅដោយភាពរីករាយ អ្នកទស្សនាមើលបណ្ដើរសើចបណ្ដើរ ប៉ុន្តែនៅពេលមកដល់ជិតចុងបញ្ចប់វីដេអូដែលមានរយៈពេលពេញ ៧នាទីបន្តិចនោះ អ្នកទស្សនាបានប្ដូរអារម្មណ៍ពីសើចមកជាក្ដុកក្ដួល ស្រណោះអាណិតចំពោះតារាស្រីរូបនេះយ៉ាងខ្លាំងនៅពេលដែលរំលឹកដល់លោកឪពុកដែលបានចែកឋានចាកចោលក្រុមគ្រួសារឱ្យនៅកំព្រា។
បន្ថែមលើនោះអ្នកនាង បានបញ្ជាក់មូលហេតុដែលធ្វើឱ្យអ្នកនាង ឆាប់យំនោះគឺមានលោកឪពុកដែលចែកឋានរបស់អ្នកនាង ជាកម្លាំងជំរុញទឹកភ្នែកធ្វើឱ្យអ្នកនាងងាយយំ ក្នុងនោះដែរអ្នកនាងក៏សុំទោសចំពោះទស្សនិកជន ដែលចុងឃ្លីបវីដេអូរបស់អ្នកនាងមានតែទឹកភ្នែក។ ខាងក្រោមនេះគឺជាសំណេរទាំងស្រុង ដែលអ្នកនាង ឌី សូនីត្តា បានលើកឡើង ៖
«នេះជាមូលហេតុដែលខ្ញុំយំលឿនរាល់ពេលសម្តែងរឿង សូមទោស ខ្ញុំគ្មានបំណងធ្វើអោយបងប្អូន unhappy ending ទេ-មនុស្សប្រុសម្នាក់ ដែលខ្ញុំតែងតែឈ្លោះជាមួយរូបថតរបស់គេគ្រប់ពេលដែលខ្ញុំជួបបញ្ហា។ -មនុស្សប្រុសម្នាក់ ដែលធ្វើអោយខ្ញុំមានអារម្មណ៍ថាឈឺចាប់នៅអវត្តមានគេ។-មនុស្សប្រុសម្នាក់ ដែលធ្វើឲខ្ញុំស្រក់ទឹកភ្នែកគ្រប់ពេលដែលនឹកដល់គេ។-មនុស្សប្រុសម្នាក់ ដែលធ្វើអោយខ្ញុំស្រលាញ់ជាងគេហើយបំភ្លេចមិនបាននៅលើលោកនេះ គឺប៉ា My old Man ខ្ញុំពិតជានឹកអ្នកខ្លាំងណាស់ ប៉ាខ្ញុំសង្ឃឹមថា អ្នកនឹងមើលឃើញកូនស្រីរបស់អ្នកម្នាក់នេះពីលើមេឃមកពោពេញដោយមោទនភាព»
អ្នកគាំទ្រដែលបានទស្សនាវីដេអូដែលអ្នកនាងបង្ហោះរួច បានចូលមកលើកទឹកចិត្ត និង សរសើរចំពោះអ្នកនាង ឌី សូនីត្តា ដែលជាកូនកត្តញូ ថែមទាំងលើកឡើងទៀតថា ទស្សនាវីដេអូរបស់នាងកម្សត់ផង រំភើបផងដូចគ្នា៕