ម្ចាស់ពាន The Voice Cambodia រដូវកាលទីមួយ ក្មេងប្រុស ពេជ្រ ថៃ គឺជាតារាចម្រៀងវ័យក្មេងដែលទទួលបានការស្រលាញ់ចូលចិត្តពីមហាជនយ៉ាងខ្លាំង យ៉ាងណាមិញមហាជនផ្ដើមព្រួយបារម្ភក្រោយបានឃើញរូបភាពថ្មីចុងក្រោយរបស់ប្អូនរួមជាមួយនឹងមិត្តរួមផលិតកម្មហង្សមាស។
រូបភាពមួយសន្លឹករបស់ ពេជ្រ ថៃ ថតរួមជាមួយនឹងប្អូនស្រី សុខ សុជាតា និង ប្អូន ឡុង លីងគ័ង្គ បានធ្វើឲ្យមហាជនកើតមានក្ដីបារម្ភចំពោះ ពេជ្រ ថៃ ព្រោះតែកម្ពស់ ដែលមើលទៅកាន់តែមានភាពខុសគ្នាច្បាស់ឡើងៗរវាងអ្នកទាំងបី។ បើប្រៀបជាមួយនឹងសុខ សុជាតា ដែលមានអាយុដំណាលគ្នាជាមួយនឹង ពេជ្រ ថៃ ឃើញថា សុជាតា មានកម្ពស់ខ្ពស់ជាង ពេជ្រ ថៃយ៉ាងខ្លាំង ខណៈដែល ឡុង លីងគ័ង្គដែលមានអាយុប្អូន ពេជ្រ ថៃ ចំនួន ៣ឆ្នាំដែរនោះ ក៏មើលទៅខ្ពស់ជាង ពេជ្រ ថៃច្រើនដែរ។
រូបភាពការងារមួយសន្លឹកដែលធ្វើឱ្យមហាជនឃើញហើយព្រួយបារម្ភ នោះគឹជាការបង្ហោះរបស់ក្មួយប្រុស ឡុង លីងគ័ង្គ ដែលជាតារាចម្រៀងរួមទ្រនំជាមួយនឹងគ្នា ដោយការបង្ហោះនេះគឺបង្ហាញពីសកម្មភាពរួមការងាររបស់តារាចម្រៀងវ័យក្មេងទាំងបីដួងខាងលើប្រចាំផលិតកម្មហង្សមាស។
មកទល់នឹងឆ្នាំ ២០២១នេះកម្មវិធីប្រកួត The Voice Cambodia Season 1 បានកន្លងផុតទៅអស់រយៈពេល៤ឆ្នាំហើយ ពោលគឺរាប់តាំងពីឆ្នាំ២០១៧ ដែលកាលណោះ ពេជ្រ ថៃ មានអាយុ១២ ឆ្នាំ មកដល់ពេលនេះកុមារ ពេជ្រ ថៃ មានអាយុ ខ្ទង់១៥ ទៅ១៦ ឆ្នាំ ប៉ុន្តែក្មេងប្រុស ពេជ្រ ថៃ មិនសូវប្រែប្រួលកម្ពស់សោះ ដែលរឿងនេះបានធ្វើឱ្យអ្នកគាំទ្រដែលស្រលាញ់និងចូលចិត្តក្មួយ មានការបារម្ភចំពោះក្មួយជាខ្លាំង៕
