អគ្គលេខាធិការអង្គការសហប្រជាជាតិ លោក Antonio Guterres បាននិយាយកាលពីថ្ងៃចន្ទ ថា តំបន់ហ្កាហ្សាកំពុងក្លាយជា «ទីបញ្ចុះសពសម្រាប់កុមារ» ដោយបានអំពាវនាវឱ្យមានបទឈប់បាញ់នៅក្នុងតំបន់ ដែលអាជ្ញាធរសុខាភិបាលប៉ាឡេស្ទីនបាននិយាយថា ចំនួនអ្នកស្លាប់ដោយសារការវាយប្រហាររបស់អ៊ីស្រាអែលបានកើនឡើងលើសពី ១០,០០០នាក់ហើយ។ នេះបើយោងតាមការចេញផ្សាយដោយសារព័ត៌មាន CNA នាថ្ងៃអង្គារ ទី៧ ខែវិច្ឆិកា ឆ្នាំ២០២៣។
លោក Guterres បានប្រាប់អ្នកយកព័ត៌មានថា «ប្រតិបត្តិការលើផ្លូវគោកដោយកងកម្លាំងការពារអ៊ីស្រាអែល និងការទម្លាក់គ្រាប់បែកជាបន្តបន្ទាប់ កំពុងវាយប្រហារជនស៊ីវិល មន្ទីរពេទ្យ ជំរុំជនភៀសខ្លួន វិហារអ៊ីស្លាម ព្រះវិហារ និងកន្លែងរបស់អង្គការសហប្រជាជាតិ – រួមទាំងទីជម្រកនានា។ ក្នុងពេលជាមួយគ្នានេះ ក្រុមហាម៉ាស់ និងពួកសកម្មប្រយុទ្ធផ្សេងទៀតបានប្រើប្រាស់ជនស៊ីវិលជាខែលការពារមនុស្ស និងបន្តបាញ់គ្រាប់រ៉ុក្កែតដោយមិនរើសអើងឆ្ពោះទៅរកប្រទេសអ៊ីស្រាអែលវិញផងដែរ»។
ទាក់ទិននឹងបញ្ហានេះ អង្គការសហប្រជាជាតិ បានអំពាវនាវឱ្យមានការដោះលែងចំណាប់ខ្មាំងទាំងអស់ជាបន្ទាន់ និងដោយគ្មានលក្ខខណ្ឌ ដើម្បីឈានទៅរកផ្លូវបញ្ចប់នៃសង្រ្គាមមួយនេះ។ ខណៈអគ្គលេខាធិការអង្គការសហប្រជាជាតិបាននិយាយថា «តំបន់ហ្គាហ្សា កំពុងក្លាយជាទីបញ្ចុះសពរបស់កុមារ។ ក្មេងប្រុស ស្រី រាប់រយនាក់ត្រូវបានគេរាយការណ៍ថា បានស្លាប់ ឬរងរបួសជារៀងរាល់ថ្ងៃ»។
យ៉ាងណាម៉ិញ ទាំងភាគីអ៊ីស្រាអែល និងក្រុមសកម្មប្រយុទ្ធហាម៉ាស ដែលគ្រប់គ្រងតំបន់ហ្កាហ្សា សុទ្ធតែបានបដិសេធចំពោះសម្ពាធអន្តរជាតិ ដែលអំពាវសម្រាប់បទឈប់បាញ់ ដោយនាយករដ្ឋមន្រ្តីអ៉ីស្រាអែល បានលើកឡើងថា គ្មានបទឈប់បាញ់ឡើយ ប្រសិនបើមិនដោះលែងចំណាប់ខ្មាំងជាង ២០០នាក់ ដែលក្រុមហាម៉ាសបានចាប់ទៅក្នុងអំឡុងពេលនៃការវាយឆ្មក់ នៅភាគខាងត្បូងអ៊ីស្រាអែល កាលពីថ្ងៃទី៧ ខែតុលា ជាមុនសិន។
ជាមួយគ្នា ក្រុមសកម្មប្រយុទ្ធហាម៉ាស់និយាយថា ខ្លួននឹងមិនដោះលែងពួកគេ ឬបញ្ឈប់ការប្រយុទ្ធគ្នាទេ ខណៈតំបន់ហ្គាហ្សា កំពុងស្ថិតនៅក្រោមការវាយលុកពីភាគីអ៉ីស្រាអែលនៅឡើយ។
ក្រសួងសុខាភិបាលក្នុងតំបន់ហ្គាហ្សា ដែលគ្រប់គ្រងដោយក្រុមហាម៉ាស់ បាននិយាយថា មនុស្សយ៉ាងហោចណាស់ ១០,០២២នាក់ នៅតំបន់ហ្គាហ្សា ត្រូវបានសម្លាប់ចាប់តាំងពីការវាយបករបស់អ៉ីស្រាអែលកាលពីថ្ងៃទី២៧ ខែតុលា មក ក្នុងនោះមានកុមារចំនួន ៤,១០៤នាក់បានស្លាប់។
ដោយឡែកអង្គការអន្តរជាតិបាននិយាយថា មន្ទីរពេទ្យមិនអាចទប់ទល់នឹងអ្នករបួសបានទេ ហើយអាហារ និងទឹកស្អាតកំពុងចាប់ផ្ដើមអស់ជាមួយនឹងជំនួយមនុស្សធម៌។
ស្របពេលនេះដែរ សហរដ្ឋអាមេរិក កំពុងជំរុញយ៉ាងខ្លាំងក្នុងការរៀបចំឱ្យមានការផ្អាកក្នុងជម្លោះដើម្បីអនុញ្ញាតឱ្យមានជំនួយមនុស្សធម៌ចូលដល់តំបន់រងគ្រោះ និងកាត់បន្ថយចំនួនជនស៊ីវិលស្លាប់ និងរបួស។ សេតវិមានបាននិយាយថា ប្រធានាធិបតីអាមេរិកលោក ចូ បៃដិន បានពិភាក្សាអំពីការផ្អាកបែបនេះ និងការដោះលែងចំណាប់ខ្មាំងនៅក្នុងការសន្ទនាតាមទូរស័ព្ទជាមួយនាយករដ្ឋមន្ត្រី Benjamin Netanyahu កាលពីថ្ងៃចន្ទ ដោយបញ្ជាក់សារជាថ្មីនូវការគាំទ្ររបស់អាមេរិកចំពោះអ៊ីស្រាអែល នៅពេលដែលសង្កត់ធ្ងន់ថា ខ្លួនត្រូវតែការពារជនស៊ីវិល៕
