តបតាមការអញ្ជើញរបស់ក្លិបបាល់ទាត់សៀមរាបយូណាយធីត ក្លិបបាល់ទាត់វិសាខា នឹងបញ្ជូនក្រុមយុវជនអាយុក្រោម ១៤ឆ្នាំ ចូលរួមប្រកួតពានរង្វាន់យុវជនអន្ដរជាតិអាយុក្រោម ១៤ឆ្នាំ ប្រចាំខេត្តសៀមរាប (U14 XO Siem Reap International Youth Cup 2023) ចាប់ពីថ្ងៃទី១៧-១៩ ខែវិច្ឆិកា ឆ្នាំ២០២៣ ខាងមុខ នៅកីឡដ្ឋានហនុមាន ខេត្តសៀមរាប។
សម្រាប់ការប្រកួតពានរង្វាន់យុវជនអន្ដរជាតិ លើទឹកដីអង្គរនេះ សៀមរាបយូណាយធីត នឹងធ្វើជាម្ចាស់ផ្ទះ ដោយមានក្រុមយុវជន ៤ក្លិប មកពី ៣ប្រទេសចូលរួម ក្នុងនោះមានក្រុមម្ចាស់ផ្ទះ U14 សៀមរាបយូណាយធីត និងក្រុមយុវជន U14 វិសាខា។
ការប្រកួតនេះ មានការចូលរួមពីក្រុមបាល់ទាត់ថ្នាលធំ ២របស់ប្រទេសថៃ គឺ Buriram United Academy និង Chonburi FC Academy រួមនឹងក្រុមបាល់ទាត់ថ្នាលពីប្រទេសសិង្ហបុរី Lion City Sailors។
សម្រាប់អ្នកស្នេហាវិស័យកីឡាបាល់ទាត់ ពិសេសបងប្អូនប្រជាពលរដ្ឋ និងយុវជនរស់នៅខេត្តសៀមរាប នឹងចូលរួមទស្សនាការប្រកួតពានរង្វាន់ U14 XO Siem Reap International Youth Cup 2023 ឲ្យបានច្រើនកុះករ ដើម្បីផ្ដល់កម្លាំងចិត្តដល់ក្រុមយុវជន និងរួមចំណែកអភិវឌ្ឍន៍វិស័យកីឡាបាល់ទាត់កម្ពុជាផង។
សូមបញ្ជាក់ថា នេះគឺជាព្រឹត្តិការណ៍ប្រកួតអន្តរជាតិលើកដំបូងសម្រាប់ក្រុមបាល់ទាត់យុវជន របស់ខេត្តសៀមរាប និងរបស់ប្រទេសកម្ពុជាទាំងមូល៕
