ប៉េកាំង៖ តារាចម្រៀង-តារាសម្ដែងកូនកាត់ចិនកាណាដា Kris Wu ត្រូវបានចាប់ខ្លួនពីបទសង្ស័យរំលោភសេពសន្ថវៈលើនារីរងគ្រោះ។ នេះបើយោងតាមការចុះផ្សាយរបស់សារព័ត៌មាន BBCNEWS ។
សូមចុចអាន តារាល្បី Kris Wu ចេញមកច្រានចោលថាគ្មានការល្បួងលួងលោមក្មេងស្រីយកទៅរំលោភ!
មន្ត្រីនៅក្នុងទីក្រុង ប៉េកាំង បានឱ្យដឹងថាមជ្ឈមណ្ឌលស្រាវជ្រាវអនឡាញបានបញ្ជាក់ថា តារាល្បីវ័យ៣០ឆ្នាំបានបោកបញ្ឆោតនារីវ័យក្មេងជាច្រើនដងដើម្បីឱ្យយល់ព្រមរួមដំណេកជាមួយនឹងខ្លួន។
ការចោទប្រកាន់ទីមួយបានកើតឡើងតាំងពីដើមខែកក្កដា ដោយមានស្ត្រីម្នាក់បាននិយាយថា Kris Wu លោកបានលូកលាន់លើរាងកាយខ្លួនខណៈពេលស្រវឹង។ ប៉ុន្តែតារាល្បីរបស់ចិនរូបនេះបានបដិសេធគ្រប់ការចោទប្រកាន់ទាំងអស់។
ស្ត្រីទីមួយដែលបានចោទប្រកាន់លោកមានឈ្មោះ Du Meizhu ជាសិស្សមានអាយុ ១៩ឆ្នាំ បានផុសនៅលើបណ្ដាញសង្គម ថាកញ្ញាបានជួបជាមួយនឹងតារាខាងលើតាំងពីអាយុ១៧ឆ្នាំ។ កាលណោះកញ្ញាត្រូវបានអញ្ជើញឱ្យចូលរួមកម្មវិធីជប់លាងនៅផ្ទះរបស់ Kris ហើយក្រោយមកកញ្ញាត្រូវបានបង្ខំបង្អកស្រា ហើយពេលក្រោកឡើងឃើញខ្លួនឯងគេងលើគ្រែរបស់ Kirs Wu នៅថ្ងៃបន្ទាប់។
កញ្ញារូបនេះបាននិយាយថាមាននារី៧នាក់ផ្សេងទៀត បានប្រាប់ថាសុទ្ធតែត្រូវបាន Kris លួងលោមហើយសន្យាផ្ដល់ការងារនិងឱកាសផ្សេងៗឱ្យទៅពួកនាង។ យ៉ាងហោចណាស់មានស្ត្រីយ៉ាងតិច២៤នាក់ បានចេញមកចោទប្រកាន់លើអាកប្បកិរិយាមិនសមរម្យរបស់តារារូបនេះ។
ងាកមក Kris Wu បានបដិសេធរាល់ការចោទប្រកាន់ពីកញ្ញា Du ពាក់ព័ន្ធនឹងការបង្អកស្រា ថែមទាំងបដិសេធពីបទចោទប្រកាន់រឿងលួងលោភសន្យាផ្ដល់ប្រយោជន៍ឱ្យទៅពួកនាង ព្រមទាំងរំលោភពេលពួកនាងបាត់បង់ស្មារតី ពិសេសបំផុតនោះរំលោភទៅលើអនីតិជន។ ច្បាប់ប្រទេសចិន យុវវ័យមានអាយុក្រោម១៨ឆ្នាំត្រូវបានចាត់ទុកថាជាអនីតិជន តែអាយុដែលអនុញ្ញាតឱ្យមានសម្ព័ន្ធភាពផ្លូវភេទបានគឺអាយុ ១៤ឆ្នាំ។
Kris Wu ឬមានឈ្មោះជាភាសាចិន Wu Yifan កសាងបានកេរ្តិ៍ឈ្មោះល្បីល្បាញដោយសារតែលោកបានចូលរួមជាសមាជិកក្រុមចម្រៀងកូរ៉េដ៏ល្បី EXO ហើយក្រោយមកនៅឆ្នាំ ២០១៤ លោកបានចាកចេញពីក្រុមហើយមកដើរតួជាតារាចម្រៀងទោល តារាសម្ដែង តារាម៉ូដែល និង ជាគណៈកម្មការកម្មវិធីប្រកួតនៅប្រទេសចិនវិញ៕