សិល្បៈជាតិ៖ មួយរយៈមកហើយដែលអ្នកគាំទ្រ និងអ្នកតាមដាន អ្នកនាង ទូច ស្រីល័ក្ខសង្កេតឃើញថា អ្នកនាង និងអ្នកកំលោះរូបសង្ហា វង ជីវ័ន្ត អតីតបេក្ខជនដ៏លេចធ្លោមួយរូបនៃកម្មវិធី The Voice Cambodia រដូវកាលទី៣ បានបង្ហាញតម្រុយស្និតស្នាល និងមានភាពស្អិតល្មួតជាមួយគ្នា ជាពិសេសទៀតនោះគឺ អ្នកនាង គឺជាតួឯកស្រីក្នុងបទចម្រៀង cover ដ៏ពីរោះ ដែលទើបតែចេញឱ្យអ្នកនិយមគាំទ្របានស្ដាប់និងទស្សនាកាលពីថ្ងៃទី១០ ខែវិច្ឆិកា ឆ្នាំ២០២៣។
បទចម្រៀង Cover យូរយ៉ាងណាក៏ចាំ សំនៀងដើមរបស់លោក ណុប បាយ៉ារិទ្ធ ដែលបានចេញនៅក្រោមដំបូលផលិតកម្ម VL Media Cambodia របស់អ្នកនាង ទូច ស្រីល័ក្ខ កំពុងទទួលបានការចាប់អារម្មណ៍ខ្លាំង ព្រោះតែទឹកដមសំឡេងដ៏ពីរោះរបស់ អ្នកកំលោះមកពីខេត្តបាត់ដំបងរូបនេះ។ យ៉ាងណាមិញគេសង្កេតឃើញថា អ្នកមេម៉យដ៏ស្រស់សោភា ដែលទំនងជាបិទបេះដូងលែងទទួលយកស្នេហារូបនេះ ហាក់ដូចជាផ្ដល់នូវភាពស្និទ្ធស្នាលជាពិសេសជាមួយនឹងអ្នកកំលោះ វង ជីវ័ន្ត រហូតធ្វើឱ្យអ្នកតាមដានពិសេសអ្នកលេងបណ្ដាញសង្គម ដាក់ការសង្ស័យថា ម្ចាស់ផលិតកម្ម និងជាតួឯកស្រីនៃវីដេអូចម្រៀងនេះ និងអ្នកចម្រៀងកំលោះរូបសង្ហា មានទំនាក់ទំនងគ្នាពិសេសលើសពីមិត្តភក្តិធម្មតាឬក៏យ៉ាងណាដែរ? ព្រោះនៅក្នុងឈុតឆាកនៃការសម្ដែង បានបង្ហាញនូវរូបភាពផ្អែមល្ហែមជាច្រើន។ ជាងនោះទៀត អ្នកនាងថែមទាំងបង្ហោះរូបភាពស្និតស្នាលដកស្រង់ចេញពីឈុតមួយនៃបទចម្រៀងជាមួយនឹងអ្នកកំលោះវ័យ២៤ឆ្នាំ ព្រមជាមួយនឹង Caption គួរឱ្យសង្ស័យទៀតថា៖ «គ្រប់យ៉ាងសុទ្ធតែមានហេតុនឹងផល ចូលមើលថែនាងឱ្យបានល្អ ព្រោះមនុស្សល្អពិបាករកណាស់ កុំឱ្យបាត់បង់ទើបស្តាយក្រោយ» ដែលកន្លងមកគេសង្កេតឃើញថាអ្នកនាង ទូច ស្រីល័ក្ខកម្រនឹងបង្ហាញរូបភាពបែបនេះនៅលើបណ្ដាញសង្គមខ្លាំងណាស់។
យ៉ាងណាមិញ ក្រុមការងារសារព័ត៌មានត្រយងបានទំនាក់ទំនងទៅកាន់អ្នកនាង ទូច ស្រីល័ក្ខ ដើម្បីសុំការបំភ្លឺ ប៉ុន្តែអាស្រ័យដោយអ្នកនាង កំពុងមមាញឹកលើការងារមនុស្សធម៌នៅខេត្តកំពង់ឆ្នាំង ហើយប្រព័ន្ធសេវាមានភាពរអាក់រអួល ដូច្នេះអ្នកនាង នៅមិនទាន់បំភ្លឺចំពោះករណីសង្ស័យទាក់ទងនឹងចំណងមិត្តភាពដ៏ស្អិតល្មួតខាងលើនេះនៅឡើយ៕