សិល្បៈជាតិ៖ មហោស្រពតន្ត្រី Sting Musicverse Festival ជាការប្រគំតន្ត្រីលំដាប់ស្តង់ដាអន្តរជាតិ ជាមួយនឹងឆាកដ៏ធំសម្បើមទាំងប្រព័ន្ធបច្ចេកទេសភ្លើង និងសំឡេងដែលមិនធ្លាប់មាននៅកម្ពុជា ត្រូវបានរៀបចំឡើងដោយកំពូលតារាចម្រៀងរ៉េប G-Devith នាំមកនូវភាពសប្បាយរីករាយជូនអ្នកគាំទ្រប្រម៉ាណជាង ១ម៉ឺននាក់បានទិញសំបុត្រចូលរួម។
មហោស្រពតន្ត្រីដ៏ធំជាងគេនៅប្រទេសកម្ពុជាក្នុងឆ្នាំនេះ ក៏មានការចូលរួមសម្ដែងពីតារាចម្រៀងល្បីប្រចាំប្រទេសដូចជា កញ្ញា វី ឌីណែត លោក Step លោក ស៊ូលីផេង លោក ថេណា DJ SODA និង Rapper ល្បីឈ្មោះពីប្រទេសថៃ URBOYTJ រួមទាំងសិល្បករវ័យក្មេងជាច្រើនរូបទៀត ចូលរួមសម្ដែងច្រៀងដើម្បីឱ្យហ្វេនអ្នកគាំទ្របានស្រែកហ៊ោសប្បាយយ៉ាងអើងកង។
យ៉ាងណាមិញ អ្វីដែលគ្រប់គ្នាកត់សម្គាល់ចំពោះការប្រគំតន្ត្រីយ៉ាងធំសម្បើមនាំមុខគេនេះ លោក G-Devith បានពញ្ញាក់អារម្មណ៍ហ្វេនម្ដងទៀតហើយ តាមរយៈការទម្លាក់បទច្រៀងជាប់គ្នារហូតដល់ទៅ ២១បទ ទាំងបទថ្មីចាស់ដែលចំណាយថេរវេលាដល់ទៅជិត ២ម៉ោង ដោយលោកមិនបានដកឃ្លាសម្រាកសូម្បីតែបន្តិច។ នេះបានហៅកំពូល Rapper ដែលអាចឆក់យកបេះដូងហ្វេនបានពិតៗមែន ព្រោះថា ការលះបង់របស់លោក គឺចង់តបស្នងចំពោះកម្លាំងចិត្តដែលលោកទទួលបានពីហ្វេនអ្នកគាំទ្រគ្រប់គ្នា។
ក្រៅពីការបកស្រាយបទចម្រៀងដោយមិនស្អកបំពង់កហើយនោះ អ្វីដែលហ្វេនចាប់អារម្មណ៍ខ្លាំងជាងនេះទៅទៀត គឺ G-Devith ហ៊ានចំណាយរាប់ម៉ឺនដុល្លារក្នុងការរៀបចំខ្លួនរបស់លោក។ ជាក់ស្ដែងសូម្បីតែសំលៀកបំពាក់ Out fit ដែល ជី ដេវីត ស្លៀកច្រៀងបើកឆាកមហោស្រពតន្ត្រីយប់មិញនេះគឺ មានតម្លៃដល់ខ្ទង់ជិត ២ ម៉ឺនដុល្លារ។ ហើយសូម្បីតែ Out fit គុណខ្មែរ ដែលលោកចង់បង្ហាញនិងលើកស្ទួយពីវប្បធម៌ខ្មែរ ក៏លោកហ៊ានចំណាងជិត ១ ម៉ឺនដុល្លារថែមទៀត។ ហ្វេននិយាយតៗគ្នាថា G-Devith ជាតារាប្រុសដែលហ៊ានចាយលុយច្រើនសន្ធឹកលើប្រ៊េនល្បីៗ។
សូមជម្រាបមហោស្រពតន្ត្រី Sting Musicverse Festival របស់លោក ងួន ចាន់ដេវីត ត្រូវបានបិទបញ្ចប់ដោយការបាញ់កាំជ្រួចរាប់រយគ្រាប់ជាសញ្ញាបង្ហាញពីភាពជោគជ័យដ៏អសច្ចារ្យនៃការប្រគំតន្ត្រីចុងឆ្នាំ ២០២៣ ហើយក៏បង្ហាញពីការស្វាគមន៍នៃការបើកទំព័រសករាជថ្មីឆ្នាំ ២០២៤ ផងដែរ៕
