សិល្បៈជាតិ៖ ពិភពលោកបានចាត់ទុកប្រទេសកម្ពុជា ជាទឹកដីដែលពោរពេញទៅដោយវប្បធម៌ និងអរិយធម៌ ដ៏មានវ័យចំណាស់ជាងគេនៅតំបន់អាស៊ីអាគ្នេយ៍។ ស្របពេលដែលព្រលានយន្តសៀមរាបថ្មីដាក់ដំណើរការឱ្យប្រើប្រាស់នាពេលកន្លងមកនេះ គេសង្កេតឃើញថា សន្ទុះភ្ញៀវទេចរណ៍អន្តរជាតិហាក់រើបឡើងវិញ។ ក្នុងនោះក៏មានបុគ្គលល្បីៗជាច្រើននាក់បានមកដល់កម្ពុជា ហើយចូលរួមផ្សព្វផ្សាយពីតំបន់ប្រាសាទអង្គវត្តថែមទៀត រួមមាន៖
1-DJ SODA
កញ្ញា Hwang So-hee ឬហៅថា DJ SODA ជាឌីជេដ៏ល្បីល្បាញរបស់កូរ៉េខាងត្បូងដែលតែងតែមានវត្តមានក្នុងមហោស្រពតន្ត្រីធំៗទូទាំងពិភពលោក។ តាមរយៈការចូលរួមក្នុងមហោស្រពតន្ត្រី Sting Musicvers Fastival នៅកម្ពុជា កញ្ញាក៏បានចូលរួមការបង្ហោះវីដេអូខ្លីមួយនៅលើទំព័រហ្វេសប៊ុករបស់ខ្លួនអំពីដំណើរកម្សាន្តយ៉ាងស្រស់ស្រាយនៅលើទឹកដីអង្គរនៅថ្ងៃទី១២ ខែវិច្ឆិកា នេះអមដោយពាក្យថា «Beauty of Cambodia»។
2-Dave Leduc
នៅថ្ងៃទី ៦ វិច្ឆិកា កីឡាករប្រដាល់មីយ៉ាន់ម៉ា ដើមកំណើតកាណាដា Dave Leduc បានធ្វើដំណើរទៅទស្សនាប្រាសាទអង្គរវត្ត ហើយពេលចូលទៅទស្សនាប្រាសាទដ៏វិសុទ្ធរបស់ខ្មែរ លោកបានដោះស្បែកជើងដើរដោយការគោរពចំពោះដួងព្រលឹងបុព្វបុរសខ្មែរ។ សកម្មភាពរបស់លោកត្រូវបានផ្សព្វផ្សាយពេញបណ្ដាញសង្គមនានាយ៉ាងសុសសាយ។
3-Paing Takhon
តារាសម្ដែងប្រុសភូមា Paing Takhon បានធ្វើដំណើរមកប្រទេសកម្ពុជាជាច្រើនលើកច្រើនសារ ដើម្បីថតខ្សែភាពយន្តខ្នាតធំជាច្រើនរឿងផង និងដើម្បីថតម៉ូដសំអាងជាមួយតារាស្រី ស៊ីន យូប៊ីនផង។ តារាប្រុសរូបនេះ បានចាត់ទុកប្រទេសកម្ពុជាដូចជាផ្ទះទី ២របស់លោក ហើយលោកតែងតែលើកឡើងថា កម្ពុជាបានផ្ដល់ភាពកក់ក្ដៅចំពោះរូបលោក។ ក្រៅពីនោះ លោកក៏បានថតរូបភាពជាច្រើនសន្លឹកនៅមុខប្រាសាទអង្គរវត្ត ដើម្បីផ្សព្វផ្សាយពីតំបន់ទេសចរណ៍កម្ពុជាទៅកាន់ពិភពលោកផងដែរ។
4- The Amazing Race Australia
នៅអំឡុងខែ មិថុនា ២០២៣ នេះ កម្មវិធី The Amazing Race Au បានជ្រើសរើសយកទឹកដីនៃព្រះរាជាណាចក្រកម្ពុជា ជាទីតាំងថតកម្មវិធីដ៏ល្បីមួយនេះ។ ការផលិតនូវកម្មវិធីទូរទស្សន៍ខាងលើ ផលិតករបានបង្ហាញនូវស្នាមញញឹមរបស់ប្រជាជនកម្ពុជា និង វប្បធម៌ដ៏ផូរផង់ មានតម្លៃមិនអាចកាត់ថ្លៃបានមានដូចជា ក្រមា គុនល្បុក្កតោ សិប្បកម្មតម្បាញពីសរសៃដើមឈូកដ៏មានតម្លៃ ព្រមទាំងបេតិកភណ្ឌពិភពលោកដ៏អស្ចារ្យ គឺតំបន់រមណីយដ្ឋានវប្បធម៌អង្គរ។
5- Miss Grand Myanmar 2022
នៅអំឡុងពាក់កណ្ដាលខែ មេសា ឆ្នាំ ២០២៣នេះ កញ្ញា Meme Kansuda ជា Miss Grand Myanmar 2022 បានធ្វើដំណើរមកកម្សាន្តនៅប្រទេសកម្ពុជា ដែលជាមួយគ្នានោះ កញ្ញា ពេជ្រ វត្តីសារ៉ាវឌ្ឍី បាននាំនាង និងក្រុមការងារទៅទស្សនាប្រាសាទអង្គរវត្ត ព្រមទាំងថតរូបភាពជាច្រើនសន្លឹកយ៉ាងស្រស់ស្អាតថែមទៀតផង៕
