សិល្បៈជាតិ៖ ករណីដែលតារាចម្រៀងរ៉េប G-Devith បង្ហាញខោគុនខ្មែរនៅលើឆាកចម្រៀង និងស្លៀកនៅពេលសមឆាក បានធ្វើឱ្យអ្នកគាំទ្រកីឡាប្រដាល់មួយចំនួនហាក់មិនពេញចិត្ត និងបោះសម្ដីផ្លែផ្កាជាច្រើននៅលើបណ្ដាញសង្គម។ ប៉ុន្តែនៅក្នុងនោះក៏មានអ្នកគាំទ្រមិនតិចទេដែលបានចេញមកគាំទ្រចំពោះសកម្មភាពផ្សព្វផ្សាយគុនខ្មែររបស់ G-Devith នៅក្នុងព្រឹត្តិការណ៍ប្រគំតន្ត្រីយក្សចុងឆ្នាំរបស់លោក ដោយម្នាក់ក្នុងចំណោមអ្នកគាំទ្រទង្វើរបស់ G-Devith ដ៏ច្រើនលើសលប់នោះក៏មាន លោក Rock Kh ពិធីករនិងជាអ្នកជំនាញអត្ថាធិប្បាយកីឡាដ៏មានប្រជាប្រិយភាពមួយរូបផងដែរ។
G-Devith បានលើកបង្ហាញខោគុនខ្មែរបន្ទាប់ពីបានស៊ីញ៉េរួចប្រគល់ឱ្យហ្វេន នៅលើឆាកមហោស្រពតន្ត្រី Sting Musicverse Fastival កាលពីរាត្រីថ្ងៃទី ១២ ខែវិច្ឆិកា។ ហេតុការណ៍នេះបានធ្វើឱ្យអ្នកគាំទ្រប្រដាល់គុនខ្មែរមួយចំនួនកើតមានជាមតិរិះគន់ ដោយពួកគេលើកឡើងស្រដៀងៗគ្នាថា អ្នកប្រដាល់អាចច្រៀងរ៉េបនៅលើឆាកបាន តែអ្នកចម្រៀងរ៉េបមិនអាចឡើងប្រដាល់បានទេ ដែលពាក្យសម្ដីទាំងអស់នោះបានផ្លែផ្កាទៅ G-Devith យ៉ាងចំៗ។ ក៏ប៉ុន្តែក៏មានអ្នកលេងបណ្ដាញសង្គមមួយចំនួនផ្សេងទៀត បានបង្ហាញជាមតិដែលថា ទង្វើរបស់លោក G-Devith ធ្វើក៏ព្រោះតែចង់លើកស្ទួយ និងគាំទ្រផ្សព្វផ្សាយបន្ថែមពីគុណខ្មែរតែប៉ុណ្ណោះ ចុះហេតុអ្វីមិនបើកចិត្តឱ្យទូលាយបន្តិចទៅ?
ជាក់ស្ដែងលោក Rock Kh ពិធីករកីឡាល្បីមួយរូប បានលើកហេតុផលយ៉ាងសមរម្យចំពោះករណីខាងលើនេះ ដើម្បីឱ្យអ្នកលេងបណ្ដាញសង្គមបានត្រិះរិះពិចារណា ដោយមិនមែនល្អៀង ឬសម្ដៅតែទៅលើហ្វេនណាមួយតែម្ខាងៗនោះទេ។ ភ្ជាប់នឹងករណីនេះលោក Rock Kh បានបង្ហោះសារឡើងយ៉ាងដូច្នេះ៖
«ជាមនុស្សរៀនគាំទ្រអ្វីក៏ដោយកុំឱ្យងប់ងុលផ្កាប់មុខរហូតមិនអាចបែងចែក ល្អ និង អាក្រក់ឱ្យសោះ ពីព្រោះ សិល្បះគឺជាការផ្សព្វផ្សាយទូលំទូលាយទាំងក្នុងជាតិ និង អន្តរជាតិ ការរួមចំនែកក្នុងការផ្សព្វផ្សាយ អរិយធម៌ និង វប្បធម៌ទៅកាន់ពិភពលោកឱ្យគេបានស្គាល់ជារឿងល្អណាស់សម្រាប់សង្គមជាតិ ហេតុអ្វីវប្បធម៌ ញុះញង់ និង លាបពណ៌គ្នានៅក្នុងសង្គមជាតិខ្មែរនឹងត្រូវបញ្ចប់នៅពេលណា ។ 2023 ហើយ ពិភពលោកគេដើរដល់ណាហើយ តើយើងចង់ឱ្យយើងដើរឈានទៅមុខយ៉ាងម៉េច បើផ្នត់គំនិតរបស់យើងចង្អៀតចង្អល់យ៉ាងនេះ ជាតិសាសន៍តែមួយឈាមជ័រតែមួយហេតុអីបានមិនសាមគ្គីគ្នា ចូលចិត្តណាស់បែងជើងគ្នា ឈ្នានីសគ្នា តើវាបានហុចផលប្រយោជន៍អ្វីខ្លះដល់សង្គមខ្មែរ ដល់ពេលហើយដែលខ្មែរត្រូវសាមគ្គីគ្នាពួតដៃគ្នាបង្ហាញភាពខ្លាំងរបស់យើងទៅកាន់សកលលោកថាខ្មែរពូជខ្មែរអ្នកសាងអង្គរ ដែលគ្មានជាតិសាសន៍ណាអាចធ្វើបាន បើខ្មែរសម័យអង្គរមិនសាមគ្គី តើខ្មែរអាចសាងប្រាសាទអង្គរបានដោយរបៀបណា យើងគួរសាទរលើកទឹកចិត្តនឹងជំរុញអោយវារីកចម្រើនទៅមុខជាជាងចាំរកគន្លឹះដើម្បីផ្តួលគ្នា សាមគ្គីយើងខ្លាំង បែកបាកយើងនឹងលិចលង់ទាំងអស់គ្នា ។ ពីខ្ញុំជាឈាមជ័រខ្មែរម្នាក់សូមសំណូមពរខ្មែរគ្រប់រូបសាមគ្គីគ្នា ចាប់ដៃគ្នា កែលំអគ្នាខ្មែរយើងនឹងខ្លាំង »។
សូមជម្រាបថា តារាចម្រៀងរ៉េប G-Devith និយមលេងស្ដាយល៍យ៉េយ៉េរូបនេះមិនបានត្រឹមតែជាចំណែកមួយចូលរួមផ្សព្វផ្សាយអំពីគុនខ្មែរនៅលើឆាកមហោស្រពតន្ត្រីលំដាប់អន្តរជាតិមួយនេះប៉ុណ្ណោះទេ លោកក៏មានសកម្មភាពចូលរួមផ្សព្វផ្សាយពីវប្បធម៌ខ្មែរផ្សេងៗទៀតនៅលើឆាកតន្ត្រីអន្តរជាតិបន្ថែមទៀតដែរ។ ដោយឡែក លោកក៏ត្រៀមបង្ហាញពីការសម្ដែងសិល្បៈវប្បធម៌ក្នុងទម្រង់ទ្រង់ទ្រាយយ៉ាងធំសម្បើមមួយទៀត នៅលើទឹកដីអង្គរក្នុងកម្មវិធី «រាត្រីចងចាំ» ដែលជាកម្មវិធីថ្នាក់ជាតិគាំទ្រដោយក្រសួងវប្បធម៌ និងវិចិត្រសិល្បៈផងដែរ៕