សិល្បៈជាតិ៖ ភាពយន្ត «ប្រុសលក់ខ្លួន» របស់ផលិតកម្ម LD បានបង្ហាញស្ថិតិថ្មីជាប្រវត្តិសាស្ត្រតែម្ដង ដែលនេះគឺជាលើកដំបូងសម្រាប់ភាពយន្តខ្មែរដែលបញ្ចាំងនៅក្នុងរោងកុនត្រឹមតែ ៤ ថ្ងៃប៉ុណ្ណោះ អាចកើបលុយបានដល់ទៅ ៨០០ លានរៀល។
តាមការបង្ហោះឡើងរបស់ផលិតកម្មបានឱ្យដឹងថា សមិទ្ធផលនេះ គឺកើតឡើងពីអ្នកគាំទ្រជាទស្សនិកជនទាំងអស់គ្នាដែលបានចូលរួមចំណែកធ្វើឱ្យភាពយន្តខ្មែរ កាន់តែបោះជំហានឆ្ពោះទៅមុខទៅកាន់ទីផ្សារភាពយន្តអន្តរជាតិ។
បើតាមឱ្យឃើញពីការបង្ហោះនៅលើហ្វេសប៊ុកផេករបស់រោងភាពយន្តនីមួយៗ គេឃើញថា ភាពយន្តមួយនេះ ត្រូវបានអ្នកគាំទ្រ និងអ្នកចង់ទស្សនា សម្រុកធ្វើកក់កៅអីទុកអស់ៗគ្មានសល់ តាំងពីថ្ងៃដាក់បញ្ចាំងថ្ងៃដំបូងមកម្ល៉េះ។ ហើយមកទល់ថ្ងៃនេះដែរ កៅអីសម្រាប់ចង់ទៅទស្សនាភាពយន្តនោះដែលទៅទិញសំបុត្រផ្ទាល់ ក៏សឹងតែគ្មានកន្លែងសល់ដូចគ្នា ពោលគឺមាននៅតែជួរមុខជិតអេក្រង់ប៉ុណ្ណោះ។
ជាមួយការទទួលដំណឹងដ៏សែនរំភើបនេះ លោក លៀក លីដា ជាចាងហ្វាងផលិតកម្ម LD ក៏បានលើកឡើងថា «អ្នកគាំទ្រគឺជាកំលាំងចិត្ត អ្នកគាំទ្រគឺជាវត្ថុធាតុដើមដែលមិនអាចខ្វះបាន ក្នុងចង្វាក់ផលិតកម្ម»។
សូមជម្រាបថា ភាពយន្ត «ប្រុសលក់ខ្លួន» ក៏បានការទទូចឱ្យផលិតជាភាគទី ២ បន្តផងដែរ ខណៈដែលផលិករកំពុងតែពិចារណារឿងនេះ ដើម្បីបំពេញបំណងចិត្តរបស់អ្នកទស្សនា។ ភាពយន្ត «ប្រុសលក់ខ្លួន» ឬ Rentboy កំពុងចាក់បញ្ចាំងគ្រប់រោងភាពយន្ត៕