សិល្បៈជាតិ៖ ភាពយន្តភ័យរន្ធត់របស់ថៃដែលបានដកស្រង់ចេញពីហេតុការណ៍ពិតមកផលិតជាភាពយន្តខ្នាតធំមានចំណងជើងថា «ទំនួញព្រាយ-Tee Yod » ត្រូវបានដំបូងបញ្ចាំងនៅលើអេក្រង់យក្ស IMAX នៃរោងភាពយន្ត Major Cineplex By Smart នៅផ្សារទំនើប Aeon Mall Sensok នៅរាត្រីថ្ងៃទី ១៥ វិច្ឆិកា ២០២។
ភាពយន្តនេះត្រូវបានដកស្រង់ចេញពីរឿងនិទានល្បីនៅវេបសាយ និងកម្មវិធីវិទ្យុដ៏ល្បីមួយដែលនិទានអំពីដំណើររឿងព្រឺព្រួចនៃសំឡេងអាថ៌កំបាំងមួយគឺលឺសូរថា « Tee Yod »។ សំឡេងខ្មោចលងនោះគឺមានតែនៅពេលយប់ប៉ុណ្ណោះ ហើយគ្មានអ្នកណាអាចដឹងថា សំឡេងនោះមានន័យយ៉ាងដូចម្ដេចទេ។ ហេតុការណ៍ចម្លែកនេះបានកើតឡើកាលពី៥០ឆ្នាំមុន គឺឆ្នាំ១៩៧២ ចំពោះគ្រួសារមួយដែលរស់នៅក្នុងភូមិដាច់ស្រយាល។
ភាពយន្តនេះដែរក៏មានការចូលរួមសម្ដែងដោយតារាសម្ដែងល្បីៗប្រចាំប្រទេសថៃ ឃ្យូតៗ ស្រស់សង្ហា ក្នុងនោះរួមមាន៖ លោក Nadech, កញ្ញា Rattanawadee, លោក Peerakrith, កញ្ញា Denise Jelilcha ព្រមទាំងតារាប្រុសស្រីជាច្រើនរូបទៀត។
លោក សុខ សិរីសុភា ប្រធានផ្នែកទីផ្សា M Picture Cambodia បានបញ្ជាក់ប្រាប់អ្នកសារព័ត៌មានថា មូលហេតុដែលក្រុមហ៊ុនយកភាពយន្តនេះមកបញ្ចាំងនៅលើអេក្រង់យក្ស IMAX ជាលើកដំបូងក្នុងប្រទេសកម្ពុជា ក៏ដោយសារតែភាពយន្តនេះល្បីស្រាប់នៅប្រទេសថៃ ហើយក៏ជាយុទ្ធសាស្ត្រមួយក្នុងការស្ទាបស្ទង់ទីផ្សារអ្នកទស្សនារឿងខ្មោចដូចគ្នា ថាតើនៅពេលបញ្ចាំងនៅលើ IMAX គឺមានសន្ទុះកម្រិតណា?
លោកបន្តថា បន្ទាប់ពីបញ្ចាំងភាពយន្តនេះហើយ ខាងក្រុមហ៊ុនក៏មានគោលបំណងផលិតភាពយន្តខ្មែរបែបអបិយជំនឿ អរូប អមនុស្ស និង មន្តអាគមខ្មៅ ដែលដកស្រង់ចេញពីព្រឹត្តិការណ៍ពិតដ៏គួរឱ្យខ្លាចណាមួយ ដើម្បីមកចាក់បញ្ចាំងនៅលើអេក្រង់ IMAX នេះដូចគ្នាដែរ។
ក្រៅពីឈុតឆាកភ័យរន្ធត់ ដែលធ្វើឱ្យអ្នកទស្សនាពេញមួយរោងកុនថ្ងៃ Pre-screening សម្រែកហ៊ោទាំងប្រហោងពោះហើយនោះ គ្រប់គ្នាក៏លាន់មាត់សរសើរថា ពិតល្អមើលក្រោយបានទស្សនារួច ទាំងការសម្ដែងរបស់តួអង្គ ពិសេសទៅលើបច្ចេកទេស ក្រាហ្វិកពីមួយវគ្គទៅមួយវគ្គត្រដមត្រសងគ្នាត្រជាក់ភ្នែក ឈុតឆាកលងបន្លាចស្រស់ៗគួរឱ្យសរសើរតែម្ដង។
សូមជម្រាបថា ភាពយន្ត «ទំនួញព្រាយ-Tee Yod » មានចាក់បញ្ចាំងចាប់ពីថ្ងៃទី១៦ ខែ វិច្ឆិកា ឆ្នាំ2023 នេះតទៅនៅគ្រប់រោងភាពយន្ត។ ជាពិសេសកុំភ្លេចកក់សំបុត្រមើលនៅក្នុងរោង IMAX ដែលមាននៅ Major Cineplex By Smart នៅផ្សារទំនើប Aeon Mall Sensok ដើម្បីទទួលបានបទពិសោធន៍ថ្មី៕