សិល្បៈអន្តរជាតិ៖ កញ្ញា Nguyen Thuc Thuy Tien ម្ចាស់តំណែង Miss Grand International 2021 បានចេញមកបដិសេធជាសាធារណៈតាមរយៈគណនីហ្វេសប៊ុកផ្ទាល់ខ្លួនចំពោះការ ចោទប្រកាន់ថាខ្លួនមានពាក់ព័ន្ធនឹងករណីជួញដូរផ្លូវភេទ ក្រោយមានបែកធ្លាយរូបភាពរបស់នាងនិងមេគំនិតជួញដូរផ្លូវភេទដ៏ធំមួយត្រូវបានចែកចាយនៅលើបណ្ដាញសង្គម។
យោងតាមការបង្ហោះដោយសារព័ត៌មានវៀតណាមកញ្ញា Tien បានសរសេរលើគណនីខ្លួនថា ការប៉ាន់ស្មានថានាងមានជាប់ព័ន្ធនឹងអំពើជួញដូរផ្លូវភេទដែលដឹកនាំដោយ Make up artist ឈ្មោះ Huynh Thanh Thuan (ហ៊ូអេន ថាញ ធៀន) មិនមានមូលដ្ឋានច្បាស់លាស់ ហើយអ្នកដែលផ្សព្វផ្សាយនោះគឺមានចេតនាបំភ័ន្តមតិសាធារណៈ។ អតីតម្ចាស់មកុដឆ្នាំ២០២១ បានបន្ថែមទៀតថា ប៉ូលិសនៃនាយកដ្ឋានប្រឆាំងបទល្មើសឧក្រិដ្ឋកម្មក្រសួងសន្តិសុខសាធារណៈបានប្រកាសហើយថានាងមិនមានជាប់ពាក់ព័ន្ធនឹងករណីជួញដូរផ្លូវភេទនោះឡើយ។
ក្រោយពេលដែល Make Up Artist ដែលជាឈ្មួញជួញដូរផ្លូវភេទត្រូវបានចាប់ខ្លួន ហើយរូបថតរបស់ Tien និងបុរសរូបនោះបែកធ្លាយជាសាធារណៈ ធ្វើឱ្យមានការសង្ស័យនាងអាចមានជាប់ពាក់ព័ន្ធនឹងការជួញដូរផ្លូវភេទ ប៉ុន្តែនាងបានពន្យល់ថាបុរសផាត់មុខអាជីពរូបនោះ ធ្វើការជាមួយនឹងតារាជាច្រើនដួង រួមទាំងរូបនាងផងដែរ ខណៈដែលរូបថតនោះបានថតតាំងពីឆ្នាំ២០០៩ មកម្ល៉េះ ដូច្នេះវាមិនសមហេតុផលនោះទេ ដែលយកត្រឹមតែរូបថតប៉ុណ្ណឹងមកចោទប្រកាន់រូបកញ្ញា។
កញ្ញា Nguyen Thuc Thuy Tien បានអះអាង ក្រុមហ៊ុនកំពុងតែធ្វើការងារជាមួយនឹងអាជ្ញាធរមានសមត្ថកិច្ចដើម្បីវែករកមុខបុគ្គលដែលបានព្យាយាមបបង្កើតដំណឹងចចាមអារ៉ាមដើម្បីវាយប្រហារកញ្ញានៅលើប្រព័ន្ធអ៊ិនធឺណិត។
គួររំលឹកឡើងវិញថា កញ្ញា Nguyen Thuc Thuy Tien គឺជាម្ចាស់តំណែង Miss Grand International ឆ្នាំ២០២១ ដែលបានរៀបចំការប្រកួតឡើងនៅទីក្រុងបាងកកប្រទេសថៃ កញ្ញាគឺជានារីវៀតណាមដំបូងគេបង្អស់ដែលបានឈ្នះតំណែងពីវេទិកាប្រកួតសម្រស់មួយនេះ៕
