ក្លិបបាល់ទាត់វិសាខា នឹងត្រូវបើកទ្វាកីឡាដ្ឋានព្រីនេ៍ ដើម្បីស្វាគមន៍ក្រុមរបស់ណាហ្គាវើលដ៍ ក្នុងជំនួនជុំទី២ សប្ដាហ៍ទី១១ នៅថ្ងៃទី២៥ វិច្ឆិកា វេលាម៉ោង ៦:០០នាទីល្ងាច នៃពានរង្វាន់លីគកំពូលកម្ពុជា Cambodian Premier League 2023-2024។
មុនជំនួបមកដល់គ្រូជំនួយក្លិបបាល់ទាត់វិសាខា លោក Daryl Martin Willard បានបង្ហាញចំណាប់អារម្មណ៍មុនជំនួបប៉ះណាហ្គាវើលថា៖ «ការប្រកួតថ្ងៃស្អែក គឺជាជំនួបដ៏លំបាកមួយ ដោយសារណាហ្គាវើលដ៏ មានការផ្លាស់ប្ដូរសមាជិកថ្មីមួយចំនួន ។ ខ្ញុំដឹងថា ពួកគេគឺជាក្រុមគ្រោះថ្នាក់មួយ ហើយពួកគេកំពុងរៀបចំខ្លួនបានយ៉ាងល្អ សម្រាប់ការប្រកួតនេះ ។ ប៉ុន្ដែពួកយើងក៏បានត្រៀមខ្លួនរួចរាល់ ដើម្បីស្វាគមន៍ និងប្រកួតប្រជែងជាមួយពួកគេ ។ ខ្ញុំនឹងព្យាយាមដឹកនាំក្រុមធ្វើឲ្យបានល្អ ជាពិសេសបង្កើតឱកាសស៊ុតបញ្ចូលទីឲ្យបានច្រើន»។
ដោយឡែកសម្រាប់គ្រូបង្វឹករបស់នាហ្គាវើលដ៍លោក ឃឹម បូរី បានលើកឡើងថា៖ «ខ្ញុំពិតជារីករាយដែលយើងបានសម្រាកចំនួន៣សប្ដាហ៍ ដូចនេះការប្រកួតដែលត្រឡប់មកវិញ វាជាការប្រកួតមួយដ៏ល្អ និងសំខាន់ ក៏ដូចជាជំនួបដ៏តានតឹងសម្រាប់យើងដោយការប្រកួតកន្លងមកយើងធ្វើមិនបានល្អ។ បើនិយាយពីកីឡាករវិញ យើងបានត្រៀងផ្លាស់ប្ដូរ រួមទាំងកីឡាករបរទេស »។
ក្រៅពីជំនួបរវាងវិសាខា ប៉ះណាហ្គាវើលដ៍ នៅថ្ងៃនេះដែរក៏មានជំនួបដ៏ជក់ចិត្ត ២គូផ្សេងទៀត គឺក្លិបបាល់ទាត់ខេត្តព្រៃវែង ជួបជាមួយ អាយ អេស អាយ ដង្កោសែនជ័យ នៅកីឡដ្ឋានខេត្តព្រៃវែង វេលាម៉ោង ៣:៣០នាទីរសៀល និងមួយគូទៀតគឺ ភ្នំពេញក្រោម ជួបជាមួយព្រះខ័នរាជស្វាយរៀង នៅកីឡដ្ឋាន ស្មាត អអេសអិន វេលាម៉ោង ៦:០០នាទីល្ងាច៕