សិល្បៈជាតិ៖ កាលពីថ្ងៃទី២៧ ខែវិច្ឆិកា ឆ្នាំ២០២៣ គណនីតិកតុក (Tiktok) ផ្លូវការរបស់កាសែតកូរ៉េល្បីគឺ Dispatch បានបង្ហោះរូបភាពប្រុសស្អាត Joshua Hong សមាជិកក្រុមចម្រៀង Seventeen ខណៈកំពុង ធ្វើដំណើរទៅព្រលានយន្តហោះ ប៉ុន្តែបើគ្រាន់តែរូបភាព បុរសសង្ហា និង Fashion របស់គេប៉ុណ្ណឹង មិនធ្វើឱ្យកូនខ្មែរជ្រួលជ្រើមនោះឡើយ បើសិនមិនមានបញ្ចូលចម្រៀង Call Me Papa អមជាមួយនឹងបារ៉ូលចម្រៀងបាញ់ស្នេហ៍ ទៅក្នុងនោះ។ រាល់ដងកូនខ្មែររមែងមានក្ដីរំភើបដែលបរទេសលើកយកអ្វីដែលជាខ្មែរទៅប្រើប្រាស់ ព្រោះវាគឺជាចំណែកមួយជួយផ្សព្វផ្សាយពីកម្ពុជាលើឆាកអន្តរជាតិ ពិសេសតាមរយៈវិស័យសិល្បៈ យ៉ាងណាមិញលើកនេះ កូនខ្មែរមួយភាគធំ ហាក់ដូចជាមិនមានមោទនភាពទៅវិញ នៅពេលដឹងថាកាសែតល្បីរបស់កូរ៉េ Dispatch បានលើកយកបទចម្រៀងរបស់ផលិតកម្ម Galaxy Navatra ទៅប្រើប្រាស់។
មែនទែនទៅបទចម្រៀង Call Me Papa ដែលបារ៉ូលចម្រៀងត្រង់ «កាន់ឆ័ត្រចេញពីរ៉ូលរយ ភ្លៀងធ្លាក់មកសុទ្ធតែក្រដាសមួយរយ ឃើញខ្លាដេកកុំថាចេតរ៉យ អង្គរក្ស២នាក់នៅពីក្រោយ អូៗ ស្ទាវបងមិនខ្វះក្រដាស៥០ អាចទេស៊ីញូរីតា ចុះឈ្មោះធ្វើជាសង្សារ ព្រោះបេះដូងកំពុងតែរះដូចជាអាកា ទុសៗ ទុសៗ បាញ់ស្នេហ៍ ទុសៗ ទុសៗ កំពុងតែបាញ់ស្នេហ៍» ត្រូវបានអ្នកលេងតិកតុក កាត់យកទៅលេងនិងចែកចាយលើបណ្ដាញតិកតុកកន្លងមក មានច្រើនខ្លាំងគួរឱ្យកត់សម្គាល់ ប៉ុន្តែបើមើលលើមតិវិញ បទចម្រៀងនេះទទួលរងនូវពាក្យរិះគន់ច្រើនជាងសរសើរ។ ដូចជាកាលពីថ្ងៃទី១២ និង១៤ ខែវិច្ឆិកាកន្លងមកនោះឧកញ៉ា ខេមរៈ សិរីមន្តបានបង្ហោះវីដេអូ ព្រមទាំងភ្ជាប់ Caption ខ្លីថា Call me Papa និង អាហារពេលល្ងាចបែបអ្នកកីឡាណាបាទ ប៉ុន្តែអ្នកចូលមកខមមិនម្នាក់ៗបានប្រើពាក្យអសុរសជាច្រើន និងមានអ្នកខ្លះបានទាំងដៀលឧកញ៉ារូបនេះកប់ៗថែមទៀត។
ថ្វីត្បិតមានអ្នករិះគន់ច្រើនក្ដីក៏មានអ្នកលើកទឹកចិត្ត និងលើកសរសើរលោកថែមទាំងនិយាយទៀតថា បើបទនេះមិនពីរោះមិនមែនផ្ទុះល្បីត្រូវគេយកមកលេងពេញតិកតុកនោះឡើយ។ ងាកមករឿង Dispatch យកចម្រៀងនេះទៅប្រើក្នុងគណនីខ្លួនវិញ ត្រូវបានកូនខ្មែរមួយភាគបានចូលទៅ Comment ពាក្យគាំងសឹងតែគ្រប់ៗគ្នា ដោយម្នាក់ៗ មិនបានបង្ហាញនូវមោទនភាព ឬក៏ពាក្យណាមួយបញ្ជាក់ពីក្ដីរីករាយរបស់ខ្លួននោះឡើយ។
ត្បិតរងពាក្យរិះគន់ច្រើនក្ដី ប៉ុន្តែអ្នកដែលគាំទ្រ និងមើលឃើញសុទិដ្ឋិនិយមបានលើកឡើងថា ទោះជាមិនសូវពេញចិត្តក្ដីប៉ុន្តែកូនខ្មែរយើងមិនគួរចូលទៅខមមិននៅលើគណនីបរទេសហើយវាយប្រហារតារាចម្រៀងខ្មែរខ្លួនឯងនោះឡើយ ព្រោះវាគឺជាការបើកដៃឱ្យបរទេសឆ្លៀតឱកាសមកជាន់ពន្លិចសិល្បៈវប្បធម៌ខ្មែរ ចំណែកអ្នកខ្លះទៀត ក៏លើកឡើងពីកង្វល់ដែលមើលឃើញកូនខ្មែរនិយមប្រើប្រាស់អក្សរឡាតាំងសរសេរជាសំនៀងខ្មែរ ដែលវាអាចធ្វើឱ្យភាសាខ្មែរដែលកំពុងតែស្ថិតក្នុងវិការភាពផងនោះកាន់តែគួរឱ្យព្រួយបារម្ភ។
គួរដឹងថាបទចម្រៀង «Call Me Papa» ឬអ្នកទូទៅច្រើនហៅថា «បាញ់ស្នេហ៍» នេះគឺជាបទចម្រៀងស្ថិតក្នុងផលិតកម្ម Galaxy Navatra ដែលជាទឹកដៃនិពន្ធទំនុកច្រៀងនិងទំនុកភ្លេងដោយ Songha Group និងនិពន្ធទំនុកបទភ្លេងដោយ Songha។ បទចម្រៀងនេះបានចេញនៅលើ Youtube កាលពីថ្ងៃទី១១ ខែវិច្ឆិកា ឆ្នាំ២០២៣ គិតត្រឹមព្រឹកថ្ងៃទី២៩ ខែវិច្ឆិកា មានចំនួនទស្សនារហូតដល់ជាង១.៣M ហើយ៕
