សិល្បៈជាតិ៖ កំពូលតារាសម្ដែងស្រីដ៏ល្បីនិងពេញនិយមប្រចាំព្រះរាជាណាចក្រកម្ពុជា កំពុងត្រៀមខ្លួនក្លាយជាតារាស្រីខ្មែរដំបូងគេបង្អស់បង្ហាញវត្តមានកិត្តិយសនៅក្នុងកម្មវិធីមហោស្រពភាពយន្តដ៏ធំរបស់ប្រទេសអារ៉ាប់ប៊ីសាអូឌីតគឺ REDSEA INTERNATIONAL FILM FESTIVAL 2023។
កម្មវិធីដែលតារាសម្ដែង ស៊ីន យូប៊ីន នឹងទៅចូលរួមនេះបានរៀបចំឡើងរយៈពេល១០ថ្ងៃពោលគឺចាប់ពីថ្ងៃទី៣០ ខែវិច្ឆិកា រហូតដល់ថ្ងៃទី៩ ខែធ្នូ ឆ្នាំ២០២៣ ដោយតារាសម្ដែងជួរមុខរបស់កម្ពុជារូបនេះនឹងបង្ហាញវត្តមានដើរលើកម្រាលព្រំក្រហមនៅថ្ងៃទី៥ ខែធ្នូ ឆ្នាំ២០២៣។
កម្មវិធីមហោស្រពភាពយន្តដ៏ធំមួយនៅលើពិភពលោក ដែលកំពូលតារាសម្ដែងដ៏មានប្រជាប្រិយរបស់កម្ពុជាទៅចូលរួមនេះ ក៏មានវត្តមានចូលរួមពីតារាសម្ដែងភាពយន្ត ពីអាស៊ី អឺរ៉ុប និងហូលីវូដល្បីមកជួបជុំគ្នាជាច្រើនកុះករផងដែរ មានដូចជា Sharon Stone, Naomi Campbell, Halle Berry, Johnny Depp, Leonardo DiCaprio, Sofia Vergara, Mai Davikah, Apo Nattawin, Milephakphum ជាដើម។
កម្មវិធី REDSEA INTERNATIONAL FILM FESTIVAL គឺជាអង្គភាពឯករាជ្យមិនស្វែងរកប្រាក់ចំណេញ ដែលបង្កើតឡើងដើម្បី គាំទ្រវិស័យឧស្សាហកម្មភាពយន្តនៅក្នុងប្រទេសអារ៉ាប់ប៊ីសាអូឌីត និងផ្ដល់នូវការបណ្ដុះបណ្ដាលជំនាញ និងគន្លឹះផលិតភាពយន្ត។ ជារៀងរាល់ឆ្នាំ កម្មវិធីមហោស្រពដែលមានរយៈពេល១០ថ្ងៃនេះ នឹងផ្ដល់វេទិកាឱ្យអ្នកផលិតភាពយន្តទាំងថ្មី និងចាស់ បានជួបគ្នា ដើម្បីជជែក ប្រឹក្សា និងសិក្សាស្វែងយល់ពីគ្នាទៅវិញទៅមកដើម្បីផលិតបានស្នាដៃមួយដ៏មានគុណភាព។
ត្បិតការទទួលបាននូវកិត្តិយសដ៏ឧត្តុងឧត្តមក្នុងនាមជាសិល្បការិនីល្បីរបស់កម្ពុជាទៅចូលរួមក្នុងមហោស្រពដ៏ធំ REDSEA INTERNATIONAL FILM FESTIVAL 2023 គឺជាលើកទីមួយក្ដី តែមិនមែនជាលើកទីមួយឡើយសម្រាប់កញ្ញា ស៊ីន យូប៊ីន សម្រាប់ការបង្ហាញវត្តមាននៅក្នុងមហោស្រពភាពយន្ត ព្រោះកាលពីពាក់កណ្ដាលឆ្នាំ២០២៣ អ្នកគាំទ្រនៅចាំបានថាកញ្ញាក៏ធ្លាប់ត្រូវបានអញ្ជើញឱ្យចូលរួមដើរលើកម្រាលព្រំក្រហមនៅក្នុងមហោស្រពភាពយន្តទីក្រុងកាន លើកទី៧៦ នាប្រទេសបារាំងផងដែរ៕
