សហព័ន្ធកីឡាបាល់ទាត់ឡាវ បានសម្រេចតែងតាំងអតីតជម្រើសជាតិសិង្ហបុរី លោក Selvaraj Vengadasalam គ្រូបង្វឹកក្រុមជម្រើសជាតិក្រោមអាយុ១៩ឆ្នាំ ក្រោមអាយុ២៣ឆ្នាំ និងឈុតស៊ីហ្គេម ជំនួសលោកគ្រូបង្វឹកចាស់ Varadaraju Sundramoorthy ត្រូវបានឡើងតំណែងទៅជាអ្នកចាត់ការទូទៅក្រុមឡាវ។
លោក Selvaraj Vengadasalam បានប្រមូលផ្ដុំកីឡាករឡាវមួយរយៈហើយ តែធ្វើឡើងតាមប្រព័ន្ធអនឡាញសិនប៉ុណ្ណោះ។ នេះបើតាមការបញ្ជាក់របស់មន្ត្រីព័ត៌មានរបស់សហព័ន្ធបាល់ទាត់ឡាវ ប្រាប់មកកាន់ក្រុមការងារ«សារព័ត៌មានត្រយង»។ លោកនឹងដឹកនាំក្រុមយុវជនក្រោមអាយុ១៩ឆ្នាំ 2023 AFC U-20 Asian Cup និងពានរង្វាន់ 2022 AFC U-23 Asian Cup និងការប្រកួតកីឡាស៊ីហ្គេមឆ្នាំ២០២១ នៅប្រទេសវៀតណាម ក្នុងពាក់កណ្ដាលឆ្នាំ២០២២ ខាងមុខ។
ចំពោះលោក V. Selvaraj ធ្លាប់ជាខ្សែប្រយុទ្ធក្នុងជម្រើសជាតិសិង្ហបុរី ចន្លោះឆ្នាំ១៩៩៥ ដល់២០០៣ ហើយលោកធ្លាប់ដឹកនាំក្រុម Warriors នៅឆ្នាំ២០១៣ និងដឹកនាំក្រុម Garena Young Lions នៅឆ្នាំ២០១៧ ផងដែរ៕
