ក្រុមហ៊ុនសាងសង់ចិនដែលទទួលសាងសង់ពហុកីឡដ្ឋានជាតិមរតកតេជោ នឹងប្រគល់ឱ្យកម្ពុជា កីឡដ្ឋានថ្មីសន្លាងមួយនេះឱ្យកម្ពុជា នៅថ្ងៃទី១៥ ខែសីហា ឆ្នាំ២០២១ នេះ ដើម្បីឆ្ពោះទៅទទួលរៀបចំធ្វើជាម្ចាស់ផ្ទះកីឡាស៊ីហ្គេម អាស៊ានប៉ារ៉ាហ្គេមឆ្នាំ២០២៣។ នេះបើតាមការបញ្ជាក់របស់ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣។
ឯកឧត្តម វ៉ាត់ ចំរើន បានថ្លែងប្រាប់អ្នកសារព័ត៌មានថា តាមការរៀបចំរបស់គណៈកម្មាធិការវាយតម្លៃឃើញថា ពហុកីឡដ្ឋានជាតិមរតកតេជោ ត្រូវបានសាងសង់រួចហើយ ជាពិសេសខាងក្នុងកីឡាដ្ឋានធំ ដែលជាជំនួយហិរញ្ញប្បទានឥតសំណងរបស់រដ្ឋាភិបាលចិន គឺបានចប់សព្វគ្រប់ហើយ នៅតែការសម្អាតខាងក្រៅបន្តិចបន្តួចប៉ុណ្ណោះ ។
សំណង់និងរចនាបទទាំងមូល រៀបចំរួចរាល់អស់ហើយទាំងការបំពាក់កៅអី ការដាំស្មៅ ទីលានបាល់ទាត់ បន្ទប់សណ្ឋាគារ កន្លែងលក់អីវ៉ាន់ បំពាក់ភ្លើង រចនាភ្លើង ប្រព័ន្ធទឹក ប្រព័ន្ធសំឡេង គឺសម្រេចរួចរាល់ហើយ នៅតែការសម្អាតប៉ុណ្ណោះ។ បន្ថែមពីនោះទៀត ចុងក្រោយការរៀបចំធ្វើកំណត់ត្រាប្រវត្តិសាស្រ្តនៃការសាងសង់ ធ្វើជាផ្ទាំងសិលាធំៗ ដែលបានឆ្លាក់នៅប្រទេសចិន រួចរាល់ហើយត្រៀមនឹងដឹកមកកម្ពុជា ។
ឯកឧត្តម វ៉ាត់ ចំរើន ថ្លែងថា៖«អ៊ីចឹងនៅថ្ងៃទី១៥ ខែ សីហានេះ ខាងភាគីចិននឹងផ្តល់ឱ្យមកគណៈកម្មាការជាតិអូឡាំពិកកម្ពុជា ដើម្បីចាប់ផ្តើម បន្តការថែរក្សា ថែទាំនិងជួសជុល ខណៈដែលភាគីចិននៅតែបន្តជួយក្នុងការថែរក្សាផងដែរ»។ លក្ខណៈពិសេស នៃពហុកីឡដ្ឋានជាតិនេះត្រូវបានបំពាក់ដែកធំៗនៅលើដំបូល ហើយដែកនេះអាចឱ្យយើងបំពាក់ ភ្លើងនិងកាំមេរ៉ា ផងដែរ ហើយដែកនៅលើដំបូលនេះ អាចឱ្យមនុស្សដើរលើដែកនេះរាប់សិបនាក់បានទៀតផង។ ដូច្នេះមិនមានបញ្ហាចោទក្នុងការផ្តិតយករូបភាពនោះទេ។
គម្រោងពហុកីឡាដ្ឋានជាតិមរតកតេជោ ដែលមានទីតំាងស្ថិតនៅសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ មានទំហំផ្ទៃដីជាង៨៥ហិកតានេះ ចំណាយថវិកាសាងសង់ប្រមាណ១៦០លានដុល្លារដែលជាជំនួយឥតសំណងរបស់រដ្ឋាភិបាលចិន គឺដើម្បីត្រៀមសម្រាប់រៀបចំការប្រកួតកីឡាអាស៊ីអាគ្នេយ៍ (SEA Games) លើកទី៣២ នៅឆ្នាំ ២០២៣ខាងមុខនេះ ដែលកម្ពុជានឹងធ្វើជាម្ចាស់ផ្ទះ ហើយពហុកីឡដ្ឋានជាតិមរតកតេជោនេះ ក៏អាចផ្ទុកអ្នកទស្សនាបានរហូតដល់ប្រមាណជាង៦ម៉ឺននាក់៕
