ក្លិបបាល់ទាត់វិសាខា សមាជិកពានរង្វាន់លីគកំពូលកម្ពុជា (Cambodian Premier League 2023-24) នៅរសៀលថ្ងៃទី៥ ខែធ្នូ ឆ្នាំ២០២៣ បានប្រកាសចែកផ្លូវគ្នាជាមួយលោក Simon McMenemy គ្រូបង្វឹកជនជាតិស្កុតឡែន ក្រោយរួមរស់ជាមួយគ្នាអស់រយៈពេល៣២៧ថ្ងៃ។
លោក Simon McMenemy ត្រូវបានក្លិបវិសាខា ប្រកាសតែងតាំងនៅថ្ងៃទី១២ ខែមករា ឆ្នាំ២០២៣ ស្របពេលដែលលោកមានអម្រែកចំនួន៣សំខាន់ៗក្នុងអាជីពលើទឹកដីកម្ពុជា ដោយក្នុងនោះដឹកនាំក្រុមចូលរួមប្រកួតពានរង្វាន់ Cambodian League Cup 2023, ពានរង្វាន់ Cambodian Super Cup 2023 និងពានរង្វាន់ Cambodian Premier League 2023-24។
យ៉ាងណាក្តីក្រោមការដឹកនាំរបស់បុរសវ័យ៤៦ឆ្នាំរូបនេះ ក្រុមវិសាខា បានរបូតពានរង្វាន់ចំនួន២រួចបានហើយ ក្នុងនោះមានពានរង្វាន់ Cambodian League Cup 2023, ពានរង្វាន់ Cambodian Super Cup 2023។
នៅក្នុងពានរង្វាន់ Cambodian League Cup 2023 ក្រុមវិសាខា ធ្លាក់ត្រឹមវគ្គពាក់កណ្តាលផ្ដាច់ព្រ័ត្រ ដោយថ្វីដៃក្រុមណាហ្គាវើល ក្រោយមិនចាញ់ទាល់តែសោះនៅវគ្គសន្សំពិន្ទុក្នុងពូល។ ក្នុងចំណោម៨ប្រកួត នៃបេសកកម្មដើមឆ្នាំ២០២៣ នេះ ក្រុមវិសាខា ទាត់បញ្ជូលទីគូប្រកួតបាន១៧គ្រាប់ និងរបូតវិញ៤គ្រាប់។
លទ្ធផលសរុបក្នុងពានរង្វាន់ Cambodian League Cup 2023 របស់ក្រុមវិសាខា ដឹកនាំដោយលោក Simon McMenemy៖
*ប្រកួតទី១ ក្នុងពូល A វិសាខា ២-១ ព្រៃវែង អេហ្វស៊ី
*ប្រកួតទី២ ក្នុងពូល A បឹងកេត ០-៣ វិសាខា
*ប្រកួតទី៣ ក្នុងពូល A វិសាខា ២-០ គិរីវង់សុខសែនជ័យ
*ប្រកួតទី៤ ក្នុងពូល A កងយោធពលខេមរភូមិន្ទ ០-៣ វិសាខា
*ប្រកួតទី៥ ក្នុងពូល A កោះកុង អេហ្វស៊ី ០-១ វិសាខា
*ប្រកួតទី៦ ក្នុងពូល A វិសាខា ៥-១ អគ្គិសនីកម្ពុជា
*ប្រកួតទី៧ វគ្គពាក់កណ្ដាលផ្ដាច់ព្រ័ត្រជើងទី១ ណាហ្គាវើលដ៍ ១-០ វិសាខា
*ប្រកួតទី៨ វគ្គពាក់កណ្ដាលផ្ដាច់ព្រ័ត្រជើងទី២ វិសាខា ១-១ ណាហ្គាវើលដ៍
ដោយឡែកចំពោះពានរង្វាន់ទី២ គឺ Cambodian Super Cup 2023 ដែលមានតែក្រុម២ប៉ុណ្ណោះ មានសិទ្ធិចូលរួមប្រកួតប្រជែង ដោយទី១ ក្រុមភ្នំពេញក្រោន ក្នុងនាមជាម្ចាស់ជើងឯកពានរង្វាន់ Cambodian Premier League ឆ្នាំចាស់ និងក្រុមវិសាខា ក្នុងនាមជាម្ចាស់ជើងឯកពានរង្វាន់ Hun Sen Cup ឆ្នាំចាស់។ ពានរង្វាន់នេះបង្កើតឡើងដើម្បីត្រៀមរដូវកាលថ្មី ដោយអត្ថន័យមិនខុសពីពាន FA Community Shield របស់អង់គ្លេស, Supercoppa Italiana របស់អ៊ីតាលី, Supertaça Cândido de Oliveira របស់ព័រទុយហ្គាល់, Trophée des Champions របស់បារាំង, Supercopa de España របស់អេស្ប៉ាញ ជាដើម។
ជាលទ្ធផលក្រុមភ្នំពេញក្រោន បានបន្តយកឈ្នះក្រុមវិសាខា ដោយលទ្ធផល ២-១ ដូចកាលពីពេលក្រុមទាំង២ ប៉ះគ្នាក្នុងរដូវកាលឆ្នាំ២០២២ ដែរ។ ការរបូតពាន ឆ្នាំទី២នេះ ធ្វើឡើងនៅពហុកីឡដ្ឋានជាតិ ក្នុងរាជធានីភ្នំពេញ ក្រោមក្រសែភ្នែកទស្សនិកជន ១៣០១៦ នាក់។
ចំពោះការប្រកួតលើវិថីនៃការប្រជែងពានក្នុងក្របខណ្ឌ Cambodian Premier League វិញ លោក Simon McMenemy របូតកៅអីត្រឹមសប្ដាហ៍ទី១២ ក្រោយប្រកួតបាន១២លើក ឈ្នះ៧លើក ស្មើ២លើក និងចាញ់៣លើក។ លទ្ធផលរបស់វិសាខា ក្រោមការដឹកនាំរបស់លោក Simon McMenemy ចំនួន១២សប្ដាហ៍មកនេះមាន៖
*សប្តាហ៍ទី១ វិសាខា ២-០ គីរីវង់សុខសែនជ័យ
*សប្ដាហ៍ទី២ ណាហ្គាវើល ១-៤ វិសាខា
*សប្ដាហ៍ទី៣ វិសាខា ៤-០ ISI ដង្កោសែនជ័យ
*សប្ដាហ៍ទី៤ បឹងកេត ៤-២ វិសាខា
*សប្ដាហ៍ទី៥ វិសាខា ០-១ ភ្នំពេញក្រោន
*សប្ដាហ៍ទី៦ វិសាខា ០-១ ព្រះខ័នរាជស្វាយរៀង
*សប្ដាហ៍ទី៧ វិសាខា ២-០ Tiffy Army FC
*សប្ដាហ៍ទី៨ វិសាខា ២-១ អង្គរថាយហ្គឺរ
*សប្ដាហ៍ទី៩ ព្រៃវែង ០-២ វិសាខា
*សប្ដាហ៍ទី១០ គីរីវង់សុខសែនជ័យ ០-២ វិសាខា
*សប្ដាហ៍ទី១១ វិសាខា ១-១ ណាហ្គាវើល
*សប្ដាហ៍ទី១២ ISI ដង្កោសែនជ័យ ១-១ វិសាខា
តើគ្រូបង្វឹកថ្មីរូបណា នឹងមកចូលជំនួសលោក Simon McMenemy ដើម្បីបញ្ចប់រដូវកាលឆ្នាំ២០២៣-២៤ ដែលនៅសល់១៥សប្ដាហ៍នៃវគ្គសន្សំពិន្ទុទាំង៣ជុំ?