កំពូលតារាសម្ដែងអាមេរិកដ៏ល្បីល្បាញ និងជាម្ដាយចិញ្ចឹមកូនខ្មែរលោកស្រី Angelina Jolie បានបង្ហើបតម្រុយថាខ្លួនចង់បញ្ចប់អាជីពសម្ដែង ហើយមានគម្រោងចាកចេញពី LA (Los Angeles) ហើយមករស់នៅក្នុងប្រទេសកម្ពុជាជាអចិន្ត្រៃយ៍ ក្រោយអស់សេរីភាពដើរហើរដោយសេរី អំឡុងពេលលែងលះជាមួយនឹងអតីតស្វាមី Brad Pitt។
កំពូលតារាសម្ដែងវ័យ៤៨ឆ្នាំបាននិយាយពីអារម្មណ៍មិនពេញចិត្តរបស់ខ្លួនចំពោះ Hollywood នៅក្នុងទស្សនាវដ្ដី WSJ ដែលនឹងចេញផ្សាយនៅក្នុងខែធ្នូ និងមករា ដោយបានពន្យល់ថាទីនេះគឺជាកន្លែងសំបូររឿងស្មុគស្មាញហើយនាងច្បាស់ជាមិនបានក្លាយជាតារាសម្ដែងនោះទេ បើសិននាងប្រឡូកសិល្បៈក្នុងពេលបច្ចុប្បន្ន។់
នាងបានពន្យល់បន្ថែមថានាងចង់ចាកចេញឱ្យបានកាន់តែឆាប់កាន់តែល្អ ទៅរស់នៅក្នុងផ្ទះរបស់នាងឯទ្វីបអាស៊ី ប៉ុន្តែលុះត្រាតែបណ្ដឹងរវាងនាងនិងអតីតស្វាមីរកបានដំណោះស្រាយ។
អតីតគូស្នេហ៍ដ៏មានឥទ្ធិពលនៅលើពិភពលោកបានចាប់ផ្ដើមទាក់ទងគ្នាកាលពីឆ្នាំ២០០៥ និងរៀបការនៅឆ្នាំ២០១៤ ប៉ុន្តែបានចែកផ្លូវគ្នា២ឆ្នាំពោលគឺនៅឆ្នាំ២០១៦ ហើយចាប់ពីពេលនោះមកអ្នកទាំងពីរបានតស៊ូក្ដីជាមួយគ្នា ក្នុងដំណើរការនៃនីតិវិធីលែងលះអស់រយៈពេល៧ឆ្នាំមកហើយ ដើម្បីដណ្ដើមសិទ្ធិលើកូនៗទាំង៦នាក់របស់ពួកគេ។
លោកស្រី បានប្រាប់ WSJ ថា ការប្ដឹងផ្ដល់គ្នាធ្វើឱ្យលោកស្រីបាត់បង់សេរីភាពក្នុងការធ្វើដំណើរ។ លោកស្រីទទួលស្គាល់ទៀតថាបើខ្លួនអាចចាប់ផ្ដើមម្ដងទៀត លោកស្រីនឹងមិនជ្រើសរើសយកការសម្ដែងជាអាជីពនោះឡើយ ព្រោះតែមហាជនសង្ឃឹមចង់ដឹងពីជីវិតឯកជនរបស់លោកស្រី ក្នុងនាមជាបុគ្គលល្បី។
មែនទែនទៅលោកស្រី Angelina Jolie បានធ្វើការងារជាមួយនឹងជួយដល់ជនភៀសខ្លួនជាង២ទសវត្សរ៍មកហើយក្នុងនោះលោកស្រីបានទៅកាន់ជំរុំក្នុងប្រទេសកម្ពុជា Tanzania, Sierra Leone, និងប៉ាគីស្ថាន។ លោកស្រី និងអតីតស្វាមី Brad Pitt មានកូនរួមគ្នាចំនួន៦នាក់ មានកូនចិញ្ចឹម៣នាក់មាន ខ្មែរ វៀតណាម អេត្យូពី និងកូនបង្កើតចំនួន៣នាក់៕
ទស្សនាវីដេអូខាងក្រោមនេះ៖