សិល្បៈជាតិ៖ ជឿថា មហាជនអ្នកតាមដាននៅលើបណ្ដាញសង្គមទាំង TikTok និងហ្វេសប៊ុក ច្បាស់ជាធ្លាប់បានទស្សនាវីដេអូកំប្លែងសើចសប្បាយរបស់កុមារា ២ នាក់ ដែលពួកគេមានទេពកោសល្យពូកែសម្ដែងលេងទឹកមុខក្រមិចក្រមើម និងពូកែវោហាសព្ទបង្កឱ្យផ្ទុះសំណើចជាមួយនិងឃ្លីបវីដេអូខ្លី។ តើក្មេងប្រុស ២ នាក់មានប្រភពមកពីណា? នៅពីក្រោយការសើចសប្បាយ តើជីវិតពិតរបស់ពួកគេកម្សត់កម្រយ៉ាងណានោះ? ថ្ងៃនេះសារព័ត៌មានត្រយង សូមជម្រាបជូនពីសាវតាររបស់ក្មេងប្រុសទាំង២នាក់ និងអ្នកដឹកនាំផលិតមាតិកានោះឡើងដូចតទៅ៖
រាល់វីដេអូនីមួយៗត្រូវបានផលិត និងដឹកនាំការសម្ដែងដោយយុវជនមួយរូបឈ្មោះ វ៉ាង វីន ដែលកំពុងតែរស់នៅឯខេត្តកំពង់ចាម។ យុវជនមួយនេះមានឧបនិស្ស័យចំពោះការផលិតវីដេអូខ្លីៗ និងដឹកនាំសម្ដែងរឿង។ ប្រុសវីន បានបបួលកុមារា ចុក វិច្ចកា ហៅ តុងតុង មានវ័យ ១២ ឆ្នាំ និងកុមារ ម៉ៅ លំអង ហៅ អង មានវ័យ ១១ ឆ្នាំ មកចូលរួមសម្ដែងជាមួយគ្នា។ តាមការលើកឡើងរបស់ប្រុសវីន បានប្រាប់មកអ្នកសារព័ត៌មានត្រយងថា ពួកគេទាំង ៣ រស់នៅភូមិខ្វិត ឃុំតាំងក្រសាំង ស្រុកបាធាយ ខេត្តកំពង់ចាម ឪពុកម្ដាយជាកសិករ និងប្រកបរបរជាកម្មករោងចក្រ ដែលមានជីវភាពមិនសូវជាធូរធារប៉ុន្មានទេ។
ប្រុសវីន បានលើកឡើងថា ខ្លួនចាប់អារម្មណ៍ផលិតមាតិកាកំប្លែងសើចសប្បាយនេះ ក៏ដោយសារខ្លួនចង់ជួយរកលុយដោះស្រាយបំណុលឪពុកម្ដាយខ្ញុំ និងមានមហិច្ឆិតាចង់សម្រេចក្ដីស្រមៃមួយដ៏ធំក្នុងឆាកជីវិត។ ប្រុសវីនបន្តថា ជំនាញដឹងនាំសម្ដែងនេះខ្លួនចេះមកពីការប្រឹងប្រែងឈ្វេងយល់ខ្លួនឯងផង និងមើលរឿងភាគតាមបណ្ដាញអ៊ិនធឺណែតខ្លះៗផង ដើម្បីយកជាបទពិសោធន៍។ ហើយអស់រយៈពេលជាង ៣ ឆ្នាំមកហើយ ដែលខ្លួនបានយកចិត្តទុកដាក់ផ្ដោតលើការងារផលិតវីដេអូនេះ។
ប្រុសវីន បន្តថា នៅពេលចាប់ផ្ដើមការផលិតវីដេអូដំបូង មិនសូវមានអ្នកចូលចិត្ត ឬសរសើរ ឬក៏លើកទឹកចិត្តប្អូននោះទេ។ ហើយក៏មានពេលខ្លះខ្លួនធ្លាប់បាក់ទឹកចិត្តរួចគិតចង់ឈប់ម្ដងម្កាល។ ប៉ុន្តែជាញឹកញាប់តែខ្លួនគិតថា ខ្លួនមានទេពកោសល្យអាចផលិតវីដេអូបាន ម្ល៉េះហើយបើទោះបីជាហត់នឿយប៉ុណ្ណាក៏ដោយក៏នៅតែទ្រាំធ្វើការងារនោះដោយអំណត់ និងចងចាំនូវពាក្យមួយឃ្លាថា ការងារនីមួយៗមិនងាយស្រួលឡើយ!។
ប្រុសវីន បានទម្លាយពីបញ្ហាផលលំបាកនាពេលបច្ចុប្បន្ននេះថា មានពេលខ្លះជួបឧបសគ្គជាមួយបញ្ហាក្នុងគ្រួសារ បញ្ហាផ្លូវចិត្ត ផលលំបាកក្នុងការថត ការគ្រប់គ្រងតួនីមួយៗ នៅមិនទាន់មានប្រាក់ខែ ត្រូវថតទាំងថ្ងៃទាំងយប់ ម្នាក់ៗនៅជាប់រវល់ត្រូវបែងចែកពេលវេលាការសិក្សា មិនសូវមានសម្លៀកបំពាក់សមរម្យ កាំមេរ៉ាមិនសូវច្បាស់ ជាពិសេសជួនឧបសគ្គខ្លាំងបំផុតគឺ ខ្វះថវិកាក្នុងផលិតជាដើម។
ប្រុសវីន បានគូសបញ្ជាក់ថា តួសម្ដែងនៅក្នុងឃ្លីបវីដេអូ កុមារា តុងតុង ទើបរៀនថ្នាក់ទី៦ រីឯកុមារា អង កំពុងសិក្សាថ្នាក់ទី ៥ ដោយពួកគេទាំងពីរនាក់លះបង់កម្លាំងកាយចិត្តឆ្លៀតពេលទំនេរពីការសិក្សាមកចូលរួមក្នុងការសម្ដែងឃ្លីបនីមួយៗ ដើម្បីកំដរអារម្មណ៍មហាជនអ្នកទស្សនាឱ្យរំសាយអស់ទុក្ខកង្វល់។
សូមជម្រាបថា រាល់វីដេអូកំប្លែងរបស់ក្រុមសម្ដែង វ៉ាង វីន គឺទទួលបានការគាំទ្រយ៉ាងខ្លាំងនៅលើបណ្ដាញសង្គម រហូតដល់វីដេអូខ្លះមានអាត្រាទស្សនាដល់ទៅលានដងឯងណោះ៕