សិល្បៈជាតិ៖ ស្ថាបនិកភ្លើងគប់ និង ជាអ្នកបង្កើតមហោស្រពសិល្ប:បុណ្យភូមិ កញ្ញា រិទ្ធី លំអរពេជ្រ បានធ្វើឱ្យកម្ពុជាមោទកភាព ជាថ្មីម្តងទៀតក្នុងនាមជាកូនខ្មែរ ដែលពាំនាំនូវខ្សែភាពយន្តខ្លីរបស់ខ្លួនទៅបង្ហាញនូវមហោស្រពភាពយន្តអន្តរជាតិ CANNES នៅប្រទេសបារាំង។
បន្ទាប់ពីបានចូលរួមវគ្គបណ្តុះបណ្តាលជំនាញវិជ្ជាជីវៈផលិតករភាពយន្ត ក្នុងកម្មវិធី The Directors Factory អ្នករៀបចំកម្មវិធី នឹងធ្វើការជ្រើសរើសខ្សែភាពយន្តរបស់ផលិតករនានា ដើម្បីបង្ហាញក្នុងមហោស្រពអន្តរជាតិ Cannes។ ក្នុងចំណោមផលិតករជាច្រើនរូប ដែលចូលរួមក្នុងវគ្គបណ្តុះបណ្តាល នេះមានតែខ្សែភាពយន្តរបស់ ផលិតករ៤ក្រុម ដែលមាន៨រូបប៉ុណ្ណោះដែលមានឪកាសយកមកបញ្ចាំងនូវព្រឹត្តិការណ៍អន្តរជាតិនេះ។ ក្នុងនោះស្នាដៃរបស់កញ្ញារិទ្ធីលម្អពេជ្រ តំណាងអោយកម្ពុជា សហការជាមួយផលិតករហ្វីលីពីន ត្រូវបានជ្រើសរើសជាពិសេស។ ខ្សែភាពយន្តខ្លីនេះនឹងចាក់បញ្ចាំងក្នុងរាត្រី Directors’ Fortnight (aka Quinzaine des Cineastes) នៅក្នុងខែឧសភា។
ខ្សែភាពយន្តខ្លីរបស់ផលិករកម្ពុជាដែលសហការជាមួយផលិតករហ្វីលីពីន នឹងចាប់ផ្តើមការ តម្លើងសាច់រឿង និង ថតនៅក្នុង ខែមីនាឆ្នាំក្រោយនេះ នៅ Dapitan ( ដាបពីទិន ) ដែលជាទីក្រុងមួយនៅ ក្នុងឧបទ្វីប Zamboanga (ហ្សេមបូអាងហ្កា) របស់ប្រទេស ហ្វីលីពីន ដែលត្រូវបានគេស្គាល់ថាជាទីសក្ការបូជាជាច្រើន និង ជាមជ្ឈមណ្ឌលសម្រាប់ទេសចរណ៍ក្នុងស្រុក និងអន្តរជាតិ។
សូមជម្រាបបន្ថែមថា មហោស្រពភាពយន្តអន្តរជាតិ CANNES នៅប្រទេសបារាំងដែល ជាមហោស្រពភាពយន្តប្រចាំឆ្នាំ ដែលបញ្ចាំងខ្សែភាពយន្តថ្មីៗគ្រប់ប្រភេទ និង ភាពយន្តឯកសារពីជុំវិញពិភពលោក។ វាត្រូវបានបង្កើតឡើងក្នុងឆ្នាំ 1946 ហើយជាមហោស្រពភាពយន្តធំមួយក្នុងចំនោមមហោស្រពភាពយន្តអឺរ៉ុបធំៗ ចំនួន៣ ដូចជា ហោស្រពភាពយន្តទីក្រុង Venice (វេនីស) ក្នុងប្រទេសអ៊ីតាលី និងមហោស្រពភាពយន្តអន្តរជាតិទីក្រុង Berlin ក្នុងប្រទេសអាល្លឺម៉ង់៕
