សិល្បៈជាតិ៖ ត្រឹមតែពាក់កណ្ដាលខែធ្នូ ចុងឆ្នាំ ២០២៣នេះ តារាសិល្បៈ ៣ ដួងបានបង្ហោះដំណឹងរីករាយឱ្យអ្នកគាំទ្របានដឹងថា ពួកគេទទួលបានទាយាទតូចដែលជាសមាជិកគ្រួសារថ្មី ហើយទាយាទតូចៗទាំងនោះ សុទ្ធតែមកចាប់កំណើតក្នុងពូជពង្សឈាមជ័រជាអ្នកសិល្បៈមានទាំងបវរកញ្ញា និងតារាចម្រៀង។ ចង់ដឹងថាតារាដួងណាខ្លះនោះ ថ្ងៃសារព័ត៌មានត្រយងនឹងនាំអារម្មណ៍ប្រិយមិត្តទាំងអស់គ្នាមកតាមដានជាពិសេស៖
ឌី លីកា ជាអតីតម្ចាស់មកុដ Miss Grand Cambodia ឆ្នាំ ២០១៨ ដោយអ្នកនាងទើបតែប្រសូតបានទាយាទប្រុសនៅថ្ងៃទី១ ខែធ្នូ ឆ្នាំ ២០២៣ និងដាក់ឈ្មោះថា កែវ វិសិដ្ឋ។ នៅឆ្នាំ ២០២១ អ្នកនាង ឌី លីកា បានរៀបមង្គលការជាមួយលោកកែវ អមរា ដែលគេស្គាល់ថាជាអ្នកជំនួញមានមុខមាត់ម្នាក់ក្នុងសង្គម និងបានប្រមូលអ្នកកំដរក្រមុំជាបវរកញ្ញាដូចគ្នា គឺ កញ្ញាសេង រដ្ឋា និងកញ្ញា លីវ ជីលី ម្ចាស់មកុដ Miss Supra Cambodiaជាដើម។
ចំណែកនាថ្ងៃទី ១៤ ខែធ្នូ ២០២៣ កន្លងមកនេះ តារាចម្រៀង នៅ ស៊ីនឿន ក៏បានបង្ហោះរូបភាពរីករាយជាមួយនិងភរិយា រួមទាំងក្រុមគ្រួសារ ដោយលោកបានឃើញមុខរបស់កូនស្រីដែលបានសម្រាលនៅមន្ទីរពេទ្យនាទឹកដីសហរដ្ឋអាមេរិក និងដាក់ឈ្មោះថា ឈ្មោះថា ឆាឡត មនោរាហ៍។ នៅឆ្នាំ ២០២១ តារាចម្រៀងប្រុស នៅ ស៊ីនឿន បានរៀបមង្គលការឧត្តមភរិយាជាក្រមុំអាណិកជនឈ្មោះ សោម ដូរម៉ានិច្ច ហើយក្រោយរៀបការរួចទាំងពីរបានមកប្រើជីវិតរស់នៅលើទឹកដីសហរដ្ឋអាមេរិក ប៉ុន្តែលោកនៅតែបន្តអាជីពជាតារាចម្រៀងដដែរ។
ចុងក្រោយនេះ គឺ Miss Universe Cambodia 2021 អ្នកនាង ងិន ម៉ារ៉ាឌី ក៏បានបង្ហោះដំណឹងរីករាយនៅបណ្ដាញសង្គមឱ្យអ្នកគាំទ្របានដឹងថា អ្នកនាងសម្រាលបានកូនស្រីនៅថ្ងៃទី ១៥ ខែធ្នូ ឆ្នាំ ២០២៣ និងបានដាក់ឈ្មោះឱ្យកូនស្រីយ៉ាងពីរោះថា ឡូរ៉េន ទេវី ទិត្យ ។ អ្នកនាង ងិន ម៉ារ៉ាឌី ក៏បានរៀបអាពិពាហ៍ជាមួយកូនកំឡោះអាណិកជនគឺ លោក ទិត្យ វ៉ាន់ណូរ៉ា កាលពីថ្ងៃទី ២ ខែមេសា ឆ្នាំ ២០២៣ និងជាបវរកញ្ញា Miss Universe Cambodia បើកមុខមុនគេក្នុងការក្រាបផ្ទឹមសំពះមេបាទាំងសងខាងសាងគ្រួសារយ៉ាងមានសុភមង្គល៕