បច្ចុប្បន្នទីផ្សារប្រដាល់គុនខ្មែរ នៅក្នុងប្រទេសកម្ពុជា បានឈានដល់កម្រិចខ្ពស់ ដោយអ្នកប្រដាល់ល្បីៗឈ្មោះមួយចំនួនមានតម្លៃខ្លួនដល់ម៉ឺនដុលាររាល់ពេលឡើងសង្វៀនម្ដងៗ ដោយមានប្រកួតខ្លះទៀតមានដាក់រថយន្ត សម្រាប់ផ្ដល់ជូនកីឡាករជ័យលាភីផងដែរ។ លើសពីនេះគុនខ្មែរ ក៏បានបង្ហាញឱ្យពិភពលោកក៏ដូចជាប្រទេសជិតខាងបានស្គាល់ពីក្បាច់គុនខ្មែរបុរាណ្យកាន់ច្បាស់ជាងមុន ពិសេសនៅលើកឆាកអន្តរជាតិតាមរយ:ការឡើងប្រដាល់របស់កីឡាករលំដាប់ៗនៅកម្ពុជា។
ជាក់ស្តែងមួយរយ:ចុងក្រោយនេះប្រជាពលរដ្ឋកម្ពុជា កំពុងមានការចាប់អារម្មណ៍យ៉ាងខ្លាំងលើការទស្សនាការប្រដាល់ដែលបានរៀបចំដោយស្ថានីយ៍ទទូរទស្សន៍ល្បី និងបាននាំយកកីឡាករលំដាប់អត្តរជាតិមកប្រកួតផងដែរ។ លើសពីនេះម្ចាស់ឧបត្តមកម្មវិធីក៏បានទាញផលប្រយោជន៍ពីការដាក់ Sponsor ផលិតផលរបស់ខ្លួនតាមរយ:ដាក់ប្រាក់រង្វាន់រាប់លានរៀប ឡាន ម៉ូតូ ដើម្បីឱ្យកីឡាករវាយដណ្ដើមយក។
ដោយកន្លងមកអ្នកលេងគុនខ្មែរ ពេជ្រ សម្បត្តិ បានក្លាយជាម្ចាស់រថយន្តពីកម្មវិធីគុនខ្មែរអលស្តារ បន្ទាប់ពីទទួលបានសំឡេងគាំទ្រច្រើនជាងគេក្នុងចំណោមកីឡាករគុនខ្មែរចំនួន ៣នាក់ផ្សេងទៀត ដែលជាបេក្ខ ភាពដណ្តើមរថយន្ត កាលពីថ្ងៃទី២២ ខែសីហា ឆ្នាំ២០២៣។
មុននឹងក្លាយជាម្ចាស់រថយន្តពីកម្មវិធី បេក្ខភាពទាំង៤រូបត្រូវឈ្នះដៃគូជាដាច់ខាតក្នុងនោះរួមមាន៖ ម៉ានូ សិល្បៈផ្តួល ឆាតសាម័យយឹម (ឡាវ) ត្រឹមទឹកទី២, ពេជ្រ សម្បត្តិ ឈ្នះ Saw Kolo(ភូមា) ត្រឹមទឹក២, អេលីត សាន់ ឈ្នះ Zaw Aye See(ភូមា) ខណៈ រឿង សោភ័ណ្ឌ ផ្តួល Omar El Ouers (ម៉ារ៉ុក) ត្រឹមទឹកទី១។ យ៉ាងណា អ្នកគាំទ្រប្រដាល់ក្បាច់គុនបុរាណខ្មែរ បានបោះឆ្នោតឱ្យពេជ្រ សម្បត្តិ ឈ្នះរថយន្តនៅក្នុងកម្មវិធីដ៏ធំនេះ។
ងាកមកជើងខ្លាំងគុនខ្មែរ ឃឹម បូរ៉ា ឈ្នះឡាន១គ្រឿង ក្រោយផ្តួលគូប្រកួត អេលីត សាន់ ត្រឹមទឹកទី១ ពីព្រឹត្តិការណ៍ប្រដាល់ប៊ូសស្ត្រងឲ្យរថយន្ត នាយប់ថ្ងៃទី១១ តុលា នៅក្នុងវិមានពហុកីឡដ្ឋានជាតិ។ មុនប៉ះគ្នានៅវគ្គផ្ដាច់ព្រ័ត្រនេះ កីឡាករកម្ពុជា៤រូប អេលីត សាន់ ឈិត សេរីវណ្ណថង ឃឹម បូរ៉ា និង ទូច ដេវីត ត្រូវប្រកួតជាមួយបរទេសនៅវគ្គទី១ រៀងៗខ្លួនក្រោយពេលឈ្នះ គឺត្រូវរង់ចាំសារច្រើនជាងគេលេខ១ និងលេខ២ នឹងត្រូវឡើងទៅប្រកួតជាមួយគ្នានៅវគ្គទី២នេះ អ្នកឈ្នះបានឡាន១គ្រឿងភ្លាម។
កាន់តែចាប់អារម្មណ៍ទៀតនោះ កីឡាករវ័យ ២០ឆ្នាំ អេ អាំម៉ារីន ទទួលបានរង្វាន់រថយន្ត Pick-Up ថ្មីសន្លាង ១គ្រឿងពី Ganzberg កាលពីថ្ងៃអាទិត្យ ទី៥ ខែវិច្ឆិកា ឆ្នាំ២០២៣ កន្លងទៅ លើសង្វៀន ក្នុងទឹកដីនៃប្រទេសអូស្រ្តាលី។ កូនប្រុសវីរបុរសគុនខ្មែរ អេ ភូថង រូបនេះ បានវាយឈ្នះដៃគូកីឡាករ Clinton Coke ជនជាតិអូស្រ្តាលី ដោយលោកអាជ្ញាកណ្ដាលបញ្ឈប់ក្នុងទឹកទី៤។ ជ័យជម្នះនេះកីឡាករ អេ អាំម៉ារីន ទទួលបានខ្សែក្រវ៉ាត់គុនខ្មែរពិភពលោកទម្ងន់៦៦គីឡូក្រាម និងទទួលបានរង្វាន់រថយន្តថ្មី ១គ្រឿង។
ដូចគ្នានេះដែរកីឡាករជើងខ្លាំងមានរហស្សនាម«អ្នកលេងពូថៅដៃ» ធឿន ធារ៉ា ដណ្ដើមយកជ័យជម្នះចំនួន ៣លើកជាប់ៗគ្នា ពីការប្រកួតគុនខ្មែរ Kun Khmer World Cup 2023 នាយប់ថ្ងៃទី២៣ ខែវិច្ឆិការ ឆ្នាំ២០២៣ នឹងបានក្លាយជាម្ចាស់ខ្សែក្រវាត់ក្នុងប្រភេទទម្ងន់ ៧២គីឡូក្រាម និងទទួលបានកាដូយក្ស គឺរង្វាន់ឡាន Pick-Up ថ្មីសន្លាង១គ្រឿងទៀតពីម្ចាស់ឧបត្ថម្ភធំ។
ជ័យជម្នះនេះ ធឿន ធារ៉ា ធ្វើបានក្រោយប្រកួតជម្រុះតាមបែបម៉ារ៉ាតុង យកឈ្នះអ្នកប្រដាល់អ៊ុយក្រែន White Shark ដោយពិន្ទុ និងបន្តយកឈ្នះកីឡាកររបស់សាធារណរដ្ឋឆែក Michael ដោយសន្លប់នៅទឺកទី១ ខណ:ប្រកួតទី៣ យកឈ្នះកីឡាករប្រេស៊ីល Machaado Bento ដោយសន្លប់នៅទឹកទី១។
ខណ:កាលពីពេលថ្មីៗនេះ នារាត្រីថ្ងៃទី១៤ ធ្នូ កីឡាករគុនខ្មែរ លន បញ្ញា គឺជាអ្នកប្រដាល់ទី ៥ ដែលបានក្លាយជាម្ចាស់រថយន្តខ្លាញ់គោថ្មីមួយគ្រឿងម៉ាក Mazda Seden ពីប៊ូសស្រ្តង បន្ទាប់ពីយកឈ្នះកីឡាករ មឿន សុខហ៊ុច ក្រោយមានសម្លេងឆ្នោតគាំទ្រឲ្យឡើងទៅប្រកួតវគ្គដណ្ដើម ក្នុងចំណោមកីឡាករគុនខ្មែរ ៤រូបមាន ដំរីភ្លុកពិឃាដ ផល សោភ័ណ្ឌ, ជើងរន្ទះដងទន្លេសាប មឿន សុខហ៊ុច, នាគកំណាចខេត្តកោះកុង យ៉េន ឌីណា និងអ្នកលេងគុនខ្មែរ លន បញ្ញា ។
សូមរំលឹកដែរថា ក្រៅពីអ្នកប្រដាល់ ៥រូបខាងលើកក៏នៅមានអ្នកប្រដាល់ម្នាក់ទៀតក៏ធ្លាប់ទទួលបានរង្វាន់រថយន្ត ១គ្រឿងផងដែរ គឺជាងកាត់សក់ដៃឯក ព្រុំ សំណាង ប៉ុន្តែកាលនោះមិនមែនឈ្នះដោយប្រើក្បាច់គុនប្រដាល់គុនខ្មែរលើសង្វៀន តែជាការប្រកួតក្នុងព្រឹត្តិការណ៍បីស្ត្រីពិភពលោក Boostrong Poer to Women Festival ដែលមានអ្នកចុះឈ្មោះចូលរួមចំនួន ៥០០គូ។ ជាលទ្ធផល ជើងឯកបានទៅលើកលោក យិន សំអុល អាចបីប្រពន្ធរបស់ខ្លួនឈ្មោះ សួន កល្យាណី រហូតដល់៨:១៧ ម៉ោង ហើយ ព្រុំ សំណាង បានត្រឹមលេខ២ប៉ុណ្ណោះ។ ប៉ុន្តែខាងអ្នករៀបចំកម្មវិធីបានសម្រេចប្តូររង្វាន់ពីម៉ូតូ X-Ride Adventure ទៅជារថយន្តម៉ាក Mazda Seden ដែលមានតម្លៃប្រមាណជា ៣ម៉ឺនដុល្លារ អោយ ព្រុំ សំណាង ដូចអ្នកឈ្នះជើងឯកដែរ៕
ចុះប្រិយមិត្តវិញ យល់យ៉ាងណាចំពោះការដាក់រង្វាន់ជា ឡាន ម៉ូតូ ដើម្បីងោយអ្នកប្រដាល់ដែលឈ្នះទទួលបាន?
