សិល្បៈជាតិ៖ លោក ម៉ូន ពេជ្រ គឺជាយុវជនគំរូ ដែលឪពុកម្ដាយគ្រប់រូបប្រាថ្នាចង់ឱ្យកូនៗរបស់ខ្លួនយកតម្រាប់តាម ព្រោះយុវជនដែលកើតក្នុងត្រកូលកសិកររូបនេះ បានប្រឹងប្រែងរៀនសូត្ររហូតជាប់អាហារូបករណ៍និងបានបញ្ចប់ការសិក្សាសាលាបណ្ឌិតយោធាអាមេរិកដោយជោគជ័យ។
ត្បិតរស់នៅលើទឹកដីស៊ីវិល័យក្ដី តែ ម៉ូន ពេជ្រ មិនដែលវង្វេងវង្វាន់ ហើយភ្លេចថាដើមកំណើតខ្លួនគឺជាជនជាតិខ្មែរនោះឡើយ លោកតែងតែឆ្លៀតចំណាយពេលវេលាដ៏សែនមមាញឹកមកចែករំលែកនូវទស្សនៈល្អៗ ដែលសុទ្ធសឹងជាគតិអប់រំ ដាស់តឿនស្មារតីយុវជនជំនាន់ក្រោយ កុំឱ្យភ្លើតភ្លើនភ្លេចខ្លួន រហូតអាចនឹងបាត់បង់ឱកាសនិងអនាគត។
ថ្មីៗនេះសំណេរខ្លីមួយរបស់លោក វាហាក់ដូចជាលោកកំពុងទះកំផ្លៀងយុវជនមួយចំនួនដែលចូលចិត្តស្រែកក្ដែងៗថាខ្លួនស្នេហាជាតិ ចង់ចូលរួមជួយជាតិ តែបែរជាមិនប្រឹងប្រែងសិក្សារៀនសូត្រ ស្វះស្វែងរកចំណេះវិជ្ជាដាក់ខ្លួនទៅវិញ។ តើឱ្យជួយជាតិដោយរបៀបណាកើត បើត្រឹមខ្លួនឯងជួយមិនទាំងបានផងនោះ! លោក ម៉ូន ពេជ្រ បានលើកឡើងថាដូច្នេះ៖ «ជូនចំពោះប្អូនៗជាទីរាប់អាន៖ប្រសិនបើប្អូនៗ ចង់ជួយជាតិ រឿងដំបូងដែលប្អូនត្រូវធ្វើនោះគឺ ខិតខំប្រឹងប្រែងរៀនសូត្រ។ បន្ទាប់មកទៀត ពេលប្អូនមានចំណេះ នោះប្អូននឹងដឹងថា អ្វីដែលប្អូនគួរធ្វើជាបន្ត។ #ចំណេះដឹងផ្ដល់ឲ្យយើងនូវឯករាជ្យភាពក្នុងការគិត»។
ពាក្យពេចន៍ខ្លីតែបង្កប់ដោយសារអប់រំ និងក្រើនរំលឹកដល់យុវជនជំនាន់ក្រោយរបស់លោកនេះត្រូវបានអ្នកលេងបណ្ដាញសង្គម កោតសរសើរ និង យល់ស្របយ៉ាងពេញទំហឹង។ ត្រយងសូមលើកយកខ្លឹមសារមួយចំនួនមកជម្រាបជូនដូចខាងក្រោម៖
«ពិតជាត្រឹមត្រូវណាស់បង មានតែឆន្ទៈស្នេហាជាតិតែមិនមានចំណេះដឹងក៏យើងមិនអាចជួយជាតិបានល្អដែរ»
«ខ្ញុំពិតជាគោរព និង សសើរដោយស្មោះ ចំពោះមនសិកាស្នេហាជាតិរបស់បង 🙏»
«ត្រឹត្រូវហើយ មានចំណេះដឹង មានការត្រិះរិពិចារណាបានត្រឹមត្រឹវ គ្មានអ្នកណាមកពង្វក់យើងបានទេ ❤️✅»
«មាតុភូមិយើងឈឺហើយ បើមិនខំព្យាបាលទេយ៉ាប់»។
សូមជម្រាបជូនថា លោក ពេជ្រ ម៉ូន ឬ ពេជ្រ ចន្ទ្រាគឺជាកូនកំព្រារស់នៅជាមួយជីដូន នៅខេត្តកំពង់ឆ្នាំង។ លោកគឺជាអតីតនិស្សិតអាហាររូបករណ៍ផ្នែកទំនាក់ទំនងអន្តរជាតិនៅសកលវិទ្យាល័យបញ្ញាសាស្ត្រនិងជានិស្សិតបញ្ចប់ការសិក្សានៅសាលាពេទ្យផងដែរ។ លោក ម៉ូន ពេជ្រ គឺជាយុវជនខ្មែរ ស្ថិតក្នុងគ្រួសារក្រីក្រម្នាក់ដែលបានបញ្ចប់ការសិក្សាបណ្ឌិតសភាយោធាកងទ័ពជើងទឹក នៅសហរដ្ឋអាមេរិក៕