តារាចម្រៀង-តារាសម្ដែង-ពិធីករនិងតារាដើរម៉ូដដ៏ស្រស់សោភាដែលកំពុងតែឡើងកូដទាំងជីវិតការងារក្នុងសិល្បៈ និងជីវិតឯកជនព្រោះមានបុរសវ័យក្មេងរូបសង្ហា វង ជីវ័ន្ត បើកបេះដូងសារភាពស្នេហ៍បែរជាមកជួបទុក្ខព្រោះតែគណនីហ្វេសប៊ុកក្ដី ទំព័រហ្វេសប៊ុកក្ដី សូម្បីតែឆាណែលយូធូបក៏ត្រូវបានចោរអ៊ិនធឺណិតឬ Hacker លួចចោះចូលទិន្នន័យនិងលួចយកទៅគ្រប់គ្រងបានសម្រេចកាលពីរាត្រីទី២៤ ខែធ្នូ ឆ្នាំ២០២៣ នាវេលាប្រមាណជាម៉ោង១០យប់។ នេះបើតាមការបង្ហោះចែករំលែកពីម្ចាស់ខ្លួន ដែលបានប្រើប្រាស់ឈ្មោះគណនីថា Yem Lakena។
ក្រោយបានឃើញដំណឹងនេះអ្នកសារព័ត៌មានត្រយងបានទំនាក់ទំនងទៅកាន់អ្នកនាង ទូច ស្រីល័ក្ខ តាមប្រព័ន្ធសារអេឡិចត្រូនិចដើម្បីសុំសេចក្ដីស្រាយបំភ្លឺបន្ថែមទៅលើករណីនេះ។ អ្នកនាងបានឆ្លើយតបព្រមទាំងអំពាវនាវ ឱ្យបងប្អូនសាធារណជន ជាពិសេសគឺអ្នកគាំទ្ររបស់ខ្លួនបានដឹង ដើម្បីបានការពារខ្លួនចៀសវាងក្លាយជាជនរងគ្រោះដោយសារអំពើល្មើសណាមួយរបស់ក្រុមចោរអ៊ិនធឺណិតដែលបានលួចគ្រប់គ្រងលើទិន្នន័យផ្ទាល់ខ្លួនរបស់អ្នកនាងមិនថាលើហ្វេសប៊ុកឬយូធូបនោះឡើយ។
អ្នកនាងក៏បានសង្កត់ធ្ងន់ដែរថាអ្នកនាងកំពុងតែរៀបចំដើម្បីដាក់ពាក្យប្ដឹងទៅកាន់នាយកដ្ឋានប្រឆាំងបទល្មើសបច្ចេកវិទ្យា ដែលជាអាជ្ញាធរមានសមត្ថកិច្ចដើម្បីឱ្យជួយដោះស្រាយ មួយវិញទៀតអ្នកនាងបានសម្ដែងអារម្មណ៍សោកស្ដាយជាពន់ពេកដែលស្នាដៃនិងសមិទ្ធិផលជាច្រើនរបស់ខ្លួន មិនថាជាបទចម្រៀងក្ដី ឬការងារមនុស្សធម៌ផ្សេងៗ ត្រូវបានបាត់បង់អស់ត្រឹមតែមួយប៉ព្រិចភ្នែក។
សូមជម្រាបជូនថាករណីដែលអ្នកនាង ទូច ស្រីល័ក្ខ កំពុងជួបប្រទះនេះ មិនមែនជាករណីថ្មីនោះឡើយព្រោះកន្លងមកតារាល្បីៗរបស់កម្ពុជាដែលមានទំព័រហ្វេសប៊ុកល្បីល្បាញមានចំនួន Like និង Followers ច្រើនក៏ត្រូវបានក្រុមចោរអ៊ិនធឺណិតលួចយកទៅគ្រប់គ្រងដូចគ្នា ដោយមានករណីខ្លះពួកគេទាំងនោះថែមទាំងគម្រាមឱ្យម្ចាស់គណនីឬផេកបង់ប្រាក់ទៅពួកគេ ដើម្បីជាថ្នូរនឹងការប្រគល់គណនីឬផេកឱ្យម្ចាស់ដើមវិញ។
យ៉ាងណាមិញសារព័ត៌មានត្រយងសូមជូនពរឱ្យអ្នកនាង ទូច ស្រីល័ក្ខ អាចដោះស្រាយនិងអាចយកគណនីនិងផេករបស់អ្នកនាងមកគ្រប់គ្រងវិញដោយជោគជ័យផងចុះ៕
